ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް 2 ވަނައަށް އެންމެ ގިނަ އަދަދަކަށް ރިޕޯޓްކުރި ގައުމަކަށް، އަވަށްޓެރި އިންޑިއާ ވެއްޖެއެވެ.
ލިސްޓުގެ 2 ވަނަ މަގާމުގައި ކުރިން އޮތް ބްރެޒިލް، 3 ވަނައަށް ވައްޓާލުމަށްފަހު، އެމެރިކާގެ ފަހަތުން އިންޑިއާ ލިސްޓު ކޮށްފައި މިވަނީ، ރޭ މެންދަމު 00:00 އިން ފެށިގެން މިވަގުތާ ހިސާބަށް ޕޮޒިޓިވްވި 86724 ކޭހާއި އެކުގައެވެ. މިއާއެކު، މިހާތަނަށް އިންޑިއާއިން ކޮވިޑް-19 ޖެހުނު މީހުންގެ އަދަދު ވަނީ 4197563 އަށް އަރާފައެވެ. ބްރެޒިލްއިން ކޮވިޑް-19އަށް ޕޮޒިޓިވްވެފައި ވަނީ 4123000 ކޭހެކެވެ.
އިންޑިއާއިން ކޮވިޑް-19 ޖެހުނު މީހުންގެ ތެރެއިން މިއަދު 1060 މީހެއްގެ ފުރާނަ ގެއްލިފައިވާކަމަށް ރެކޯޑްތަކުން ދައްކައެވެ. މިއާއެކު އިންޑިއާއިން މި ބަލީގައި މަރުވި މީހުންގެ އަދަދު ވަނީ 71739 އަށް އަރާފައެވެ. އިންޑިއާގައި މިވަގުތު އެކްޓިވް ކޭހުގެ ގޮތުގައި 883071 ކޭހެއް ފާހަގަކޮށްފައިވެއެވެ.
އިންޑިއާއިން ކޮވިޑް-19އަށް ޕޮޒިޓިވްވި މީހުންގެ ތެރެއިން 3242753 މީހަކަށް ޝިފާ ލިބި، ރަނގަޅުވެފައިވާކަމަށް ތަފާސް ހިސާބުތަކުން ދައްކައެވެ.
