އެމްޓީސީސީގެ 40 އަހަރުގެ ދިގު ތާރީހުގައި މިހާތަނަށް މާލީ އަހަރެއްގައި ހޯދި އެންމެ ރަނގަޅު މާލީ ނަތީޖާއާއެކު މިދިޔަ އަހަރުގެ ހަތަރު ވަނަ ކުއާޓަރުގައި އެމްޓީސީސީއަށް ސާފު ފައިދާގެ ގޮތުގައި 62.85 މިލިއަން ރުފިޔާ ލިބިއްޖެއެވެ.
2020 ވަނަ އަހަރުގެ ހަތަރުވަނަ ކުއާޓާގެ މާލީ ނަތީޖާ މިއަދު އެކުންފުނީގެ ވެބްސައިޓްގައި އާންމުކޮށްފައިވާއިރު 2020 ވަނަ އަހަރުގެ ހަތަރުވަނަ ކުއާޓާގެ މާލީ ނަތީޖާ ދައްކާގޮތުން ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 62.85 މިލިއަން ރުފިޔާ ކުންފުންޏަށް ލިބިފަވެއެވެ.
މިއީ 2019 ވަނަ އަހަރުގެ މިމުއްދަތުގައި ލިބުނު ނަތީޖާ އާއި (2019 ވަނަ އަހަރުގެ ހަތަރު ވަނަ ކުއާޓާ: 31.41 މިލިއަން ރުފިޔާ) އަޅާބަލާއިރު 52.15 ޕަސަންޓު އިތުރު އަދަދެއް ކަމަށް އެމްޓީސީސީން ވަނީ ބުނެފައެވެ.
ކުންފުނީގެ 2020 ވަނަ އަހަރުގެ ހަތަރުވަނަ ކުއާޓަގެ މާލީ ނަތީޖާގެ ތަފްސީލަށް ބަލާއިރު ، ހަތަރުވަނަ ކުއާޓާގައި ޖުމުލަ 400.10 މިލިއަން ރުފިޔާގެ (2019 ވަނަ އަހަރުގެ ހަތަރުވަނަ ކުއާޓާ: 377.31 މިލިއަން ރުފިޔާ) ވިޔަފާރި ކޮށްގެން 77.24 މިލިއަން ރުފިޔާ، ހިންގުމުގެ ފައިދާގެ ގޮތުގައި (2019 ވަނަ އަހަރުގެ ހަތަރުވަނަ ކުއާޓާ: 50.77 މިލިއަން ރުފިޔާ) ރިކޯޑު ކުރެވިފައިވާ ކަމަށް އެމްޓީސީސީން ބުނެއެވެ.
އެމްޓީސީސީން ބުނީ 2020 ވަނަ އަހަރުގެ ހަތަރުވަނަ ކުއާޓަރާއި ހަމައަށް ޖުމުލަ 1.25 ބިލިއަން ރުފިޔާގެ (2019 ވަނަ އަހަރުގެ މިމުއްދަތުގައި: 14.1 ބިލިއަން ރުފިޔާ) ވިޔަފާރި ކޮށްގެން، ޓެކުހަށް ކެނޑުމުގެ ކުރިން ލިބުނު ފައިދާ ވަނީ 203.11 މިލިއަން ރުފިޔާ (2019 ވަނަ އަހަރުގެ މިމުއްދަތުގައި: 63.08 މިލިއަން ރުފިޔާ) ރިކޯޑް ކުރެވިފައިވާ ކަމަށެވެ.
މިނަތީޖާއާއެކު މިދިޔަ އަހަރަކީ ކުންފުނީގެ 40 އަހަރުގެ ދިގު ތާރީހުގައި މާލީ އަހަރެއްގައި ރެކޯޑް ކުރެވިފައިވާ އެންމެ ރަނގަޅު ނަތީޖާ ހާސިލް ކުރެވުނު އަހަރު ކަމަށް އެމްޓީސީސީން ބުނެއެވެ.
2020 ވަނަ އަހަރުގެ ހަތަރުވަނަ ކުއާޓާގައި ކުންފުނިން ހާސިލްކޮށްފައިވާ ލަނޑުދަނޑިތަކަށް ބަލާއިރު، ރާއްޖޭގެ އުމްރާނީ ތަރައްގީގެ ބައިވެރިއެއްގެ ގޮތުން ހަތަރުވަނަ ކުއާޓާގައި އުމްރާނީ ތަރައްގީގެ ގިނަ މަޝްރޫއުތަކެއް ކާމިޔަބު ކަމާއި އެކު ހިންގާފައިވާ ކަމަށް އެމްޓީސީސީން ވަނީ ބުނެފައެވެ.
އެގޮތުން 52 މަޝްރޫއެއްގައި މަސައްކަތްކޮށް 11 މަޝްރޫއެއްގެ މަސައްކަތް ކަމިޔާބު ކަމާއިއެކު ނިންމާލާފައިވާ ކަމަށާއި 5 ޕްރޮޖެކްޓެއްގެ މަސައްކަތް ފެށި އިތުރު 17 މަޝްރޫއެއްގެ މަސައްކަތާއި ކުންފުނިން ވަނީ ހަވާލުވެފައެވެ. އަދި މުޅި އަހަރަށް ބަލާލާއިރު، ޖުމުލަ 34 އުމްރާނީ ތަރައްގީ މަޝްރޫއެއްގެ މަސައްކަތް 2020 އަހަރު ތެރޭ ވަނީ ނިންމާލާފައެވެ.
އެމްޓީސީސީން ބުނީ ކުންފުނީގެ އާންމު ވިޔަފާރި ދާއިރާ އާއި ކުންފުނީގެ އެހެނިހެން ވިޔަފާރި ދާއިރާތަކަށް އަމާޒުކޮށް ތަފާތުއެކި މާކެޓިން ހަރަކާތްތަކެއް ވެސް ހަތަރު ވަނަ ކުއާޓާ ތެރޭގައި ހިންގާފައިވާ ކަމަށެވެ. އަދި ކުންފުނީގެ މަޝްރޫއުތައް ހިނގަމުންދާ ރައްރަށުގެ މުޖުތަމައުތަކައް ވެސް ކުންފުނީގެ އިޖުތިމާއީ ޒިންމާގެ ދަށުން އެކި ގޮތްގޮތުން އެހީތެރިކަން ފޯރުކޮށްދީ ގިނަ މަސައްކަތްތަކެއް ކޮށްދީފައިވާ ކަމަށެވެ.
ކޮވިޑް-19 ގެ ސަބަބުން ކުންފުނީގެ އެކި ވިޔަފާރިތަކަށް ކުރަމުންދާ އަސަރު ކުޑަކުރުމަށް އަޅަންޖެހޭ އެންމެހާ ފިޔަވަޅުތަކާއި އިސްތިރާޖީ ޕްލޭންތައް ކުންފުނިން އެކުލަވާލާ، ހާލަތު ބަދަދަލުވަމުންދާ މިންވަރަށް ރިއާޔަތްކޮށް މުރާޖައާ ކުރަމުންދާ ކަމަށް އެމްޓީސީސީން ވަނީ ބުނެފައެވެ.
އޭގެ އިތުރުން ކޮވިޑް-19 އާ ގުޅިގެން ކުންފުނީގެ ވިޔަފާރީގެ މައިގަނޑު ދާއިރާތަކުން ހާސިލްކުރަން ބޭނުންވާ ލަނޑުދަޑިތަކާއި މާލީ ނަތީޖާ ހޯދުމަށް ކެނޑިނޭޅި މަސައްކަތް ކުރަމުންދާ ކަމަށް ވެސް އެމްޓީސީސީން ބުނެއެވެ.
ނަމަވެސް ފަރުވާތެރިކަމާއެކު ވިޔަފާރިތަކަށް މިހާލަތުގައި ގެންނަންޖެހޭ ބަދަލުތަށް ގެނެސް، ވިޔަފާރި ކުރިއަރުވާ، ކުންފުނީގެ މަގްސަދުތައް ހާސިލްކުރުމަށް ހިކްމަތްތެރިކަމާއެކު ފިޔަވަޅުތައް އަޅާ މިފިޔަވަޅުތަކުގެ ނަތީޖާ ހާސިލްކުރެވިފައިވާ ކަމަށް އެމްޓީސީސީން ވަނީ ބުނެފައެވެ.
އެމްޓީސީސީން ބުނީ އީޖާދީ ތަރައްގީއަށް ހިތްވަރުދިނުމާއި ހިދުމަތުގެ ފެންވަރު ރަނގަޅުކޮށް، ކުންފުނީގެ ކަންކަން އިސްލާހުކުރުމުގައި މެދު ނުކެނޑި މަސައްކަތް ކުރާނެ ކަމަށެވެ. އަދި އެންމެހާ ވިޔަފާރިތައް ކުރިއަރުވާ ކުންފުނީގެ ހިއްސާދާރުންނާއި މުޖުތަމައުއަށް ނަފާ ލިބޭގޮތަށް މަސައްކަތް ކުރިއަށް ގެންދާނެކަމުގެ ޔަގީންކަން އެމްޓީސީސީން ވަނީ ދީފައެވެ.
