ވިލިމާލޭގައި ކުޑަކުދިންގެ ހިޔާގައި ހަމަނުޖެހުން ހިންގާ، ކެއާ ވޯކަރެއް ގައިގައި ރޯކޮށް ނުލާ ކަމަށް ޖެންޑާ މިނިސްޓްރީން ބުނެފިއެވެ.
ޖެންޑާ މިނިސްޓްރީން ރޭ ނެރުނު ބަޔާނެއްގައި ވަނީ ވިލިމާލޭގައި ހުންނަ ކުޑަކުދިންގެ ހިޔާގައި ހިނގައި ދިޔަ ހާދިސާއެއް ކަމަށް ބުނެ ފަތުރަމުން ދަނީ ހަގީގަތެއް ނެތް މައުލޫމާތު ކަމަށެވެ. އެގޮތުން ކުޑަކުދިންގެ ހިޔާގައި ކުޑަދިންތަކެއް ހަމަނުޖެހުން ހިންގާ، ކުޑަކުދިންގެ ހިޔާގެ ކެއާ ވޯކަރެއްގެ ގައިގައި އަލިފާން ރޯކޮށްލާފައިވާ ކަމަށް ބަޔާންކޮށް ސޯޝަލް މީޑިއާގައި ދައުރު ކުރަމުންދާ ވާހަކަ ދޮގު ކޮށްފައެވެ.
ސޯޝަލް މީޑިއާގައި ދައުރުވަމުންދާ މެސެޖުގައި ވާ ގޮތުން ކުޑަކުދިންގެ ހިޔާ މަރާމާތު ކުރުމުގެ ގޮތުން ރަށްރަށަށް ބަދަލު ކުރުމަށް މަސައްކަތް ކުރުމުން އެތަނުގައި ތިބި ކުދިންތަކެއް، އެތަނުގެ މުވައްޒަފުންނާ ހަމަނުޖެހުން ހިންގާފައިވާ ކަމަށެވެ. އަދި މި ހަމަނުޖެހުމުގައި އެތަނުގައި ތިބި ކުދިން މާރާމާރީ ހިންގައި، އެތަނުގެ މުވައްޒަފެއް ގައިގައި ރޯކޮށްލަން މަސައްކަތް ކޮށްފައިވާ ކަމަށް ވެސް އެ މެސެޖުގައި ވެއެވެ.
މިކަމާ ގުޅިގެން ޖެންޑާ މިނިސްޓްރީން ވަނީ ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ ދަށުން ކުއްޖާ ހެދި ބޮޑުވުމަށް ބޭނުންވާ ރައްކާތެރިކަމާއި އަޅާކުން، ކުއްޖާގެ ބެލެނިވެރިންގެ ފަރާތުންނާއި ކުއްޖާގެ އާއިލާގެ ފަރާތުންނާއި، މުޖުތަމައުގެ ފަރާތުންނާއި ދައުލަތުގެ ފަރާތުން ލިބުމަކީ ކޮންމެ ކުއްޖަކަށް ލިބިގެންވާ ހައްގެއް ކަން ބަޔާންކޮށްފައިވާ ކަން ފާހަގަ ކޮށްފައެވެ.
އަދި ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ ދަށުން ކުޑަކުދިންގެ ހައްގުތަކަށް އުނިކަން ލިބޭ ގޮތަށް ވާހަކަ ދެއްކުމާއި، އެ ކުދިންގެ ހައްގުތަކަށް އުނިކަން ލިބޭ ފަދަ ކންކަމަށް ހިތްވަރު ދިނުމަކީ މަނާކަމެއް ކަމަށް ވެސް އެ މިނިސްޓްރީ ވަނީ ފާހަގަކޮށްފައެވެ. އެހެންކަމުން މިފަދައިން އެއްވެސް ފފަރާތަކުން އަމަލުކޮށްފި ނަމަ، އެކަން ތަހުގީގުކޮށް އެކަމުގެ ކުޑަ ބޮޑުމިނަށް ބަލާ، ކުޑަކުދިންގެ ކަރާމާތައް ގެއްލުންވާފަދަ މައުލޫމާތު މީސް މީޑިއާގައި އާންމުކުރާ ނަމަ ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ ދަށުން މިނިސްޓަރަށް ލިބިގެންވާ ބާރުގެ ދަށުން ފިޔަވަޅު އަޅާނެ ކަމަށް ޖެންޑާ މިނިސްޓްރީގެ ބަޔާނުގައި ވެއެވެ.
