ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމަކީ ކިހާ ވަރެއްގެ ނުރައްކާ ކަމެއް ކަން ފެބުރުވަރީ މަހުވެސް އެނގިވަޑައިގެން ހުރެމެ، އެއީ މާ ބޮޑު ކަމެއް ނޫންކަން ދޭހަވާފަދަ މޭރުމަކުން އެމެރިކާގެ ރައީސް ޑޮނާލްޑް ޓްރަމްޕް، މާޗް މަހު އަމަލުފުޅުތައް ބެހެއްޓެވި ގޮތީ "ހަޑި، މުޑުދާރު އަމަލެއް" ކަމަށާއި، އެއީ "ޖިނާއީ ކުށުގެ ދަރަޖައިގެ ޖަރީމާ" އަކާ ގާތްގަނޑަކަށް އެއް ފެންވަރުގެ ޖަރީމާއެއް ކަމަށް، ޑިމޮކްރަޓިކް ރިޔާސީ ކެންޑިޑޭޓް އަދި ކުރީގެ ނައިބު ރައީސް ޖޯ ބައިޑަން ވިދާޅުވެއްޖެއެވެ.
ކޮވިޑް-19އަކީ ކިހާވަރެއްގެ ނުރައްކަލެއް އޮތް، ބިރުވެރި ބަލިމަޑުކަމެއް ކަން ފެބުރުވަރީ މަހުވެސް ޓްރަމްޕަށް އެނގިވަޑައިގެންނެވިކަން ހާމަވެފައިވަނީ، ޓްރަމްޕާ ބެހޭ ގޮތުން ފޮތެއް ލިޔަމުންދާ މުސައްނިފު، ބޮބް ވުޑްވާޑްއާއި ޓްރަމްޕާ ދެމެދު ދެކިވިފައިވާ ވާހަކަތެކއް އާންމު ކުރެވުނު ހިސާބުންނެވެ.
ސީއެންއެންއަށް ދެއްވި ބަސްދީގަތުމެއްގައި މިކަމާ ބެހޭ ގޮތުން ވާހަކަދައްކަވަމުން އެމެރިކާގެ ކުރީގެ ނައިބު ރައީސް ވިދާޅުވީ، ޓްރަމްޕް ކަން ކުރެއްވި ގޮތުން އެތައް ބައެއްގެ ފުރާނަ ގެއްލި ގޮސްފައި ވާ ކަމަށެވެ. ވައިރަސް އުޅޭކަން ޓްރަމްޕް ގަބޫލު ކުރެއްވިކަމަށާ، ނަމަވެސް މާސްކު ބޭނުން ކުރެއްވުމަށް އިންކާރު ކުރެއްވިކަން ބައިޑަން ވަނީ ހަނދާންކޮށްދެއްވަފައެވެ. މީގެ އިތުރުން ޖިސްމާނީ ގައިދުރުކަން ދެމެހެއްޓުން ފަދަ ކަންކަމަށް ޓްރަމްޕް ފަރުވާލެއް ނުބެހެއްޓެވިކަންވެސް ބައިޑަން ވަނީ ފާހަގަކުރައްވާފައެވެ.
ވުޑްވާޑްގެ ފޮތަށް، ޓްރަމްޕް ވަނީ 18 ފަހަރެއްގެ މަތިން ބަސްދީގަތުން ދެއްވާފައެވެ. އޭގެ ތެރޭގައި ފެބުރުވަރީ 7 ވަނަ ދުވަހު ދެއްވި ބަސްދީގަތުމެއްގައި ޓްރަމްޕް ވަނީ، މިއީ (ކޮވިޑް-19 އަކީ) "މަރުގެ އެތިފަހަރެއް" ކަން ދޭހަވާފަދަ ރޫހެއްގައި ވާހަކަފުޅުދައްކަވާފައެވެ. ނަމަވެސް، މާޗް މަހުގެ 19 ވަނަ ދުވަހު ދެއްވި ބަސްދީގަތުމުގައި ޓްރަމްޕް ވަނީ، މިކަން މާ ބޮޑު ކަމަކަށް ހައްދަވަން ބޭނުންފުޅު ނުވާކަމަށް ވިދާޅުވެފައެވެ.
ކޮވިޑް-19އަކީ މާ ބޮޑު ކަމަކަށް ނުހެދުމަށް ޓްރަމްޕް ނިންމެވީ، ހިއްސާގެ ބާޒާރު އިނދަޖެހުނަ ނުދިނުމަށް ކަމަށާ، އެއީ ޓްރަމްޕްގެ އަރިސް އެކުވެރިންނަށް ފައިސާތަކެއް ގެއްލުނަ ނުދިނުމަށް ކުރެއްވި ކަމެއް ކަމަށާ، މިކަމުގައި ޓްރަމްޕްގެ އަތެއް ނުވާނެ ކަމަށްވެސް އޭނާއަށް ވިދާޅުވުމުގެ ފުރުސަތު އެބައޮތް ކަމަށް ބައިޑަން ވަނީ ތުހުމަތު ކުރައްވާފައެވެ.
ނަމަވެސް ޓްރަމްޕް ވިދާޅުވާ ގޮތުގައި ކޮވިޑް-19އާއި ގުޅިގެން އެފަދަ ގޮތަކަށް އަމަލު ކުރެއްވީ، ހާސްކަމެއްގެ ތެރެއަށް ގައުމު ވައްޓާލަން ބޭނުންފުޅު ނުވާތީކަމަށެވެ. އިތުބާރު ދަމަހައްޓަން ބޭނުންފުޅު ވިކަމަށާ، އެމެރިކާއިން މިހާތަނަށްވެސް ކަން ކުރަމުން އައިސްފައިވަނީ "ވަރަށް ރަނގަޅަށް" ކަމަށް ޓްރަމްޕް ވަނީ ވިދާޅުވެފައެވެ. ދުނިޔޭގެ އެހެން ގައުމުތަކާ އަޅާ ބަލާއިރު އެމެރިކާގެ ނަމްބަރުތަކުން ނޭދެވޭ މެސެޖެއް ނުދޭ ކަމަށާ، ނަމަވެސް، ބަލިމަޑުކަން ކޮންޓްރޯލް ކުރުމަށް އެމެރިކާގެ އޮފިޝަލުން ކުރައްވަމުން ގެންދަވާ ބުރަ މަސައްކަތްތަކަށް މީޑިއާއިންވެސް އެކަށީގެންވާ ތައުރީފެއް ނުކުރާކަމުގެ ޝަކުވާ، ޓްރަމްޕް ވަނީ އުފުއްލަވާފައެވެ.
ވުޑްވާޑަށް ޓްރަމްޕް ދެއްވި ބަސްދީގަތުންތަކެއް އާންމުވެފައި މިވަނީ، ނޮވެމްބަރު މަހުގެ 3 ވަނަ ދުވަހު އެމެރިކާގައި އޮންނަ ރިޔާސީ އިންތިހާބުގެ ކުރިން، ކުރިއަށް ގެންދިއުމަށް ތާވަލު ކޮށްފައިވާ ރިޔާސީ ބަހުސްގައި، ބައިޑަންއާއި ޓްރަމްޕްގެ ފުރަތަމަ ގަދަހިފުމަށް އެންމެ 3 ހަފުތާއެއްހާ ދުވަހަށް ވެފައި ވަނިކޮށެވެ.
