ސެޕްޓެމްބަރު މަހުގެ 14 ވަނަ ދުވަހު، އިންޑިއާގެ އުއްތަރަޕްރަދޭޝް ސްޓޭޓްގެ ހަތުރާސް ޑިސްޓްރިކްޓްގައި، ގޭންގެ ރޭޕްގެ ޝިކާރައަކަށްވި ކަމަށް ބުނި 19 އަހަރުގެ ޒުވާން އަންހެން ކުއްޖާގެ މައްސަލާގައި ޕޮލީސް ސުޕްރިންޓެންޑެންޓްއާއި، އިތުރު 3 އޮފިސަރަކު ސަސްޕެންޑްކޮށް، އެކުއްޖާ ނިސްބަތްވާ އަވަށަށް ނުވަދެވޭ ގޮތަށް އޮތް އޮތުން، 2 ވަނަ ދުވަހަކަށް ދަންމާލައިފިއެވެ.
ގޭންގް ރޭޕްގެ ޝިކާރައަކަށްވި ކަމަށް ބުނި ކުއްޖާ ވަނީ، 2 ހަފުތާއެއްހާ ދުވަސް ވަންދެން ހޮސްޕިޓަލުގައި ފަރުވާ ހޯދަމުން ދަނިކޮށް، މަރުވެފައެވެ. އޭނާ މަރުވީ، ލިބިފައިވާ އަނިޔާތަކެއްގެ ސަބަބުން ކަމަށް މައުލޫމާތު ލިބެއެވެ.
ޗީފް މިނިސްޓަރު އަދިތްޔަނާތުގެ އަމުރަކަށް، ސަސްޕެންޑްކޮށްފައި ވަނީ ހަތުރާސްގެ ޕޮލީސް ސުޕްރިންޓެންޑެންޓް ވިކްރާންތު ވީރާއި، ހާދިސާ ހިނގި ވަގުތު ޗަންދާ ޕޮލީސް ސްޓޭޝަންގައި ތިބި 3 އޮފިސަރެކެވެ.
މައްސަލަ ބަލަމުންދާ ހާއްސަ ތަހުގީގު ޓީމުން ވަނީ، މި ކޭހުގައި ޝާމިލުވާ ހުރިހާ އެންމެންގެ ޑްރަގް ޓެސްޓު ހެދުމަށާ، ޕޮލީގްރާފް (ދޮގު/ތެދު ވަޒަން ކުރާ) ޓެސްޓު ހެދުމަށް ލަފާ ދީފައެވެ.
ހަތުރާސް ރޭޕް ކޭހުގެ ގޮތުގައި އިންޑިއާގެ މީޑިއާ ނަން ދީފައިވާ މި މައްސަލައަކީ، ރޭޕް ކޭހެއް ނޫންކަމަށް ސާބިތުކޮށްދިނުމަށް އިންޑިއާ ފުލުހުން މަސައްކަތް ކުރާ ކަމުގެ ތުހުމަތުތަކެއް ވަނީ ފެންމަތިވެފައެވެ.
