ހަލުވިކަމާއެކު ފެތުރެމުން އަންނަ ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ސިނާއީ ފެންވަރުގައި ވެކްސިން އުފައްދަމުން އަންނަ ސީރަމް އިންސްޓިޓުއުޓް އޮފް އިންޑިއާ (އެސްއައިއައި)ގެ ފެސިލިޓީއެއްގައި އަލިފާނުގެ ހާދިސާއެއް ހިނގާ، 5 މީހުންގެ ފުރާނަ ގެއްލިއްޖެއެވެ.
ދުނިޔޭގައި އެންމެ ފުޅާ ދާއިރާއެއްގައި ވެކްސިން އުފައްދަމުން އަންނަ އެއް ކުންފުނި ކަމަށްވާ އެސްއައިއިގެ ޕޫނާ ފެސިލިޓީގައި މިއަދު ހަވީރު ހިނގި އަލިފާނުގެ ހާދިސާގައި، މަރުވި 5 މީހުންނަކީ ހާދިސާ ހިނގި ވަގުތު އިމާރާތުގެ ތެރޭގައި ތިބި މީހުން ކަމަށް މައުލޫމާތު ލިބެއެވެ.
އެސްއައިއައިގެ ސީއީއޯ އަދާރު ޕޫނަވައްލާ ވަނީ މިހާދިސާގައި މަރުވި މީހުންގެ އާއިލާތަކަށް ތައުޒިޔާ ދަންނަވާފައެވެ.
އަލިފާނުގެ ހާދިސާ ހިނގާފައިވަނީ، ހަދަމުންދިޔަ ފެސިލިޓީއެއްގައެވެ. އަލިފާންގަނޑު ކޮންޓްރޯލް ކޮށް، މިހާރު ކުރިއަށް ދަނީ ތަން ފިނި ކުރުމުގެ މަސައްކަތް ކަމަށް އަލިފާން ނިއްވުމާ ބެހޭ އޮފިޝަލުން ވަނީ ހާމަ ކުރައްވާފައެވެ.
އަލިފާނުގެ ހާދިސާ ހިނގި ސަރަހައްދަކީ، ކޮވިޑް-19 އިން ދިފާއުވުމަށް އެސްއައިއައިން ކޮވިޝީލްޑް ވެކްސިން ގުދަން ކުރަމުން އަންނަ އިމާރާތް ނޫން ކަމަށް އިންޑިއާގެ މީޑިއާއިން ހަބަރު ދެއެވެ. މިއީ ހަދަމުން އަންނަ އިމާރާތެއް ކަމުން، ވެކްސިން ސަޕްލައިއަށް އެއްވެސް އަސަރެއް ފޯރާފައި ނުވާކަމަށް މައުލޫމާތު ލިބެއެވެ.
