ބައިނަލްއަގުވާމީ ޕޯޑިއަމްއެއްގައި "ރޭޕް" މި ލަފުޒު ބުނާއެކު ގިނަ ބަޔަކަށް ބޭ އިހުތިޔާރުގައި ނަމަވެސް އިއްތިފާގުވެވޭނެ އެއް ގައުމަކީ އިންޑިއާއެވެ. ސަބަބެއް ނެތިއެއް ނޫނެވެ. އިންޑިއާއަކީ އަހަރެއްގެ މައްޗަށް އެތައް ހާސް ރޭޕް ކޭހެއް ރެކޯޑް ކުރަމުންދާ ގައުމެކެވެ. އަދި މި ވަރުން ނިމުނީކީ ނޫނެވެ. އިންޑިއާއިން އަންނަ ރޭޕްގެ އަޑުތަކަކީ، އެ ޚަބަރެއްގެ އަޑު އަހައިފި މީހަކަށް ސިހުން ގެނުވަނިވި، ބިރުވެރި ޚަބަރަކަށްވެސް ވެދެއެވެ.
މިއީވެސް އެފަދަ ކަމެކެވެ. ވެރިރަށް ނިއުދިއްލީގެ ފުލުހުން މިހާރު ވަނީ، ރޭޕްގެ ޖަރީމާ ހިންގި ކަމުގެ ކުށުގައި، އުމުރުން 30 ގެ އަހަރުތައް ގުނަމުންދާ ޒުވާނަކު ހައްޔަރު ކޮށްފައެވެ. އޭނާގެ ހަމަލާގެ ޝިކާރައަކަށް ވީ، އުމުރުން 86 އަހަރުގެ މާމައެކެވެ.
ދިއްލީ ކޮމިޝަން ފޮ ވިމެންގެ އިސްވެރިޔާ ސްވާތީ މަލިވާލް ވިދާޅުވީ، ހޯމަ ދުވަހުގެ އިރާކޮޅުގެ ވަގުތެއްގައި، ގޭ ދޮރުމަތީގައި މާމަ މަޑުކޮށްލައިގެން އިނީ، ކިރު ހިފައިގެން އަންނަ މީހާގެ އިންތިޒާރުގައެވެ. ރޭޕްގެ ހަމަލާގެ ޝިކާރައަކަށްވީ އެ ވަގުތުއެވެ. އާންމުކޮށް ކިރު ހިފައިގެން އަންނަ މީހާއަށް އެދުވަހު ނާދެވޭ ކަމަށާ، ނަމަވެސް ކިރު ލިބޭނެ އެހެން ތަނަކަށް މާމަ ގެން ގޮސްދޭނެ ކަމަށް ޒުވާނާ ބުނި ކަމަށް މަލިވާލް ވިދާޅުވިއެވެ.
ޒުވާނާއަށް އިތުބާރުކޮށް، މާމަ ހިނގައިގަތީ ކަމަށާ، އެ ޒުވާނާ އެ މާމަ ގެންދިޔައީ ކައިރީގައި އޮތް ދަނޑުބިމުގެ ސަހަރައްދަކަށް ކަމަށް މައުލޫމާތު ލިބެއެވެ. ޒުވާނާގެ މުޑުދާރު އަމަލުތަކުގެ ޝިކާރައަކަށް އެ މާމަ ހަދާލީ އެތަނުގައެވެ.
"އެހެން ނެހެދުމަށް އެދި މާމަ ރޮއި އާދޭސްކުރި. އެއީ އެ ޒުވާނާގެ މާމަ އުމުރުގެ މީހެއް ކަމަށް ބުނަމުންދިޔަ. ނަމަވެސް އެކަމަށް ޒުވާނާ ދިނީ ބީރު ކަންފަތެއް. ނަފުސު ދިފާއުކުރަން މާމަ މަސައްކަތް ކުރުމުން، އިހާނެތި އަނިޔާތަކަކާ ޒަހަމްތަކެއް ދީފަ ހުރީ" މަލިވާލް ވިދާޅުވިއެވެ.
ރޭޕްގެ ޝިކާރައަކަށްވި މާމަ ސަލާމަތް ކޮށްދިނީ އެސަރަހައްދުން ދިޔަ ބަޔަކަށް، ރުއިމުގެ އަޑު އިވިގެންނެވެ. ރޭޕިސްޓު ފުލުހުންނާ ހަވާލުކުރީވެސް އެމީހުން ކަމަށް ޚަބަރު ލިބެއެވެ.
"މާމަ މިހާރު އިން ހާލު ފެނިފަ ހިތް ފަޅައިގެންދޭ. ދެ އަތުގައި ރޫ ޖެހިފައިވާ އެ މާމަގެ މުޅި މޫނާއި ހަށިގަނޑުގައި ޒަހަމްތައް އެބަހުރި. މާމަ ކިޔައިދިން ގޮތުގައި އޭނާގެ ކުރިމަތީފަރާތުން ލޭވެސް އައި" މަލިވާލް ތަފްސީލުކޮށްދެއްވިއެވެ.
މި ޖަރީމާ ހިންގި މީހަކީ އިންސާނެއް ނޫން ކަމަށް ވިދާޅުވެ، މަލިވާލް ވަނީ އޭނާގެ މައްޗަށް މަރުގެ ހުކުމް އިއްވުމަށް ގޮވާލައްވާފައެވެ.
އިންޑިއާގެ އިދިކޮޅުގައި ހުންނެވި ދުވަސްވަރު، ދިއްލީއަކީ "ރޭޕްގެ ވެރިކަން ކުރާ ސިޓީ" ކަމަށް ވިދާޅުވި މިހާރުގެ ބޮޑުވަޒީރު ނަރޭންދްރާ މޯދީގެ ވެރިކަމުގައިވެސް، އިންޑިއާގެ ރޭޕްގެ "ސަގާފަތް" އުވާލުމަށް އެކަށީގެންވާ މަސައްކަތްތަކެއް ކުރެވޭތީއެއް ނުފެނެއެވެ.
