ދިވެހިރާއްޖޭގެ އަސްކަރިއްޔާގައި މިންތީގެ ހަމަހަމަކަން ގާއިމް ކުރަން ސަރުކާރުން ކުރަމުންދާ މަސައްކަތާ ބެހޭ މައުލޫމާތު، މިނިސްޓާ އޮފް ޑިފެންސް މާރިޔާ އަހްމަދު ދީދީ، ބައިނަލްއަގްވާމީ ޖަމާއަތާ ހިއްސާ ކުރައްވައިފިއެވެ.
މާރިޔާ އެމައުލޫމާތު ހިއްސާކުރެއްވީ، އ.ދ.ގެ ކޮމިޝަން އޮން ދަ ސްޓޭޓަސް އޮފް ވިމެންގެ 65 ވަނަ ސެޝަންގެ ހަވާސާގައި، ލެޓްވިއާއިން އިންތިޒާމް ކޮށްގެން، ރާއްޖެއިން ކޯހޯސްޓް ކުރާ ގޮތަށް ބޭއްވި "ރޯލް އޮފް ވިމެން ލީޑާސް އިން ދަ މިލިޓަރީ އެންޑް ޕީސްކީޕިން" ޕެނަލް ޑިސްކަޝަނަށް، ފޮނުއްވި ވީޑިޔޯ މެސެޖު މެދުވެރިކޮށެވެ.
އެ ޕެނަލް ޑިސްކަޝަންގައި ކެނެޑާ، ލައިބީރިޔާ، ނޯވޭ އަދި ލެޓްވިޔާއަށް ނިސްބަތްވާ އަންހެން ބްރިގޭޑިއާ ޖެނެރަލުންނާއި ކާނަލުން ޕެނަލިސްޓުންގެ ގޮތުގައި ވަނީ ބައިވެރިވެ ވަޑައިގެންފައެވެ.
މާރިޔާގެ ވާހަކަގައި ވިދާޅުވީ، އަސްކަރިއްޔާގައި އަންހެނުންގެ ދައުރު ފުޅާކުރަން ޖެހިފައި ވާ ކަމަށާއި، އެކަން ކުރެވޭނީ ލާމަސީލު އަންހެން ލީޑަރުން ބިނާކޮށް، އަސްކަރިއްޔާގެ ތެރެއިން އަންހެނުންގެ ހުނަރު ތަރައްގީ ކުރުމަށާއި ލީޑާޝިޕް ދެއްކުމަށް ހަރުދަނާ ފުރުސަތުތަކެއް ދީގެން ކަމަށެވެ.
މާރިޔާ ވިދާޅުވީ، ގައުމީ ސަލާމަތަށް ހުރި ޒަމާނީ ނުރައްކާތަކާ ކުރިމަތިލުމަށްޓަކައި ދެޖިންސުގެ ރައްޔިތުން ޝާމިލްވާހެން، އެއްބާރެއް ލައިގެން މަސައްކަތް ކުރަންޖެހޭ ކަމަށް ސަރުކާރުން ގަބޫލު ކުރާ ކަމަށެވެ.
128 އަހަރުގެ ދިގު ތާރީހެއް އޮތް ދިވެހި ގައުމީ ދިފާއީ ބާރުގައި އަންހެން ސިފައިން ހަރަކާތްތެރި ވާން ފެށިތާ 32 އަހަރު ވެގެން ގޮސްފައި ވާއިރު، އަންހެން ސިފައިންގެ ދައުރު ފުޅާކުރުމަށް ރައީސް ސޯލިހުގެ ސަރުކާރުން ދޭ ހާއްސަ އިސްކަން ފާހަގަ ކުރައްވާ މާރިޔާ ވިދާޅުވީ، ވޭތުވެދިޔަ 2 އަހަރާއި ބައިގެ މުއްދަތުގެ ތެރޭގައި، ރެކޯޑު އަދަދަކަށް އަންހެން ސިފައިން ރެކްރޫޓް ކޮށްފައި ވާ ކަމަށާއި، މިއަހަރުގެ ޖަނަވަރީ މަހު އެކަނިވެސް، ރެކޯޑު އަދަދަކަށް އަންހެން ސިފައިން، ޕްރޮމޯޝަން ހާސިލް ކޮށްފައިވާ ކަމަށެވެ.
އޭގެ އިތުރުން، ދިވެހި އަސްކަރިއްޔާގައި ފުރަތަމަ ފަހަރަށް ލެފްޓިނެންޓް ކާނަލްގެ މަގާމް ހާސިލްކުރި އަންހެން އޮފިސަރުންގެ ތެރެއިން 2 އޮފިސަރުން، އެމްއެންޑީއެފްގެ ލަފާދޭ މަޖިލީހަށް އައްޔަން ކުރުމަށްޓަކައި، އުސޫލަށް ބަދަލު ގެނެސްފައިވާ ކަމަށް މާރިޔާ ވިދާޅުވިއެވެ. އަދި މިއަދު، އެމްއެންޑީއެފްގެ ހުރިހާ ބޯޑެއްގައި އަންހެން ސިފައިން ތަމްސީލުވާނެ ކަމަށް ވެސް މާރިޔާ ވަނީ ވިދާޅުވެފައެވެ.
އަންހެން ސިފައިންގެ ހުނަރު ތަރައްގީކުރަން އިތުރު ފުރުސަތުތައް ހޯދުމަށް ސަރުކާރުން ކުރަމުން ގެންދާ މަސައްކަތް ފާހަގަކުރައްވާ މާރިޔާ ވަނީ، ދުނިޔޭގައި އަސްކަރީ ތަމްރީނުދޭ އެންމެ ދުވަސްވީ އަދި އެންމެ ގަދަރުވެރި އެއް މަރުކަޒު ކަމަށްވާ އިނގިރޭސިވިލާތުގެ ރޯޔަލް މިލިޓަރީ އެކެޑަމީ ސޭންޑްހާސްޓަށް، މީގެ ކުރިން، ހަމައެކަނި ފިރިހެން ކެޑޭޓުން ފޮނުވި ޒަމާންވީ ސަގާފަތް އުވާލާ، ފުރަތަމަ ފަހަރަށް، ކޮމިޝަނިން ކޯހަކަށް ފޮނުވި ދިވެހި އަންހެން އޮފިސާ ކެޑޭޓު، ފިރުޝާނާ ތައުފީގު، "ބެސްޓް އިންޓާނޭޝަނަލް ސްޓޫޑަންޓް އެވޯޑް" ހާސިލް ކޮށްފައި ވާކަމަށެވެ.
އަސްކަރިއްޔާގެ ބޭރުން، މިންތީގެ ހަމަހަމަކަން ގާއިމް ކުރަން ސަރުކާރުން ހާއްސަ އިސްކަމެއް ދީގެން އަޅާވާފައިވާ މުހިންމު ފިޔަވަޅުތަކުގެ ގޮތުގައި ލޯކަލް ކައުންސިލް އިންތިހާބުގެ 33 ޕަސެންޓް ގޮނޑި އަންހެނުންނަށް ހާއްސަ ކުރި ކަމަށާއި، ސުޕްރީމް ކޯޓުގެ ބެންޗަށް އަންހެން 2 ފަނޑިޔާރުން އައްޔަން ކުރި ކަމަށާއި، މިނިސްޓާ އޮފް ޑިފެންސްގެ މަގާމް ހިމެނޭހެން ގިނަ އަދަދެއްގެ އަންހެން ވަޒީރުން އައްޔަން ކުރެއްވުން ފަދަ ކުރިއެރުންތައް މާރިޔާ ފާހަގަ ކުރެއްވިއެވެ.
ދިވެހި އަސްކަރިއްޔާގެ އަންހެނުން ގެ ޚިދުމަތް އިންޑިޔާ ސިފައިންނަށް ބޭނުންވާނެ ބާ؟