ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަން ފެށުން ފަހުން އިންޑިއާއިން މިހާތަނަށް އެންމެ ގިނަ އަދަދަކަށް ޕޮޒިޓިވް ކޭސް ރިޕޯޓްކުރި ދުވަހަކަށް ހުކުރު ދުވަސް ވެއްޖެއެވެ.
އިންޑިއާގެ ސިއްހަތާ ބެހޭ ވުޒާރާއިން މިއަދު ހާމަ ކުރި ގޮތުގައި، ހުކުރު ދުވަހު އެ ގައުމުން 86432 ކޭސްއެއް ވަނީ ފެނިފައެވެ. މިއާއެކު އިންޑިއާއިން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 4 މިލިއަނަށް އަރާފައެވެ.
މިއީ 80000 އަށްވުރެ މަތިން އިންޑިއާއިން ޕޮޒިޓިވް ކޭސް ރެކޯޑް ކުރަމުންދާތާ، ވިދިވިދިގެން 3 ވަނަ ދުވަހެވެ.
އިންޑިއާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު މިހާރު ވަނީ 4023179 އަށް އަރާފައެވެ. 846321 އެކްޓިވް ކޭސް ރެކޯޑް ކޮށްފައިވާއިރު، 3107223 މީހަކަށް ޝިފާ ލިބި، ރަނގަޅުވެފައިވާކަމަށް ތަފާސް ހިސާބުތަކުން ދައްކައެވެ.
ކޮވިޑް-19 ޖެހިގެން އިންޑިއާއިން އިއްޔެ 1066 މީހެއްގެ ފުރާނަ ގެއްލިފައިވާއިރު، އެ ގައުމުން މި ބަލީގައި މަރުވި މީހުންގެ ޖުމުލަ އަދަދު ވަނީ 69635 އަށް އަރާފައެވެ.
ކޮވިޑް-19ގެ ބަލިމަޑުކަން ފެތުރިފައިވާ ގޮތަށް ބަލާއިރު، ކޭސް އަދަދުގެ ގޮތުން އިންޑިއާގެ ކުރިއަށް ލިސްޓުގައި އޮތީ 6.389 މިލިއަން ކޭސް ރެކޯޑް ކޮށްފައިވާ އެމެރިކާއާއި 4.091 މިލިއަން ކޭސް ރެކޯޑް ކޮށްފައިވާ ބްރެޒިލްއެވެ.
