ބައެއް މީހުންނަށް އެއީ ހިތި ހަނދާނެކެވެ. އަނެއް ބަޔަކަށް އެއީ ހިނި އަންނަ ޒާތުގެ ކަމަކަށްވެސް ވެދާނެއެވެ. އަލްވަދާއު ކިޔަމުން މިދާ 2020 ވަނަ އަހަރު، އެ ކެއުމަކަށް އެތައް ބަޔަކު އިންތިޒާރު ކުރުވި ކެއުމަކަށްވެސް އެ ކެއުންވި ފަދައެވެ.
ފޮނި އުއްމީދުތަކަކާއެކު އެތައް ބަޔަކު ކުރިމަތިލި 2020 ވަނަ އަހަރު ބޮޑު ބައެއް ގިނަ މީހުންނަށް ހޭދަކުރަން ޖެހުނީ އަމިއްލަ ވަޒަނުގައި ގައިދުވެފައި ތިބި ހާލުގައެވެ. ބަރޯސާވާންޖެހުނީ ނުވެސް ދަންނަ މީހަކު ގެނެސްދޭ ކާއެތިކޮޅަކަށެވެ. އާދެހެވެ. ކަރަންޓީނު ޖާފަތަށެވެ.
ދުނިޔޭގެ އެކި ކަންކޮޅުތަކުގައި އޮޕަރޭޓް ކުރަމުންދާ ކަރަންޓީނު ފެސިލިޓީތަކަށް ދާން ޖެހުނު މީހުންގެ އަދަދު މަދެއް ނޫނެވެ. މިއިން ކޮންމެ މަރުކަޒަކީވެސް ބޮޑެތި ޖާފަތްތަކަށް ކައްކާ އުސޫލުން ކޭން ތައްޔާރުކޮށް، ކޮޓަރި ކޮޓަރިއަށް ޑެލިވާ ކުރާ މަރުކަޒުތަކެވެ. ބައެއް މަރުކަޒުތަކުން ހިދުމަތް ހޯދި މީހުންގެ އަތުގައި ނަސީބު ހިފިއެވެ. އަނެއް ބަޔަކަށް ޖެހުނީ ކޭ ހަލުވި މިނުގައި އެ ހަނދާން ނައްތާލާށެވެ.
ކޮންމެ ރަހައެއް ލީ ކަމުގައި ވީ ނަމަވެސް 2 ހަފުތާގެ ކަރަންޓީނުގައި ތިބިއިރު، އެ ލިބުނު ޖާފަތަކީ އެތައް ބަޔަކު އިންތިޒާރު ކުރި އެއްޗަކަށްވެސްވިއެވެ. އޮސްޓްރޭލިއާއަށް ނިސްބަތްވާ ހެންރީ ޕާމް ސިފަކުރި ގޮތުގައި، ދުވާލުގެ 3 އިރުގެ ކޮއްތު ލިބޭނެ ވަގުތަކީ ކަރަންޓީނުގައި ހުރި އިރު އޭނާ އެންމެ އުއްމީދު ކުރި ވަގުތެވެ.
އެންމެންގެ ތަޖުރިބާ ފޮންޏެއް ނޫނެވެ. ބައެއް މީހުންނަށް ލިބުނު ކަރަންޓީނު ޖާފަތަކީ އެތައް މަހެއް ވީއިރުވެސް ހިތަށް ބިރު އިހުސާސްކޮށްދިން "ޖާފަތެއް" ކަމަށްވެސް ބުނެއެވެ.
ހޯޒީ ގިބޯންއަށް ޕާސްތާ ނޫން އެއްޗެއް ނުލިބުނެވެ. ނޯވޭގައި ކަރަންޓީނު ވެގެން ހަފުތާއެއް ވީއިރު ޕާސްޓާ މަތިން ފޫހިވެއްޖެއެވެ. ހޯޒީގެ ހިތުގައި ޕާސްތާއަކަށް ދެން ޖާގައެއް ނެތެވެ. ހެނދުނާ، މެންދުރާ ރޭގަނޑަށް ގެނައި ޕާސްތާ ޖާފަތްތަކާއެކު މިއަދު އެ ޖާފަތްތަކަށް ޖާގަ އޮތީ ހޯޒީ ހުރި ކޮޓަރީގެ ދޮރުން ބޭރުގައި އެކަންޏެވެ.
ކޮންމެ ރަހައެއް ލީ ނަމަވެސް އެއީ ސަރުކާރެއްގެ ބުރަ މަސައްކަތް ކަން ހޯޒީ ގަބޫލުކުރެއެވެ. ދުނިޔޭގެ އެކި ކަންކޮޅުތަކުން އަންނަ އެކި ޒާތްޒާތުގެ މީހުންނަށް ކޭން ތައްޔާރު ކުރުމަކީ ފަސޭހަ ކަމަކަށް ނުވާނެ ކަންވެސް ހޯޒީ ގަބޫލުކުރެއެވެ.
ކެއްކުމުގެ ދާއިރާގައި އުޅޭ ފަންނުވެރިންނަށް ކަރަންޓީނު ޖާފަތް މުޅިން ހިއްޗެއް ނުވިއެވެ. މިފަދަ އެކަކީ ނިއުޒީލަންޑްގެ ބަރިސްޓާއެއް ކަމަށްވާ ސޭމް ލޯވްއެވެ. ކަރަންޓީނުގައި އޭނާއަށް ގެނެސްދިން ޖާފަތްތައް 7 ތަރީގެ ހޮޓަލެއްގެ ފެންވަރަށް ބަދަލުކޮށްލިއެވެ. ނިއުޒީލަންޑްގެ ބޮޑުވަޒީރު ޖެސީންޑާ އެޑާންއަށްވެސް މިކަން ކަމުދިޔައެވެ.
ސޭމް ކަރަންޓީނަށް ދިޔައީވެސް އެކަމަށް ތައްޔާރު ވެގެންނެވެ. ސޯޝަލް މީޑިއާއަށް އަރަމުންދިޔަ ކަރަންޓީނު ޖާފަތުގެ ތޫފާންތައް ފެނި، އެކަމުން ދިފާއުވާނެ އައްޑަނައާއި ހަތިޔާރުގެ ގޮތުގައި ގެވެހި ކަންވާރުގެ ސާމާނުވެސް ހިފައިގެންނެވެ.
ސޭމްގެ ކޮޓަރިއަށް ޖާފަތް އަންނަ ހިސާބުން އެ ދަނީ ބަނޑަކަށް ނޫނެވެ. ތަފާތު އެކި ގޮތް ގޮތަށް އެ ޖާފަތް ފަރުމާ ކުރުމަށް އޭނާ އެތައް ވަގުތެއް ހޭދަކުރެއެވެ. ނަތީޖާއެއްގެ ގޮތުން، ކައްކާއިންގެ ރާޑަރަށްވެސް ސޭމް އެރިއެވެ. ކަރަންޓީނުގައި ފޫހިވާނެ ވަގުތެއް ނުވެއެވެ.
ސޭމްގެ ޖާފަތް ރީތީ މަންޒަރަށެވެ. ބައެއް ކޭންތަކަކީ އަނގަޔަށް ލާންވެސް ނުކުރޭ ބާވަތްތަކެއް ކަމަށްވެއެވެ. ސޭމް އައީ މިކަމަށްވެސް ތައްޔާރުވެގެންނެވެ. މެޔޮނޭޒްއާއި މިރުސް-ތެޔޮވެސް ހިފައިގެންނެވެ. ރަހަ ނުލާ ޖާފަތްތަކުގެ ދާން ފަޅުވިލާދިނީ މި 2 ބާވަތުން ކަމަށް އޭނާ ބުނެއެވެ.
ކޮންމެ ގޮތަކަށް ކަންވެ ދިޔަ ކަމުގައި ވީ ނަމަވެސް، ކަރަންޓީނު ޖާފަތަކީ 2020 ވަނަ އަހަރުގެ ޓްރެންޑެއް ނޫން ކަމަކަށް ނުވާނެއެވެ.
