މޯލްޑިވް ގޭސްގެ ޑީއެމްޑީ، އަދި އެކްޓިން މެނޭޖިން ޑިރެކްޓަރު، އަލީ އިކްރާމް އެ މަގާމުން އިސްތިއުފާ ދެއްވައިފިއެވެ.
ގޭހުން އިސްތިއުފާ ދެއްވާފައި ވާ ކަން އިކްރާމް ވަނީ 'ދަ ޕްރެސް' އަށް ކަށަވަރު ކޮށްދެއްވާފައެވެ. އޭނާ މަގާމުން އިސްތިއުފާ ދެއްވި އިރު، އޭނާގެ މައްޗަށް ވަނީ ކޮރަޕްޝަންގެ ތުހުމަތުގެ އިތުރުން މުވައްޒަފަކަށް ޖިންސީ ގޯނާ ކުރި ކަމުގެ ތުހުމަތު ވެސް ކޮށްފައެވެ. އެ ތުހުމަތުތަކާ ހުރެ އޭނާ އެ މަގާމުން ވަކިކުރަން ނިންމާފައިވާ ކަމަށް ވެސް ވަނީ އަޑުފެތުރިފައެވެ.
'ދަ ޕްރެސް' އަށް މައުލޫމާތު ދެއްވަމުން އިކްރާމް ވިދާޅުވީ، އޭނާ މަގާމުން އިސްތިއުފާ ދިނީ އަމިއްލައަށް ކަމަށާއި، އޭނާ މަގާމުން ވަކި ކުރަން ނިންމާފައި ނުވާ ކަމަށެވެ. އިސްތިއުފާ ދެއްވީ ކޮން ސަބަބަކާ ހުރެތޯ ސުވާލު ކުރުމުން އޭނާ ވިދާޅުވީ އިސްތިއުފާ ދެއްވީ އަމިއްލަ ކަމެއްގައި ކަމަށެވެ.
ހަމައެއާއެކު އޭނާއާ ދެކޮޅަށް ދެ މައްސަލާގައި ވެސް އޭނާގެ ދިފާއަށް ހެކި ހުރި ކަމަށާޢި، ދެ މައްސަލަވެސް އޭނާއާށް އެއްކޮޅަށް ނިމޭނެ ކަމުގެ ޔަގީންކަން އެބަ އޮތް ވެސް އިކްރާމް ވިދާޅުވިއެވެ.
އިކްރާމަށް ތުހުމަތު ކުރެވޭ ޖިންސީ ގޯނާގެ މައްސަލައާއި ކޮރަޕްޝަންގެ މައްސަލަ ވެސް ރައްޔިތުންގެ މަޖިލީހުގެ މަޖިލީހުގެ ސްޓޭޓް އޯންޑް އެންޓަރޕްރައިޒަސް (އެސްއޯއީ) ކޮމިޓީއިން ދަނީ ބަލަމުންނެވެ. ކޮރަޕްޝަންގެ މައްސަލައަކީ އޮކްސިޖަން ސިލިންޑަރުތަކެއް މޯލްޑިވް ގޭސްއަށް ސަޕްލައި ކޮށްދިން ކުންފުނީގެ ހަރަދުގައި އިކްރާމް ސިންގަޕޫރަށް ދަތުރުކޮށްފައިވާ ކަމަށް ބުނެ ތުހުމަތު ކުރެވޭ މައްސަލައެކެވެ.
އަދި މޯލްޑިވް ގޭސްގެ މުވައްޒަފުންތަކަކަށް އިކްރާމް ޖިންސީ ފުރައްސާރަ ކުރި ކަމަށް ތުހުމަތު ކުރެވޭ މައްސަލައެއް ދިޔައީ ބަލަމުންނެވެ. އެ މައްސަލާގައި އިކްރާމް ހުންނެވީ ސަސްޕެންޑް ވެސް ކޮށްފައެވެ.
