ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވް ވެގެން އަވަށްޓެރި އިންޑިއާއިން މި ސެޓެމްބަރު މަހުގެ ފުރަތަމަ 12 ދުވަހު ރެކޯޑް ކުރި ކޭސްތަކުގެ އަދަދު 1 މިލިއަނަށްވުރެ މައްޗަށް އަރައިފިއެވެ.
މި މުއްދަތުގެ ތެރޭގައި އިންޑިއާއިން ވަނީ ކޮވިޑް-19 ޖެހިގެން 13082 މީހަކު މަރުވި ކަމަށްވެސް ރިޕޯޓްކޮށްފައެވެ. މުޅި ދުނިޔޭގެ ނިސްބަތުން ބަލާއިރުވެސް ސެޕްޓެމްބަރު މަހު ގައުމަކުން އެންމެ މަތިން މަރުގެ އަދަދުތައް ރެކޯޑް ކުރި ގައުމަކީ އިންޑިއާއެވެ. އިންޑިއާއިން ކޮވިޑް-19 ޖެހިގެން ހޮނިހިރު ދުވަހު 1115 ކޭހެއް ރިޕޯޓްކޮށްފައި ވާއިރު، މިއީ ހާހުގެ އަދަދުތަކުގެ މަތިން އިންޑިއާއިން މަރުގެ ކޭސް ރެކޯޑްކުރި، ވިދިވިދިގެން 6 ވަނަ ދުވަހެވެ.
ހޮނިހިރު ދުވަހު ރިޕޯޓްކުރި 95249 ޕޮޒިޓިވް ކޭހާއިއެކު، މި ސެޕްޓެމްބަރު މަހުގެ ފުރަތަމަ 12 ދުވަހު އިންޑިއާއިން ކޮވިޑް-19 ޖެހުނު މީހުންގެ އަދަދު ވަނީ 1065796 އަށް އަރާފައެވެ. ދުނިޔޭގެ ނިސްބަތުން ބަލާއިރު، އޯގަސްޓް މަހު އެންމެ ގިނަ އަދަދަކަށް ޕޮޒިޓިވް ކޭސް ރެކޯޑް ކުރި ގައުމަކީވެސް އިންޑިއާއެވެ.
މި ހިނގާ ސެޕްޓެމްބަރު މަހުގެ މިހާތަނަށް އިންޑިއާއިން ރެކޯޑް އަދަދަކަށް ކޭސް ރިޕޯޓްކުރީ ހުކުރު ދުވަހުއެވެ. ހުކުރު ދުވަހު އެގައުމުން ވަނީ ގާތްގަނޑަކަށް 98000 ކޭސް ރިޕޯޓްކޮށްފައެވެ. މި ދުވަސްވަރު އިންޑިއާގައި އެންމެ ހަލުވިކަމާއެކު ކޮވިޑް-19ގެ ކޭސް ނަމްބަރުތައް އިތުރު ވަމުންދަނީ ދިއްލީ، ޗަތީޝްގަރު، ހަރްޔާނާ، މަދްޔަ ޕްރަދޭޝް، ޖައްމުއާއި ކަޝްމީރު، ރާޖަކަސްތާނު، ގުޖުރާތު، އުއްތަރަހާންސް އަދި ގޯއާގައެވެ.
