ފްލޫ ކްލިނިކްގެ ގަޑި އަށާއި ހުޅުމާލެ ހޮސްޕިޓަލްގެ ހާއްސަ ޑޮކްޓަރުންނަށް ދެއްކުމުގެ އުސޫލަށް ބަދަލު ގެނެސްފިއެވެ.
ހުޅުމާލެ ހޮސްޕިޓަލުން ބުނީ އިއްޔެއިން ފެށިގެން ހުޅުމާލޭގައި ހިންގަމުން އަންނަ ފުލޫ ކުލިނިކް (އޯޓިޒަމް ސެންޓަރާއި ޖެހިގެން ހުންނަ އިމާރާތުގައި ހަދާފައިވާ ކުލިނިކް) ގެ ހިދުމަތް ދޭ ގަޑި ތަކަކީ ކޮންމެ ދުވަހެއްގެ މެންދުރު 2:00 އިން ފެށިގެން ރޭގަނޑު 10:00 އަށް ކަމަށެވެ.
މީގެ އިތުރުން އެ ހޮސްޕިޓަލުގެ ސްޕެޝަލިސްޓް ޑޮކްޓަރުންނަށް ދެއްކުމަށް ނަންނޯޓު ކުރަމުން ދަނީ އެފަރާތަކުން ބޭނުންވާ ސްޕެޝަލިސްޓަކަށް ކަމުން، ބައެއް ޑޮކްޓަރުންގެ ވެއިޓްލިސްޓް ދިގުވެ، ޑޮކްޓަރަށް ދެއްކުމަށް ގިނަދުވަސްތަކެއް މަޑުކުރަން ޖެހޭ މައްސަލައަށް ހައްލެއް ހޯދުމުގެ ގޮތުން، ސްޕެޝަލިސްޓް ޑޮކްޓަރުންނަށް ދެއްކުމަށް ނަންނޯޓް ކުރުމުގެ އުސޫލަށްވެސް ބަދަލު ގެނެސްފައިވާ ކަމަށެވެ.
އެގޮތުން އާދީއްތަ ދުވަހުން ފެށިގެން ވަކި ވަކި ސްޕެޝަލިސްޓުންނަށް ނަންނޯޓު ކުރުމުގެ ބަދަލުގައި ނަންނޯޓް ކުރަމުން ދާނީ ޑިޕާޓްމަންޓް އުސޫލުން ކަމުން، ދައްކަން ބޭނުންވާ ދާއިރާއެއްގެ އެންމެ އަވަހަށް ދެއްކެން އޮތް ޑޮކްޓަރަކަށް ނަންނޯޓް ކުރާ ތަރުތީބުން އެޕޮއިންޓްމަންޓް ހަމަޖައްސާ ދޭނެ ކަމަށް އެ ހޮސްޕިޓަލުން ބުނެއެވެ.
މާލެ ސަރަހައްދުގައި ކޮވިޑް ފެތުރުން މަދުވެފައި ވާއިރު، ސަރުކާރުން އަންނަނީ އާ އާންމު ހާލަތަށް ބަދަލު ވުމަށް ގިނަ މަސައްކަތްތަކެއް ކުރަމުންނެވެ. އެންމެ ފަހުގެ ކޮވިޑްގެ މައުލޫމާތަށް ބަލާއިރު، އިއްޔެ ރާއްޖެއިން ޕޮޒިޓިވް ވެފައިވަނީ ޖުމްލަ 10 މީހުންނެވެ.
