އެމްއެމްޕީއާރުސީ ހިޔާނާތް ސާބިތުވެ 5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން، ޑޮކްޓަރަށް ދެއްކެވުމަށް ރާއްޖެއިން ބޭރަށް ވަޑައިގަތުމަށް ފަހު ޖަލަކީ އެކަށީގެންވާ މާހައުލެއް ނޫންކަމަށް ލަފާ ދީއިފިނަމަ ގެޔަށް ބަދަލު ކޮށް ދެއްވާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ޕީއެސްއެމްގެ ދިވެހި ރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމްގައި ވާހަކަ ދައްކަވަމުން އިމްރާން ވިދާޅުވީ، ރައީސް ޔާމީންގެ ބަލި ހާލަތާ ގުޅޭގޮތުން ޑޮކްޓަރުން ދީފައި ވާ ލިޔުމުގައި، ލަފާ ދީފައި ވަނީ ރާއްޖެއިން ބޭރުން ޓެސްޓެއް ހެދުވުމަށާއި، "ސްޓްރެސް ފްރީ" މާހައުލެއްގައި ބެހެއްޓުމަށް ކަމަށެވެ.
އަދި އެކަމާ ގުޅިގެން ރައީސް ޔާމީން ބޭނުންފުޅު ނަމަ މި ސަރަހައްދުން ކޮންމެ ގައުމަކަށް ވަޑައިގެން ވެސް ޑޮކްޓަރަށް ދެއްކެވުމުގެ ފުރުސަތު ދެއްވާފައި ވާނެ ކަމަށާއި ނަމަވެސް ރައީސް ޔާމީން ބޭނުންފުޅު ވީ އެ ފުރުސަތުގެ ބޭނުން ނުކުރައްވާ، ގެކޮޅަށް ބަދަލުވެވަޑައިގަންނަވަން ކަމަށް މިނިސްޓަރު ވިދާޅުވިއެވެ.
އިމްރާން ވިދާޅުވީ ރައީސް ޔާމީނާ ބައްދަލު ކުރައްވައި ރާއްޖެއިން ބޭރަށް ބޭސް ފަރުވާއަށް ވަޑައިގަތުމަށް ފުރުސަތު އޮތް ކަމުގައި ދަންނަވާފައި ވާނެ ކަމަށެވެ. މީގެ އިތުރުން ރައީސް ޔަމީނަށް އިއްވާފައިވާ ޖަލު ހުކުމް ތަންފީޒް ކުރުމަށް އިޖްރާއަތްތަކެއް ހުރި ކަމަށާއި އެ އިޖްރާއަތްތަކުގެ ތެރެއިން ގެއަށް ގެންދަން ޖެހިއްޖެ ނަމަ އެކަން ވެސް ކުރައްވާނެ ކަމަށް ވިދާޅުވެފައެވެ.
އިމްރާން އެފަދައިން ވިދާޅުވެފައި ވާއިރު، ކުރީގެ ނާއިބު ރައީސް އަހުމަދު އަދީބު ޖަލުގެ ބަދަލުގައި ގޭގައި ހުންނެވުމަށް ފުރުސަތު ދެއްވާފައި ވަނީ ކޮން އުސޫލަކުންތޯ އެހުންތެރިއަކު އެހި ސުވާލަށް ޖަބާވު ދެއްވަމުން އިމްރާން ވިދާޅުވީ އަދީބު ގޭގައި ހުންނެވުމަށް ހުއްދަ ދެއްވާފައި ވަނީ އަދީބު ނިދި ކުރައްވަން ޖެހިވަޑައިގަންނަވަނީ ވަކި ހާއްސަ މެޝިނެއްގެ އެހީގައި ކަމަށް ވާތީ ކަމަށެވެ.
އެގޮތުން އަދީބު ނިދިކުރެއްވުމުގައި މައްސަލަތަކެއް ހުންނަކަމަށާއި، ފުއްޕާމެއާއި ގުޅުން ހުރި ނޭވާލުމުގެ މައްސަލަތަކެއް ހުރިކަމަށް ޑޮކްޓަރުން ދީފައިވާ ލިޔެކިއުންތަކުގައި ވާކަމަށް އިމްރާން ފާހަގަ ކުރެއްވިއެވެ. އަދި އަދީބު ނިދިކުރެއްވުމުގައި ވަކި ހާއްސަ މެޝިނެއް ބޭނުން ކުރަންޖެހޭ ކަމަށާއި، އެމެޝިނަކީ ޖަލުގައި ބޭނުން ކުރެވޭނެ މެޝިނަކަށް ނުވާތީ އެކަމަށް ރިޔާއަތްކޮށް އަދީބު ގެއަށް ބަދަލު ކުރެއްވީ ކަމަށް މިނިސްޓަރު އިމްރާން ވަނީ ވިދާޅުވެފައެވެ.
