ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަން ކޮންޓްރޯލް ކުރުމަށް، އާންމު ދަތުރުފަތުރުތައް މެދުކަނޑާލުމަށް އެޅި ހަރުކަށި ފިޔަވަޅުތަކާއެކު 5 މަސް ދުވަހަށް ފަހު، އިންޑިއާއިން މެޓްރޯ ރޭލުގެ ހިދުމަތް ދޭން ފަށައިފިއެވެ.
އިންޑިއާއިން މިއަދު މެޓްރޯ ރޭލުގެ ހިދުމަތް އަލުން ދޭން ފަށާފައި ވާ މި ދަނޑިވަޅަކީ، ކޮވިޑް-19ގެ ކޭސްތައް އެންމެ ގިނަ އަދަދަކަށް ރެކޯޑް ކުރަމުންދާ ގައުމުތަކުގެ ލިސްޓުގެ 2 ވަނައަށް އެ ގައުމު އަރާފައިވާ ދަނޑިވަޅެކެވެ. އެ މަގާމުގައި ކުރިން އޮތް ބްރެޒިލް ވައްޓާލުމަށްފަހު، އެމެރިކާގެ ފަހަތުން، ކޭސް ނަމްބަރު ދެން އެންމެ ގިނަ ގައުމުގެ މަގާމަށް އިންޑިއާ އެރީ އާދީއްތަ ދުވަހުގެ ވަގުތެއްގައެވެ.
ދުވާލެއްގެ މައްޗަށް މެދު ނުކެނޑި ރެކޯޑް އަދަދަކަށް ކޭސް ރިޕޯޓް ކުރަމުންދިޔަ ކަމުގައި ވީ ނަމަވެސް، އިންޑިއާއިން މެޓްރޯލް ރޭލުގެ ހިދުމަތްތައް ފަށާފައިވަނީ "އަންލޮކް-4" އޮޕަރޭޝަންގެ ދަށުން، ގައުމު ހުޅުވާލުމަށް އިންޑިއާގެ ސަރުކާރުން އޯގަސްޓް މަހުގެ 29 ވަނަ ދުވަހު އިއުލާންކުރި ތާވަލުގެ ދަށުންނެވެ.
މިއަދު އޮޕަރޭޝަންތައް ފަށަން ހަމަޖެހިފައި އޮތީ ދިއްލީ، ނޮއިޑާ، ޗެންނާއީ، ކޯޗީ، ބެންގަލޫރު، ޖައިޕޫރު، ހައިދަރުއާބާދު، ގުޖުރާތު، ކަލްކަޓާ އަދި ލަކްނޯގެ މެޓްރޯ ރޭލު ހިދުމަތް ކަމަށް މައުލޫމާތު ލިބެއެވެ. އަދި ސެޕްޓެމްބަރު 12 ވަނަ ދުވަސް އަންނައިރު، ފުލް ކެޕޭސިޓީގައި މެޓްރޯ ރޭލުގެ ހިދުމަތް ދިނުމަށް އިންޑިއާއިން އޮތީ އަމާޒު ހިފާފައެވެ.
ވިޔަފާރި މަރުކަޒު އަދި ކޮވިޑް-19ގެ ނުރައްކާ އެންމެ ބޮޑުވެފައިވާ މަހާރާޝްތްރާ ސްޓޭޓްގައި، އޮކްޓޯބަރު މަހުގެ ނިޔަލަށް މެޓްރޯ ރޭލުގެ ހިދުމަތް މެދުކަނޑާލާފައި ބޭއްވުމަށް ނިންމާފައި ވާ ކަމަށް، ހައުސިންގް އެންޑް އާބަން އެފެއާޒް މިނިސްޓްރީއިން ވަނީ ހާމަކޮށްފައެވެ.
މެޓްރޯ ރޭލުގެ ހިދުމަތް އަލުން ފަށާފައިވަނީ ހަރުކަށި ފިޔަވަޅުތަކަކާއެކުގައެވެ. ހުރިހާ ވަގުތެއްގައި ފޭސްމާސްކު ބޭނުން ކުރަން ލާޒިމުކޮށްފައި ވާއިރު، ދަތުރު ކުރުމުގެ ހުއްދަ އޮންނަނީ ހަށިގަނޑުގެ ބޭރުފުށުން ބަލީގެ އެއްވެސް އަލާމާތެއް ނުހުންނަ ފަސެންޖަރުންނަށެވެ. މީގެ އިތުރުން، ބަލި ފެތުރުން ވީހާވެސް ބޮޑަކަށް ކޮންޓްރޯލް ކުރުމަށްޓަކައި ނަގުދު ފައިސާގެ މުއާމަލާތްތަކާ ދުރުވުމަށްވެސް ވުޒާރާއިންވަނީ އިލްތިމާސް ކޮށްފައެވެ.
އިންޑިއާގެ އަދުގެ ހާލަތަށް ބަލާއިރު، ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު 4208645 އަށް ވަނީ އަރާފައެވެ. މި ބަލީގައި އިންޑިއާއިން މަރުވި މީހުންގެ އަދަދު 71711 އަށް އަރާ ކަމަށްވެސް ރެކޯޑްތަކުން ދައްކައެވެ.
