އެމްޓީސީސީގެ ތާރީހުގައި އެންމެ ގިނަ މަޝްރޫއު ނިންމުނު އަހަރަކީ 2020 ވަނަ އަހަރު ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް ކުރެއްވި ޓްވީޓެއްގައި ވިދާޅުވީ މިދިޔަ އަހަރު އެކުންފުނިން 34 ޕްރޮޖެކްޓްގެ މަސައްކަތް ނިންމާފައިވާ ކަމަށެވެ. އޭގެ ތެރޭގައި 10 ރަށަށްވުރެ ގިނަ ރަށުގެ ބަނދަރު ހެދުމުގެ މަސައްކަތާއި ނުވަ ރަށެއްގެ ފުޓްބޯޅަ ދަނޑު ހެދުމުގެ މަސައްކަތާއި ބިން ހިއްކުމުގެ ހަތަރު މަސައްކަތް ހިމެނެއެވެ.
އޭގެ އިތުރުން، ހއ. ހޯރަފުށީ އަދި ގދ. މާވަރުލުގެ ވައިގެ ބަނދަރުގައި ތަރައްގީ ކުރުމާއި އަލިފާން ސްޓޭޝަން އިމާރާތް ކުރުމުގެ މަޝްރޫއު ވެސް ހިމެނެއެވެ.
އެމްޓީސީސީން މިދިޔަ އަހަރު އެންމެ ގިނަ މަޝްރޫއު ނިންމާފައި ވަނީ އޭޕްރިލް މަހާއި ޑިސެމްބަރު މަހުގެ ތެރޭގައެވެ. އެގޮތުން މި ދެ މަހުވެސް އެމްޓީސީސީން ވަނީ ހަ މަޝްރޫއު ނިންމާފައެވެ.
އެމްޓީސީސީގެ ތާރީހުގައި އެންމެ ބޮޑު ފައިދާއެއް ވެސް ލިބިފައިވަނީ މިދިޔަ އަހަރުއެވެ. އެގޮތުން މިދިޔަ އަހަރުގެ ފުރަތަމަ ނުވަ މަސް ދުވަހުގެ ތެރޭގައި އެ ކުންފުންޏަށް ސާފު ފައިދާގެ ގޮތުގައި 140 މިލިއަން ރުފިޔާ ވަނީ ލިބިފައެވެ.
އެމްޓީސީސީ އުފައްދާފައިވަނީ މީގެ 40 އަހަރު ކުރިން، ޑިސެމްބަރު 18، 1980 ވަނަ އަހަރުއެވެ. އެމްޓީސީސީ ވެގެން ދިޔައީ އުމްރާނީ ތަރައްގީގެ އާ ބާބަކަށް އެދިއެދި ތިބި އެތަކެއް ދިވެހި ރައްޔިތުންގެ އުއްމީދުތަކުގައި ހަގީގީ ކުލަޖައްސައިދިން ކުންފުންޏަކަށެވެ.
