މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީގެ ޓީމެއް ހއ. އަދި ހދ. ގެ ރަށްތަކަށް ދަތުރެއް ކުރާގޮތަށް ހަމަޖެހިއްޖެއެވެ.
މި ޓީމް ހަރަކާތްތެރި ވާން ހަމަޖެހިފައި ވަނީ މިމަހު 12 އިން މިމަހު 18 ގެ ނިޔަލަށް ހއ. އަތޮޅުގައި ކަމަށާއި އަދި 19 އިން 24 ގެ ނިޔަލަށް ހދ. އަތޮޅުގައި ކަމަށް އެމްޓީސީސީން ވަނީ ބުނެފައެވެ.
އެމްޓީސީސީން ބުނީ މިދަތުރުގެ މަގުސަދަކީ ކޮވިޑް-19 ގެ މިހާލަތުގައި ވެސް މަސްވެރިންނާއި، އޮޑިވެރިންނާއި އަދި ދަތުރުވެރިންނަށް ގާތުން ހިދުމަތް ދިނުން ކަމަށެވެ.
އެގޮތުން އޮޑިވެރިންނާއި އޮޑިދޯނި ފަހަރު ބަންނަމުންދާ ފަރާތްތަކަށް މިހާލަތުގައި އެކިގޮތްގޮތުން ދިމާވެފައިވާ އަދި ދިމާވަމުންދާ ދަތިތަށް ދެނެގަނެ، އެކަންކަމަށް ހައްލު ހޯދޭނެ ގޮތްތަކާ މެދު އޮޑިވެރިންނާއި އޮޕަރޭޓަރުންނާއި އިންޖިނޭރުންނާއި އޮޑިދޯނި ފަހަރު ބަނުމުގެ މަސައްކަތުގައި ހަރަކާތްތެރިވާ ފަރާތްތަކުގެ އިތުރުން ރަށު ކައުންސިލް އިދާރާތަކާ މަޝްވަރާ ކުރުން ހިމެނޭ ކަމަށް އެމްޓީސީސީން ބުނެއެވެ.
މިދަތުރުގައި ކުރިއަށް ދާނެ މައިގަނޑު ހަރަކާތްތަކުގެ ތެރޭގައި އަލަށް ބަންނަމުންދާ އޮޑިދޯނި ފަހަރު އިންސްޕެކްޓްކޮށް، މިހާރު ދުއްވަމުންދާ އޮޑިފަހަރުގެ އިންޖީނަށް މައްސަލައެއް ދިމާވާކަން ފާހަގަ ކުރެވޭނަމަ ޓެކްނިކަލް އެހީތެރިކަން ފޯރުކޮށްދިނުން ހިމެނޭ ކަމަށް ވެސް އެމްޓީސީސީން ބުނެއެވެ.
އެމްޓީސީސީން ބުނީ އެކުންފުނިން ފޯރުކޮށްދޭ ހިދުމަތްތައް ހޯދުމުގައި އަތޮޅު ތެރޭގައި ތިބި ކަސްޓަމަރުންނަށް ދިމާވަމުންދާ ދަތިތައް ދިރާސާކުރުމާއި އިންޖީނާއި ސްޕެއަޕާޓްސް ގަތުމުގައި ފައިސާ ދެއްކޭނެ ޕްލޭން ތަކާބެހޭ މައުލޫމާތު އޮޑިވެރިންނާ ހިއްސާކުރުން ވެސް ހިމެނޭ ކަމަށެވެ.
އެމްޓީސީސީން ބުނީ އެކުންފުނީގެ މަގުސަދަކަށް ވެފައިވަނީ ރާއްޖޭގެ އެކި ހިސާބުތަކުގައި ދިރިއުޅޭ އޮޑިވެރިންނަށް އެދާއިރާއިން ހައްލު ހޯދާދިނުމާއި ގާތުން ހިދުމަތް ފޯރުކޮށްދިނުން ކަމަށެވެ.
