ސްރީލަންކާގެ ވެރިރަށް ކޮޅުނބުގައި ހުންނަ އެގައުމުގެ އެންމެ މަތީ ކޯޓު (ސުޕްރީމް ކޯޓު)ގެ އިމާރާތުގައި އަންގާރަ ދުވަހުގެ ހަވީރުކޮޅު ހިނގި އަލިފާނުގެ ހާދިސާއާ ގުޅޭ ތަހުގީގު، ޖިނާއީ ކުށްތަކުގެ ތަހުގީގުތަކާ ބެހޭ ސްރީލަންކާގެ އިދާރާ (ސީއައިޑީ) އިން ބަލަން ފަށައިފިއެވެ.
ސުޕްރީމް ކޯޓު އިމާރާތުގައި އަލިފާނުގެ ހާދިސާ ހިނގި މައްސަލަ، ސީއައިޑީއިން ބަލަމުން އަންނަ ކަން، ލަންކާ ފުލުހުން ވަނީ އެގައުމުގެ މީޑިއާއަށް ކަށަވަރު ކޮށްދީފައެވެ.
މިހާތަނަށް ލިބިފައިވާ މައުލޫމާތަށް ބަލާއިރު، އަލިފާނުގެ ހާދިސާ ހިނގީ ސުޕްރީމް ކޯޓު އިމާރާތުގައި ކުނި މެނޭޖު ކުރުމުގެ މަސައްކަތް ކުރިއަށްދާ ސަރަހައްދުގައި ކަން ވަނީ އެނގިފައެވެ. އަދި ކޮލަމްބޯ ފަޔާ ބުރިގޭޑާއި ލަންކާ ވައިގެ އަސްކަރިއްޔާގެ މަސައްކަތުން، އަލިފާންގަނޑު ނިއްވާލާފައި ވާ ކަމަށް މައުލޫމާތު ލިބެއެވެ.
އަލިފާނުގެ ހާދިސާއާ ގުޅިގެން ބައެއް މީހުންގެ ބަޔާންވެސް މިހާރު ވަނީ ނަގާފައެވެ. އޭގެ ތެރޭގައި، ކުނި މެނޭޖު ކުރުމުގެ މަސައްކަތާ ހަވާލު ވެފައިވާ ފަރާތްތައް ހިމެނެއެވެ.
ހާދިސާ ހިނގަން މެދުވެރިވި ސަބަބު އަދިވެސް ސާފުވާ ގޮތެއް ނުވެއެވެ. ނަމަވެސް މި ހާދިސާގައި އިމާރަތަށާއި މުދަލަށް އަދި އެއްވެސް ލިޔެކިއުމަކަށްވެސް ގެއްލުން ވެފައި ނުވާކަން، ކަމާ ބެހޭ ފަރާތުން ވަނީ ކަށަވަރު ކޮށްދީފައެވެ.
