މިހިނގާ 2021 ވަނަ އަހަރުގެ މާޗް މަސް ނިމޭއިރު، އިސްރާއީލަށް ނިސްބަތްވާ 16 އަހަރުން މަތީގެ ހުރިހާ އެންމެނަށްވެސް ކޮރޯނާވައިރަސް ޑިޒީޒް (ކޮވިޑް-19) ގެ ވެކްސިން ދީ ނިންމާލެވޭނެ ކަމަށް އިސްރާއީލުން ބުނެފިއެވެ.
ކޮވިޑް-19 އިން ދިފާއުވުމަށް ވެކްސިން ތަރައްގީ ކޮށްފައިވާ ފައިޒާ ކުންފުނީގެ ވެކްސިން ޑޯޒްތައް އިސްރާއީލަށް ހަލުވި ދުވެލީގައި ކަށަވަރު ކުރުމުގެ އެއްބަސްވުމެއް އެކުލަވާލާފައި ވާއިރު، ބޮޑު ވަޒީރު ބެންޖަމީން ނަތަންޔާހޫ ވަނީ މުޅި އިސްރާއީލަށް ވެކްސިން ދީ ނިންމާލުމަށް ބޭނުން ވަނީ އެންމެ 12 ހަފުތާ ކަމަށް އިޝާރާތް ކުރައްވާފައެވެ.
ޓީވީ މެދުވެރިކޮށް ދުރަށް ފޮނުވި ބަޔާނެއްގައި ނަތަންޔާހޫ ވަނީ، ވެކްސިން ޖަހަން ބޭނުން މީހުންގެ ތެރެއިން 16 އަހަރުން މަތީގެ ކޮންމެ މީހަކަށްވެސް، މާޗް މަސް ނިމޭއިރު ނުވަތަ އެއަށްވުރެވެސް ވުރެ ވެސް ކުރިން ވެކްސިން ކަށަވަރު ވާނެ ކަމަށް ވިދާޅުވެފައެވެ.
ކޮރަޕްޝަންގެ ދައުވާއަކާ ކުރިމަތިވެ، ބުދަ ދުވަހު ކޯޓަށްވެސް ހާޒިރުވާން ޖެހިފައިވާ ނަތަންޔާހޫ ގެންދަވަނީ، ވެރިކަމުގެ އާ ދައުރެއް ކަށަވަރު ކުރެއްވުމުގެ ހަތިޔާރަކަށް ވެކްސިން ކޭމްޕޭން ބޭނުން ކުރައްވަމުންނެވެ. އިސްރާއީލުގައި އަވަސް އާންމު އިންތިހާބެއްގެ ވޯޓުލުން، މާޗް 23 ވަނަ ދުވަހަށް ވަނީ ތާވަލު ކޮށްފައެވެ.
އިސްރާއީލުގައި ކޮވިޑް-19 ގެ ކޭސްތައް ފެންނަ މިންވަރު އިތުރުވާން ފަށާފައި ވާއިރު، ހަރުކަށި ފިޔަވަޅުތަކެއްވެސް މިހާރު ތަންފީޒު ކުރަމުން އަންނަ ކަން ފާހަގަ ކުރަންޖެހެއެވެ.
