ކޮވިޑް ޕޮޒިޓިވް ކޭސްތަކެއް ފެނުމާ ގުޅިގެން މޮނިޓަރިންގެ ހާލަތަށް ބަދަލުކޮށްފައިވާ ނިޔަމަ ޕްރައިވެޓް އައިލެންޑްސް މޯލްޑިވްސް ރިސޯޓުން މިހާރު ޖުމްލަ 12 ކޮވިޑް ކޭސް ފެނިފައިވާ ކަމަށް އެޗްޕީއޭއިން ބުނެފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ، ނިޔަމަ ރިސޯޓުން މިއަދު އިތުރު 5 މީހަކު ޕޮޒިޓިވްވެ ޖުމްލަ އަދަދު 12 އަސް އަރާފައިވާ ކަމަށެވެ. މިހާރު އެ ރިސޯޓުގައި ތިބި ކޭސްތަކުގެ ތަފްސީލް ހަމާ ކުރަމުން އެޗްޕީއޭއިން ބުނީ، 12 ކޭސްގެ ތެރޭގައި ހިމެނެނީ އެ ރިސޯޓުގެ 5 ސްޓާފުންނާއި އެ ރިސޯޓަށް ޒިޔާރަތްކުރި 7 ފަތުރުވެރިން ކަމަށެވެ.
މި ކޭސް އާ ގުޅިގެން މިހާރު ކޮންޓެކްޓުން ދެނެގަނެވިފައިވާ ކަމަށާއި އެ ގޮތުން މިހާރު 26 ކޮންޓެކްތޫން ފާހަގަކޯށް އެމީހުން އެކަހެރިކޮށްފައިވާ ކަމަށް އެޗްޕީއޭއިން ބުނެއެވެ. މީގެ އިތުރުން އެޗްޕީއޭއިން ބުނީ، މިއަދު ފެނުނު ކޭސްތަކަކީ މި މަހުގެ 2 ވަނަ ދުވަހު އެ ރިސޮތޫން ޑިޕާޝާ ވުމުގެ ކުރިން ހެދި ކޮވިޑް ޓެސްޓުގެ ނަތީޖާއިން ފެނުނު ޕޮޒިޓިވް ކޭސްތަކާ ގުޅުން ހުރި ކޭސްތަކެއް ކަމަށެވެ.
އިއްޔެ އެޗްޕީއޭއިން އިއުލާން ކުރި ކޮވިޑް ކޭސްގެ ތަފާސް ހިސާބުތަކަށް ބަލާއިރު މިހާރު ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު ވަނީ 13,834 އަށް އަރާފައެވެ. ހަމައެއާއެކު ބަލި ޖެހުނު މީހުންގެ ތެރެއިން ބަލިން ރަނގަޅުވި ޖުމްލަ މީހުންގެ އަދަދު ވަނީ 13،166 އަށް އަރާފައެވެ.
މިވަގުތު މިބަލި ޖެހިފައި ތިބި މީހުންގެ އަދަދު 613 ގައި އުޅޭ އިރު، އެމީހުންގެ ތެރެއިން 29 މީހަކަށް ހޮސްޕިޓަލުގައި ދަނީ ފަރުވާ ދެމުން ކަމަށް އެޗްޕީޢޭއިން ބުނެފައި ވެއެވެ. އަދި ރާއްޖެއިން ކޮވިޑް ބަލީގައި ނިޔާވި މީހުންގެ އަދަދު 48 އަށް ވަނީ އަރާފައެވެ.
