ރަޝިއާގެ އިދިކޮޅު ލީޑަރު އެލެކްސީ ނަވާލްނީއަށް ވިހައެއް ދީފައިވާ ކަމަށް ޝައްކު ނުއުފެއްދޭ މިންވަރަށް ސާބިތު ހެކި ލިބިފައި ވާ ކަމަށް، އޭނާއަށް މިވަގުތު ފަރުވާ ދެމުންދާ ޖަރުމަނުވިލާތުން ބުނެފައި ވާއިރު، ރަޝިއާއާއި ދެކޮޅަށް އެކަށީގެންވާ ހަރުކަށި ފިޔަވަޅުތަކެއް އެޅުމުގެ ފުރިހަމަ ހައްގު، އެ އިއްތިހާދަށް ލިބިގެން ވާ ކަމަށް، ޔޫރަޕިއަން ޔޫނިއަން (އީޔޫ) އިން ބުނެފިއެވެ.
ވިލާތުގެ އިއްތިހާދުގެ ހާރިޖީ ސިޔާސަތުތަކާ ބެހޭ އިސްވެރިޔާ ޖޯސެފް ބޮރެލް ވަނީ، ވިހަކޮށްލި ހާދިސާއާ ގުޅިގެން ބައިނަލްއަގުވާމީ ފެންވަރުގައި ހިންގާ ތަހުގީގަށް، ރަޝިއާއިން ފުރިހަމަ އެއްބާރުލުން ދިނުމަށް، އެ ގައުމަށް ގޮވާލައްވާފައެވެ. ބޮރެލް ވިދާޅުވީ، ކެމިކަލް ހަތިޔާރު ބޭނުން ކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށާ، މިފަދަ ކަމެއް ކުރުމަކީ ބައިނަލްއަގުވާމީ ގާނޫނުތަކާ، އިންސާނީ ހައްގުތަކުގެ މިންގަނޑުތަކާވެސް ހިލާފު އަމަލެއް ކަމަށެވެ.
ބޮރެލް އިތުރަށް ވިދާޅުވީ، ހާދިސާގެ ފުރިހަމަ ތަހުގީގެއް ހިންގާ، ދެފުށް ފެންނަ އުސޫލަކުން މިކަން ކުރެވެން އޮތްހާ މަސައްކަތެއް ރަޝިއާއިން ކުރަންޖެހޭ ކަމަށެވެ. މިއީ އަދަބު ނުދީ ދޫކޮށްލެވޭނެ ވަރުގެ ކަމެއް ނޫން ކަމަށެވެ.
ނަވާލްނީއަށް ފަރުވާ ދެމުންދާ ޖަރުމަނުވިލާތުން ބުނާ ގޮތުގައި އޭނާ ވަނީ ނޯވިޗޯކްއަށް ހުށަހެޅިފައެވެ. ނަމަވެސް ރަޝިއާ ސަރުކާރުގެ ތަރުޖަމާނު، ޑިމިޓްރީ ޕެސްކޯފް ވިދާޅުވީ، މިކަމާ ބެހޭ އެއްވެސް ހެއްކެއް، ޖަރުމަނުވިލާތުން ހުށަހަޅާފައި ނުވާ ކަމަށެވެ.
ޕެސްކޯފް އިތުރަށް ވިދާޅުވީ، ރަޝިއާގެ ދައުލަތަށް ތުހުމަތު އަމާޒު ކުރުމުގެ ބޭނުމެއް ނެތް ކަމަށެވެ.
ސައިބީރިއާގެ ވައިގެ ސަރަހައްދުން ދަތުރުކުރަމުން ދަނިކޮށް ކުއްލި ގޮތަކަށް ސިއްހީ ހާލު ދެރަވި ނަވާލްނީ ޖަރުމަނުވިލާތަށް ބަދަލުކޮށް ފަރުވާ ދެމުންދާއިރު، އެނާ އަދިވެސް އޮތީ އައިސީޔޫގައި، ވެންޓިލޭޓަރުގައި ކަމަށް ޚަބަރު ލިބެއެވެ. ނަވާލްނީގެ ސަޕޯޓަރުން ބުނާ ގޮތުގައި، ސިއްހީ ހާލު ދެރަވި ފްލައިޓްގައި ދަތުރު ފެށުމުގެ ކުރިން، އެއާޕޯޓްގައި އޭނާ ވަނީ ސައިތައްޓެއް ބޮއެފައެވެ. އޭނާގެ ބައެއް ސަޕޯޓަރުން ގަބޫލުކުރާ ގޮތުގައި ވިހަލާފައިވަނީ އެ ސައިތައްޓަށެވެ. ރަޝިއާގައި ނަވާލްނީއަށް ފަރުވާ ދިން ޑޮކްޓަރުން ވަނީ، އޭނާގެ ހަށިގަނޑަށް ވިހަލާފައިވާކަމުގެ އަސަރެއް ނެތް ކަމަށް ބުނެފައެވެ.
