ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވް ވެގެން މިއަދުވެސް އިންޑިއާއިން ރެކޯޑް އަދަދަކަށް ކޭސްތައް ރިޕޯޓްކޮށްފިއެވެ.
އިންޑިއާގެ ސިއްހަތާ ބެހޭ ވުޒާރާއިން ހާމަކޮށްފައި ވާ ގޮތުގައި އެގައުމުން މިއަދުވެސް 78903 މީހަކު ޕޮޒިޓިވްވެ، 1045 މީހެއްގެ ފުރާނަވަނީ ގެއްލިފައެވެ. މިއާއެކު، އިންޑިއާއިން ބަލިޖެހުނު މީހުންގެ ޖުމުލަ އަދަދު 3770069 އަށް އަރާ، މަރުވި މީހުންގެ އަދަދު 66333 އަށް މިވަނީ އަރާފައެވެ.
މިވަގުތު އެކްޓިވް ކޭހުގެ ގޮތުގައި އިންޑިއާއިން ރެކޯޑް ކޮށްފައި ވަނީ 801282 ކޭހެކެވެ. މިއީ އިންޑިއާއިން މިހާތަނަށް އެކްޓިވް ކޭސް ރެކޯޑް ކުރި އެންމެ މަތީ އަދަދުވެސް މެއެވެ.
ކަންމިހެން އޮތް ނަމަވެސް، އިންޑިއާ ސަރުކާރުން މިއަދު ކުރި ޓްވީޓެއްގައި ބުނެފައިވަނީ، ލޮކްޑައުންގެ ހަރުކަށި އަމުރުތައް ތަންފީޒު ކުރަން ފެށިފަހުން އެ ގައުމުން ބަލިޖެހޭ މީހުން ރަނގަޅުވަމުން އަންނަ ނިސްބަތް ހެޔޮ ފާލަކަށް އެޅެމުން އަންނަ ކަމަށެވެ. އެގޮތުން އިންޑިއާގެ ރިކަވަރީ ރޭޓް މިހާރު އުޅެނީ 76.98 ޕަސެންޓްގައި ކަމަށްވެއެވެ.
ކޭސްތައް އިތުރު ވަމުން ދިޔަ ނަމަވެސް، އިންޑިއާއިން ވަނީ "އަންލޮކް-4"ގެ މަރުހަލާ އިއްޔެ ފަށާފައެވެ. މިއީ ލޮކްޑައުންގެ ހަރުކަށި އަމުރުތަކަށް ލުއި ދިނުމުގެ ތެރެއިން ގައުމު އަލުން ހުޅުވާލުމަށް އަޅަމުންދާ ފިޔަވަޅުތަކުގެ މަރުހަލާއެކެވެ. އެގޮތުން، މެޓްރޯ ރޭލުގެ ހިދުމަތްތައް ސެޕްޓެމްބަރު 7ގައި ފަށަން ހަމަޖެހިފައިވާއިރު، އާންމު އެއްވުންތަކަށް ސެޕްޓެމްބަރު 21ގައި ފުރުސަތު ދިނުމަށް ވަނީ ކަނޑާއަޅާފައެވެ. މި ކަން ތަންފީޒު ކުރުމަށް ހަމަޖެހިފައިވަނީ ކަނޑައެޅިފައިވާ ވަކި އުސޫލުތަކެއްގެ ދަށުންނެވެ.
