ދެ ހަފްތާގެ މެދު ކެނޑުމަކަށް ފަހުން އިންގްލިޝް ޕްރިމިއާ ލީގުގެ ކުޅުން މިއަދު އަލުން ފަށާފައިވާ އިރު ފުރަތަމަ މެޗުގައި ވެސްޓް ބްރޯމާއި ޗެލްސީ ބައްދަލުކުރި މެޗު 5-2 އަކުން ވެސްޓް ބްރޯމް ކާމިޔާބުކޮށްފިއެވެ.
މިމެޗުގައި ފުރަތަމަ ލަނޑު ޖަހާ ލީޑު ނެގީ ޗެލްސީންނެވެ. މެޗުގެ 27 ވަނަ މިނެޓްގައި އެޓީމަށް ލިބުނު ހިލޭ ޖެހުމަށް ދަނޑީގައި ޖެހިފައި ނުކުތުމުން ގޯލުގެ ތެރެއަށް ވައްދާލައިގެން ޗެލްސީއަށް މި ލަނޑު ކާމިޔާބުކޮށްދިނީ ކްރިސްޓިއަން ޕުލިސިކްއެވެ.
އެހެން ނަމަވެސް މެޗުގެ އޮއިވަރު ބަދަލުވެގެން ދިޔައީ ޗެލްސީގެ ޑިފެންޑަރު ތިއާގޯ ސިލްވާއަށް މެޗުގައި ދެވަނަ ރީދޫ ކާޑެއް ދައްކާ 29 ވަނަ މިނެޓްގައި ރަތް ކާޑެެއް ދެއްކި ހިސާބުންނެވެ.
މިގޮތުން ފުރަތަމަ ހާފް ނިމުމުގެ ކުރިން ވެސްޓް ބްރޯމުން ވަނީ 2-1 ގެ ލީޑެއް ނަގާފައެވެ. މި ދެލަނޑު އެޓީމަށް ކާމިޔާބުކޮށްދިނީ މެތައުސް ޕެރޭރާއެވެ.
ދެވަނަ ހާފްގައި މޮޅެއް ކުޅުމެއް ދައްކާ ވެސްޓް ބްރޯމުން ވަނީ ޗެލްސީގެ ކޮޅަށް އިތުރު ތިން ލަނޑު ޖަހާފައެވެ. އަދި ދެވަނަ ހާފްގައި ޗެލްސީއަށް ކުޅެން ނިކުތް މޭސަން މައުންޓް ވަނީ ލަނޑެއް ޖަހާ ސްކޯގެ ފަރަގު ކުޑަކޮށްފައެވެ.
މިއީ ޗެލްސީގެ އާ ކޯޗު ތޯމަސް ޓުކެލް މަގާމާއި ހަވާލުވި ފަހުން އެޓީމުން މެޗަކުން ބަލިވި ފުރަތަމަ ފަހަރެވެ. އޭނާގެ ބެލުމުގެ ދަށުން މީގެ ކުރިން ޗެލްސީން ކުޅުނު 14 މެޗުން ވެސް އެޓީމު ބަލިވެފައެއް ނުވެއެވެ. މިމެޗުން ބަލިވުމުން ޗެލްސީއަށް ވަނީ ތާވާލުގެ 4 ވަނައިގައި ހަމަޖެހިލަން ލިބުނު ފުރުސަތު ގެއްލިފައެވެ.
މިމެޗުގައި ރީތި ކުޅުމެއް ދެއްކި ވެސްޓް ބްރޯމް އަދި ވެސް އޮތީ ތާވަލުގެ ފުލުން ދެވަނައިގައެވެ. އެހެން ނަމަވެސް މި ތިން ޕޮއިންޓާއި އެކު އެޓީމު މިވަނީ ރެލިގޭޝަނުން ބޭރުގައި އޮތް ނިއުކާސަލްއާއި 7 ޕޮއިންޓް ގާތަށް ޖެހިލާފެއެވެ.
