ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ކޮންޓްރޯލް ކުރުމަށް، އަވަށްޓެރި އިންޑިއާއިން އަޅަމުންދާ ފިޔަވަޅުތަކުން ކާމިޔާބީގެ މަންޒިލުގެ އައްސޭރީއާ ހިސާބަށްވެސް އަދި ނުދެވޭ ކަމީ ގަބޫލުކުރަން ޖެހިފައިވާ ހަގީގަތެކެވެ.
ދުނިޔޭގެ ނިސްބަތުން ބަލާއިރު 2 ވަނައަށް އެންމެ ގިނަ އަދަދަކަށް ކޭސް ރެކޯޑް ކޮށްފައިވަނީ އިންޑިއާއިންނެވެ. ބުރާސްފަތި ދުވަހު 96760 ޕޮޒިޓިވް ކޭސް ރެކޯޑް ކުރިއިރު، ރޭ މެންދަމުން ފެށިގެން މިހާތަނަށް 7000 އަށްވުރެ ގިނަ ކޭސް ވަނީ ލޮގް ކޮށްފައެވެ. އިންޑިއާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު 4566726 އަށް އަރައެވެ. މަރުވި މީހުންގެ ޖުމުލަ އަދަދު 76336 އަށް އަރާފައިވާކަމަށް ރެކޯޑްތަކުން ދައްކައެވެ. މަރުގެ ރެކޯޑަށް ބަލާއިރު އިންޑިއާ އުޅެނީ، ދުނިޔޭގެ ނިސްބަތުން 3 ވަނަ ރޭންކިންގްގައެވެ.
ކަން މިހެން އޮތް ނަމަވެސް، އިންޑިއާގެ މޯޓާލިޓީ ރޭޓް، ނުވަތަ ކޮވިޑް-19އަށް ކަށަވަރުވާ ކޮންމެ 100 ކޭހަކުން މަރުވާ ކޭހުގެ ނިސްބަތް އުޅެނީ، ބަލިމަޑުކަން އޭގެ އެންމެ އިންތިހާއާށް ފެތުރިފައިވާ ގައުމުތަކާއި އަޅާ ބަލާއިރު އިންތިހާއަށް ދަށުގައެވެ. މިވަގުތު، އިންޑިއާގެ މޯޓާލިޓީ ރޭޓަކީ 1.7 ޕަސެންޓްއެވެ. ޖޯންސް ހޮޕްކިންސް ޔުނިވާސިޓީގެ ރެކޯޑްތަކަށް ބަލާއިރު، އެމެރިކާގައި މިއަދަދު އުޅެނީ 3 ޕަސެންޓްގައެވެ. އިނގިރޭސިވިލާތުގައި 11.7 ޕަސެންޓް އަދި އިޓަލީވިލާތުގައި 12.6 ޕަސެންޓްގައެވެ.
ނަމަވެސް، އިންޑިއާގެ ބައެއް ސައެންސްވެރިންގެ ދައުވާ ތަފާތެވެ. ބައެއް ސައެންސްވެރިން ބުނާ ގޮތުގައި، ތަފާސް ހިސާބުތައް ފުރިހަމައެއް ނޫނެވެ. އަދި ތަފާސް ހިސާބުތަކުން ދެނީ އޮޅުން އަރާ ފަދަ މެސެޖެކެވެ. މިފަދަ އަދަދުތަކެއްގެ މައްޗަށް ބިނާކޮށް، ގައުމު އަލުން ހުޅުވާލުމާއެކު، މަސްރަހު އިތުރަށް ގޯސްވާނެ ކަމަށްވެސް އެ ފަރާތްތަކުން ވަނީ އިންޒާރު ކޮށްފައެވެ.
އިންޑިއާއިން ކޮވިޑް-19އަށް ޕޮޒިޓިވްވާ މީހުންގެ އަދަދު ރެކޯޑް އަދަދުތަކުން ރިޕޯޓް ކުރަމުންދާއިރު، ބަލީގައި މަރުވާ މީހުންގެ ނިސްބަތް ދަނީ ދަށަށެވެ. ބައެއް ތަޖުރިބާކާރުން ވިދާޅުވާ ގޮތުގައި އިންޑިއާގެ ތަފާސް ހިސާބުތަކުގައި ފޫނުބެދޭ ބާގަނޑުތަކެއް އެބަހުއްޓެވެ. އިންޑިއާގެ އާންމު ސިއްހަތުގެ ނިޒާމަކީ އެކަށީގެންވާ ފަންޑު ނުލިބި، އެތައް އަހަރެއް ވީއިރުވެސް ކުރި ނާރާ އޮތް ދާއިރާއެކެވެ. ގައުމުގައި މަރުވާ މީހުންގެ ތަފާސް ހިސާބުތައް އެންމެ ފުރިހަމައަށް ނުބެހެލެއްޓޭތާވެސް އެތައް އަހަރެއް ވެއްޖެއެވެ. ކޮވިޑް-19ގެ ބަނަ ވިލާގަނޑު ބޯމަތިވުމުގެ ކުރިއަށް ނަޒަރު ހިންގާއިރުވެސް، އިންޑިއާގެ ސަރުކާރުގެ ނިޒާމުގައި މަރުގެ ކޭސްތައް ރެކޯޑް ކުރެވޭ ނިސްބަތް އުޅެނީ 86 ޕަސެންޓްގައެވެ.
އަނެއް ކަމަކީ، ކޮވިޑް-19ގައި މަރުވާ ހުރިހާ ކޭހެއް ތަފާސް ހިސާބުތަކުގައި ނުހިމަނާކަމެވެ. މި ދަންނަވަނީ އެކަށީގެންވާ މިންވަރަށް ޓެސްޓު ކުރުން ފުޅާ ކުރެވިފައި ނެތުމުގެ ސަބަބުން ދޫވެގެންދާ ކޭސްތަކުގެ ވާހަކައެވެ. ޓެސްޓު ކުރާ މިންވަރު އިތުރު ކުރި ކަމުގައި ވީ ނަމަވެސް، އާބާދީގެ ނިސްބަތުން ބަލާއިރު އެންމެ މަދު މިންވަރަކަށް ޓެސްޓު ކުރާ ގައުމުތަކުގެ ތެރޭގައި އިންޑިއާ ހިމެނެއެވެ. މަރުވުމުގެ ކުރިން ކޮވިޑް-19އަށް ޕޮޒިޓިވްވާ މީހަކީ، އޭގެ ކުރިން ލޭ މައްޗަށް ދިއުމާއި، ހަކުރު ބަލި ފަދަ ބައްޔެއްގެ ޕޭޝަންޓެއް ނަމަ، ކޮވިޑް-19 މަރެއްގެ ގޮތުގައި އެ ކޭސް ނުގުނާ، ދޫކޮށްލުމުގެ މައްސަލަވެސް އިންޑިއާގައި އެބައޮތެވެ.
މިފަދަ ގޮތަކަށް ކަންތައްތައް އޮއްވާ، ޓެސްޓު ކުރުން އިތުރު ކުރުމާއެކުވެސް އިތުރު މައްސަލައެއް ފެންމަތިވެއެވެ. މޯޓާލިޓީ ރޭޓް ހިސާބު ކުރަނީ ކޭސް ނަމްބަރުގެ އަދަދަށް ބަލައިގެން ކަމަށް ވާއިރު، ޓެސްޓު ކުރާ ވަރަކަށް ކޭސް ނަމްބަރު އިތުރުވާނެއެވެ. ނަމަވެސް، އެކަށީގެންވާ ގޮތެއްގައި މަރުގެ ރެކޯޑް ނުބެލެހެއްޓޭނަމަ، ނަތީޖާއަކަށް ވާނީ މަރުވާ ނިސްބަތް، ތަފާސް ހިސާބުތަކުން ދަށް ކަމަށް ދެއްކުމެވެ. މީގެ މާނައަކީ، ކޮވިޑް-19ގައި އިންޑިއާއިން މަރުވާ މީހުންގެ އަދަދު ދަށް ވުމެއް ނޫނެވެ. އޯގަސްޓް މަސް ފެށުނު އިރު އިންޑިއާއިން މި ބަލީގައި އާންމުކޮށް ދުވާލެއްގެ މައްޗަށް ރެކޯޑް ކުރަމުންދިޔައީ މަރުގެ 750 ކޭހެވެ. ނަމަވެސް ނިމިދިޔަ ހަފުތާއަށް ބަލާއިރު މި އަދަދު ވަނީ 1000 އަށްވުރެ މައްޗަށް މައްޗަށް އަރާފައެވެ.
އިންޑިއާ ސަރުކާރުން ވަކާލާތު ކުރާ ގޮތުގައި ކޮވިޑް-19ގައި އިންޑިއާއިން މީހުން މަރުވާ އަދަދު ދަށްކޮށް އޮތުމަކީ، ބަލިމަޑުކަން މެނޭޖު ކުރުމުގައި ސަރުކާރުން ގެންގުޅޭ އުސޫލުތަކުގެ ހަރުދަނާ ކަމުގެ ކާމިޔާބީއެކެވެ. ކޮވިޑް-19 ފެތުރުން ކޮންޓްރޯލް ކުރުމަށް، ބަލިމަޑުކަމުގެ ކުރީކޮޅު އިންޑިއާއިން ތަންފީޒު ކުރަން ފެށި ހަރުކަށި ފިޔަވަޅުތަކަށް ލުއިދިނުމަށް ސަރުކާރުން ބޭނުންކުރާ ހުއްޖަތަކަށްވެސް މިކަން އޮތީ ވެފައެވެ.
