ރ އަތޮޅުގެ ރިސޯޓެއް ކަމަށްވާ އިންޓާކޮންޓިނެންޓަލް މޯލްޑިވްސް މާމުނަގައު އިން ރޭ ސްނޯކްލިން އަށް ގޮސް އުޅެނުކޮށް ގެއްލިގެން ހޯދަމުންދިޔަ އަންހެން ފަތުރުވެރިޔާ ހޯދުމުގެ މަސައްކަތުގައި 72000 އަކަ މީޓަރު ބަލާފައި ވާއިރު، އޭނާ ހޯދުމުގެ މަސައްކަތް އަދި ކުރަމުންދާ ކަމަށް އެމްއެންޑީއެފުން ބުނެފިއެވެ.
އޭނާ ހޯދުމުގެ މަސައްކަތުގައި މިހާތަނަށް އެމްއެންޑީއެފް ޑޯނިއާ ފްލައިޓު ބޭނުން ކޮށްގެން ވައިގެ މަގުން ވަނީ 275 އަކަ ނޯޓިކަލް މޭލުގެ ސަރަހައްދެއް ބަލާފައެވެ. އަދި ޑައިވް ކޮށްގެން 72000 އަކަ މީޓަރުގެ ސަރަހައްދެއް ކޯސްޓްގާޑް ޑައިވަރުންނާއި ރިސޯޓު ޑައިވަރުން ވަނީ ބަލާފައެވެ. އަދި ކަނޑުމަގުން ވެސް ފަތުރުވެރިޔާ ހޯދުމުގެ މަސައްކަތް ދަނީ ހުއްޓުމެއްނެތި ކުރަމުންނެވެ.
ކޯސްޓްގާޑުން މައުލޫމާތު ލިބިފައި ވާ ގޮތުގައި، ފަތުރުވެރިޔާ އެންމެ ފަހުން ލައިގެން ހުރީ ކަޅުކުލައިގެ ރަތްމާ ޖެހި މޫދު ހެދުމެކެވެ.
އެމްއެންޑީއެފުން ވަނީ މި ފަތުރުވެރިޔާއާ ބެހޭ އެއްވެސް ހަބަރެއް ވޭތޯ އެ ސަރަހައްދުން ދަތުރު ކުރާ އުޅަނދު ފަހަރުންނާއި އެ ހިސާބުގެ ރަށްތަކުން ބަލައިދިނުމަށް އެދިފައެވެ. އަދި އޭނާއާ ގުޅޭ އެއްވެސް މައުލޫމާތެއް ލިބިއްޖެނަމަ ލަސް ނުކޮށް ކޯސްޓް ގާޑުގެ ހިލޭ ގުޅޭ ނަންބަރު 191 އަށް ގުޅުމަށް ވެސް ވަނީ އެދިފައެވެ.
އިންޓާކޮންޓިނެންޓަލް މޯލްޑިވްސް ރިސޯޓުން ސްނޯކްލިންއަށް ދިޔަ ފަތުރުވެރިއަކި ހަބަރެއް ނުވެގެން ރިޕޯޓު ކޮށްފައި ވަނީ ރޭ 8:58 ހާއިރު ކަމަށް އެމްއެންޑީއެފުން ބުނެއެވެ. އެއީ ކެނެޑާއަށް ނިސްބަތްވާ 37 އަހަރުގެ މީހެކެވެ.
ފަތުރުވެރިޔަކު ގެއްލިގެން ހޯދަމުން ދާއިރު، ޑައިވިން އަށް ދާ މީހުން ގެއްލުމާއި ފަތުރުވެރިން މީހުން މަރުވުމުގެ ހާދިސާތައް ހިނގަމުންދާ މިންވަރު ރާއްޖޭގައި މިހާރަކަށް އައިސް ގިނަކަން ވަނީ ފާހަގަ ކުރެވިފައެވެ.
