ކޮރޯނާވައިރަސް ޑިޒީޒް (ކޮވިޑް-19) ޖެހިގެން، ފާއިތުވީ 24 ގަޑިއިރުގެ ތެރޭގައި މެލޭޝިއާއިން 6 މީހެއްގެ ފުރާނަ ގެއްލިފައި ވާ ކަން އެގައުމުން ހާމަކޮށްފިއެވެ.
މިއީ މާޗްމަހަށްފަހު، މި ބަލީގައި މެލޭޝިއާއިން އެންމެ ގިނަ އަދަދަކަށް މަރުގެ ކޭސް ރެކޯޑް ކުރި ދުވަހެވެ.
ފާއިތުވީ 24 ގަޑިއިރުގެ ތެރޭގައި މެލޭޝިއާއިން 354 މީހަކު ކޮވިޑް-19އަށް ޕޮޒިޓިވްވި ކަމަށްވެސް ޚަބަރު ލިބެއެވެ.
ހޯމް ކަރަންޓީނުގައި ހުންނަވައިގެން ކުރިއަށް ގެންދެވި ނޫސްވެރިންގެ ބައްދަލުވުމުގައި މެލޭޝިއާގެ ޑައިރެކްޓާ ޖެނެރަލް އޮފް ހެލްތް ޑރ ނޫރު ހިޝާމް ޢަބްދުﷲ ވިދާޅުވީ، އަލަށް ޕޮޒިޓިވްވި ކޭސްތަކުގެ ތެރެއިން 274 ކޭސް ނިސްބަތް ވަނީ ސަބާހްއަށް ކަމަށެވެ. އަދި ސެލަންގޯ ސަރަހައްދުން 24 ކޭހެއް ފެނިފައި ވާ ކަމަށްވެސް އޭނާ ވިދާޅުވިއެވެ.
ޑރ ނޫރު ހިޝާމް ވިދާޅުވީ ސަބާހްއިން ކޭސް އިތުރުވަމުން ދަނީ، އެ ސްޓޭޓްގެ ޑިސްޓްރިކްޓްތަކުގައި، ސިއްހަތާ ބެހޭ ވުޒާރާއިން ހަލުވި ދުވެލީގައި ސްކްރީނިންގް ކުރިއަށް ގެންދާތީ ކަމަށެވެ.
އެންމެ ފަހުން މެލޭޝިއާއިން ރެކޯޑް ކުރި ކޭސްތަކުގެ ތަފްސީލު ދެއްވަމުން ޑރ ނޫރު ހިޝާމް އިތުރަށް ވިދާޅުވީ އިންޑިއާ އަދި އޮމާންއިން އިމްޕޯޓް ވި 2 ކޭހެއް ފިޔަވާ އެހެން ހުރިހާ ކޭސްތަކަކީ ލޯކަލް ޓްރާންސްމިޝަންއެއް ކަމަށެވެ. ލޯކަލް ޓްރާންސްމިޝަންއެއް ކަމަށް ބުނަނީ، ބަލި ޖެހުނު މަސްދަރު ޓްރޭސް ކުރެވޭ ހާލަތްތަކުގައެވެ.
މެލޭޝިއާގެ މަސްރަހުން ލިބިފައިވާ އެންމެ ފަހުގެ ޖުމުލަ އަދަދުތަކަށް ބަލާއިރު، އެ ގައުމުން ބަލި ޖެހުނު މީހުންގެ އަދަދު ވަނީ 14722 އަށް އަރާފައެވެ. މިވަގުތު 3863 ކޭހެއް އެކްޓިވް ކޭހުގެ ގޮތުގައި ފާހަގަކޮށްފައިވެއެވެ. ކޮވިޑް-19 ޖެހިގެން މެލޭޝިއާއިން މަރުވި މީހުންގެ އަދަދު 152 އަށް އަރައެވެ.
