ޖަރީ އަނގޮޓިއާއި ގަހަނާއަކީ އަދިވެސް ގިނަ ބައެއްގެ ސަމާލުކަން ދަމައިގަންނަ އުފެއްދުންތަކެކެވެ.
މި ރޫހުގައި ފަންނުވެރިންވެސް ފަހަކަށް ނުޖެހެއެވެ. އެއް ފަރުމާއަށް ވުރެ އަނެއް ފަރުމާ ފުރިހަމަ ކުރެއެވެ. ޝާނާއި ޝައުކަތާއި، މުއްސަނދި ކަމާއި ތަނަވަސްކަމުގެ ރަމްޒަކަށްވެސް ގިނަ ފަހަރު މި ފަދަ ގަހަނާތައް އޮންނަނީ ވެފައެވެ.
މިއީވެސް އެ ފަދަ އަނގޮޓިއެއްގެ ވާހަކައެވެ. މިއީ އާދައިގެ އަނގޮޓިއެއް ނޫނެވެ. މި އަނގޮޓީގައި، ޖަވާހިރުގެ ކިތައް އެސްކޮޅު ޖަހާފައި ވާ ކަން އެނގޭ ހެއްޔެވެ؟
މި ސުވާލުގެ ޖަވާބު ދިނީ ގިނިސް ވޯލްޑް ރެކޯޑްސް ނުވަތަ ދުނިޔޭގެ ފެންވަރުގެ ރެކޯޑްތަކުގެ ހިސާބު ކިތާބު ބަލަހައްޓާ ފަރާތުންނެވެ.
ގިނިސް ބުކް އޮފް ވޯލްޑް ރެކޯޑްސްއިން ބުނާ ގޮތުގައި މި އަނގޮޓީގައި 12638 ޖަވާހިރު އެސް ޖަހާފައިވެއެވެ.
އިންޑިއާގެ ރިނާނީ ޖުވެލްސްގެ ހަރުޝީތު ބަންސާލް، މި ރެކޯޑް ކަށަވަރު ކުރީ 2020 ވަނަ އަހަރުގެ ޑިސެމްބަރު މަހުގެ 21 ވަނަ ދުވަހުއެވެ.
"މެރިގޯލްޑް" ނުވަތަ ކުރިއެރުމުގެ އަނގޮޓީގެ ނަމުން ނަން ދީފައިވާ މި އަނގޮޓީގައި ޖަވާހިރުގެ އެސް ޖަހާ، ފަރުމާ ކޮށްފައި ވަނީ މަލެއްގެ ބައްޓަމަށެވެ.
ގިނިސް ވޯލްޑް ރެކޯޑުން ހަބަރު ދޭ ގޮތުގައި، މި އަނގޮޓީގައި ގުދުރަތީ ކެޑުން އެކުލެވޭ 38.08 ކެރެޓްގެ އެތައް ހާސް ޖަވާހިރެއް ބޭނުން ކޮށްފައި ވެއެވެ. މި އަނގޮޓީގެ ބަރުދަނަކީ ގާތްގަނޑަކަށް 165 ގުރާމް ނުވަތަ 5.8 އައުންސްއެވެ.
އެންމެ ޖަވާހިރު ގިނަ އަނގޮޓީގެ ރެކޯޑް މިހާތަނަށްވެސް އޮތީ އިންޑިއާގައެވެ. އެއީ ހައިދަރުއާބާދޫގެ ހޯލްމާކް ޖުވެލާޒްއިން ފަރުމާ ކުރި އަނގޮޓިއެކެވެ. އެ އަނގޮޓީގައި ޖަހާފައިވަނީ 7801 ޖަވާހިރު އެސްކޮޅެވެ.
ގިނިސްއާ ވާހަކަ ދައްކަމުން ބަންސާލް ބުނީ، އެންމެ ގިނަ ޖަވާހިރު އެސް ޖެހި އަނގޮޓީގެ ރެކޯޑް މުގުރާލުމުގެ ޝައުގު އުފެދުނީ 2018 ވަނަ އަހަރު، ގަހަނާ ހެދުމުގެ ރޮނގުން އޭނާ ކިޔެވި ދުވަސްވަރު ކަމަށެވެ. މި ހުވަފެނުގައި ހަގީގީ ކުލަ ޖައްސާ، އަނގޮޓީގެ މަސައްކަތް މުޅިން ނިންމާލީ 2020 ވަނަ އަހަރުގެ ނޮވެމްބަރު މަހުގެ 30 ވަނަ ދުވަހުއެވެ.
