ކ. ފުށިދިއްގަރުފަޅުގައި ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީ ކުރުމުގެ މަޝްރޫއާ ގުޅިގެން ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލު ކުރެއްވުމުން ޕީޖީން ދައުވާ ކުރި ކުރީގެ ނާއިބު ރައީސް އަބްދުﷲ ޖިހާދަށް ބޭސްފަރުވާއަށް ފުރަން ހުއްދަ ނުދީ އޭނާގެ ޕާސްޕޯޓް އަންނަ މަހުގެ 20 ވަނަ ދުވަހާ ހަމައަށް ހިފަހައްޓަން ނިންމައިފިއެވެ.
މިއަދު ކްރިމިނަލް ކޯޓުގައި ބޭއްވި އަޑުއެހުމުގައި ވަނީ ބޭސް ފަރުވާއަށް ރާއްޖެއިން ބޭރަށް ވަޑައިގަތުމުގެ ހުއްދައަކަށް ޖިހާދު އެދިވަޑައިގެންފައި ވާތީ އެ މައްސަލަ އަށް ގޮތެއް ނިންމައިފައެވެ.
މި ގޮތުން، މައްސަލަ ބެއްލެވި ގާޒީ ނިންމެވީ ޖިހާދަށް އުފުލާފައިވާ ދައުވާއަށް ބަލާއިރު އޭނާ ފިލާފާނެ ކަމުގެ އިހުތިމާލު އޮތުމުން ފުރުމުގެ ހުއްދަ ނުދިނުމަށާއި އަންނަ މަހުގެ 20 ވަނަ ދުވަހާއި ހަމައަށް ޕާސްޕޯޓު ވެސް ހިފެހެއްޓުމަށެވެ.
މިއަދުގެ އަޑުއެހުމުގައި ޖިހާދު ވަނީ ބޭސްފަރުވާ އަށް ދުބާއީ ވަޑައިގަތުމަށް ޓިކެޓު ނަންގަވާފައިވާ ކަމަށް ވެސް ވިދާޅުވެފައެވެ. ޖިހާދަކީ ސިއްހީ ގިނަ މައްސަލަތެއް ހުންނެވި ބޭފުޅެއް ކަމަށް ޖިހާދުގެ ވަކީލު ހުސައިން ފަލާހު ވިދާޅުވިއެވެ. އެގޮތުން އިމްސޮމްނިއާ އާއި ހަކުރު ބަލި އާއި އަވަސް އަވަހަށް ކުޑަ ކަމުދެވޭ ބަލި ފަދަ ބަލިތައް ވަކީލް ފާހަގަކުރެއްވިއެވެ.
ދުބާއީއަށް ބޭސްފަރުވާއަށް ފުރާވަޑައިގަތުމަށް ޖިހާދު އެދިވަޑައިގެންފައިވާއިރު އޭނާގެ ދަރިން ވެސް ތިއްބެވީ ދުބާއީގައި ކަމަށާއި އެކުދިން ނުފެންނަތާ ވަރަށް ގިނަ ދުވަސް ވެފައިވާ ކަމަށް ޖިހާދުގެ ފަރާތުން ކޯޓުގައި މިއަދު ވިދާޅުވިއެވެ. އަދި އޭގެތެރެއިން އެއް ކުއްޖަކު ބަލިވެ އުޅޭ ކަމަށްވެސް ވިދާޅުވިއެވެ.
އެކަމަށް އިންކާރުކޮށް ދައުލަތުން ބުނީ ޖިހާދު ރާއްޖެއިން ބޭރަށް ވަޑައިގަންނަވަނީ އެއްވެސް ހާލެއްގައި ރާއްޖެއިން ލިބެން ނެތް ފަރުވާއެއް ހޯދުމަށް ނޫން ކަމަށެވެ. ރާއްޖެއިން ފަރުވާ ލިބޭ ކަމަކަށް ރާއްޖެއިން ބޭރަށް ފަރުވާ ހޯދަން ފުރަން ހުއްދަ ދޭންޖެހޭ ސަބަބެއް އޮތް ކަމަށް ގަބޫލު ނުކުރާ ކަމަށާއި ޖިހާދު ފިއްލަވާނެ ކަމަށްވެސް ދައުލަތުން ބުނެއެވެ.
އެމަނިކުފާނު އަދާ ކުރެއްވި މަގާމުތަކުގެ ގޮތުން ގިނަ އަދަދެއްގެ ބާރުވެރި ފަރާތްތަކާއި ގުޅުން އޮންނާނެ ކަމަށް ގަބޫލު ކުރެވޭ ކަމަށާއި އެހެންކަމުން އެފަދަ ކަމެއް ހިނގުމުގެ ފުރުސަތު އޮތް ކަމަށް ވެސް ދައުލަތުން ބުނެއެވެ.
މިއަދުގެ އަޑުއެހުގައި ޖިހާދު ވަނީ ދައުލަތުން ދެއްކި ވާހަކަތައް އިންކާރު ކުރައްވާފައެވެ. އަދި އޭނާ ވިދާޅުވީ ހަތިމެއް ގެނެސްފި ނަމަ އެ ހަތިމުގައި އަތްލާ ވެސް ހުވާ ކޮށްފާނަން ކަމަށެވެ. އެގޮތުން އޭނާ އަކީ ފިލާނެ މީހެއް ނޫން ކަމަށާއި އަންނަ މަހުގެ 11 ވަނަ ދުވަހު އެނބުރި ރާއްޖެ އަންނާނެ ކަމުގެ ޔަގީންކަން ގާޒީ އަށް ދެއްވާ ކަމަށެވެ.
އެހެންނަމަވެސް މިއަދުގެ ޝަރިއަތް ނިމުނު އިރު އޭނާ ފުރުމުގެ ހުއްދަ ނުދީ އޭނާގެ ޕާސްޕޯޓްވެސް އަންނަމަހުގެ 20 ވަނަ ދުވަހަށް ހިފެހެއްޓުމަށް ގާޒީ ވިދާޅުވިއެވެ.
ޖިހާދުގެ މައްޗަށް ޕީޖީޏް ދައުވާ ކޮށްފައި ވަނީ ކ. ފުށިދިއްގަރުފަޅު، ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީ ކުރުމުގެ މަޝްރޫއާ ގުޅިގެން އޭރުގެ ފިނޭންސް މިނިސްޓަރު ކަމުގެ މަގާމުގައި ހުންނަވައި، ދައުލަތަށް ފައިދާއެއް ލިބެން އޮތް ކަމެއްގައި އެ ނޫންގޮތަކަށް އަމަލު ކުރެއްވި ކަމަށް ބުނެއެވެ. މި މައްސަލައަކީ ކޮރަޕްޝަން އެންޑް އެސެޓް ރިކަވަރީއާ ބެހޭ ރިޔާސީ ކޮމިޝަނުން ތަހުގީގު ކުރުމަށް ފަހު ދައުވާ ކުރުމަށް ޕީޖީ އޮފީހަށް ފޮނުވި މައްސަލައެކެވެ.
މި މައްސަލަ 2013 ގެ އޮގަސްޓް މަސް ތެރޭގައި އެންޓި ކޮރަޕްޝަން ކޮމިޝަނަށް ހުށަހެޅި، އެ ކޮމިޝަނުން ތަހުގީގު ކުރުމަށް ފަހު 2016ގެ ފެބްރުއަރީ ގައި ވަނީ ކޮރަޕްޝަން އެކުލެވިގެން ނުވާ ކަމަށް ނިންމާފައެވެ. މި މައްސަލަ އެސެޓް ރިކަވަރީ ކޮމިޝަނަށް ހުށަހެޅީ، މިއީ ފާޅުކަން ބޮޑު ގޮތެއްގައި ކޮރަޕްޝަން ހިމެނޭ މައްސަލައެއް ކަމަށް ވާތީ ކަމަށް ޕީޖީން ބުނެއެވެ.
