ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވި ކަން އިއުލާން ކުރައްވާފައިވާ އިންޑިއާގެ ކުރީގެ ރައީސް ޕްރަނާބު މުކަރުޖީގެ ސިއްހީ ހާލުކޮޅު ދެރަވަމުން އަންނަ ކަމަށް، އޭނާއަށް ފަރުވާ ދެމުންދާ އަސްކަރިއްޔާގެ ރިސާޗް އެންޑް ރެފަރަލް ހޮސްޕިޓަލުން ބުނެފިއެވެ.
އުމުރުފުޅުން 84 އަހަރުގެ ޕްރަނާބަށް ފަރުވާ ދެމުންދާ ޑޮކްޓަރުންގެ ސްޕެޝަލިސްޓު ޓީމުން މައުލޫމާތު ދޭ ގޮތުގައި، މިވަގުތު އޭނާ އޮތީ ކޯމާއެއްގައެވެ. އަދި ފަރުވާ ދެމުންދަނީ ވެންޓިލޭޓަރުގެ އެހީގައެވެ.
ޕްރަނާބުގެ ސިއްހީ ހާލުކޮޅު ދަށަށް ދާން ފަށަފައިވަނީ، ފުއްޕާމޭގެ އިންފެކްޝަނަކާ ގުޅިގެން، ސެޕްޓިކް ޝޮކެއް އައިސްގެން ކަމަށް ޚަބަރު ލިބެއެވެ.
ޕްރަނާބު ހޮސްޕިޓަލުގައި އެޑްމިޓް ކުރެވުނީ ނިމިގެން މިދާ އޯގަސްޓް މަހުގެ 10 ވަނަ ދުވަހުއެވެ. އަދި ހަމަ އެދުވަހު އޭނާގެ ސިކުނޑީގެ ސާޖަރީއެއް ހެދިއެވެ. އެއީ ސިކުނޑީގައި ގަނޑުވެފައިވާ ލޭކޮޅެއް ނެގުމަށް ކަމަށް މައުލޫމާތު ލިބެއެވެ. ފުއްޕާމޭގެ އިންފެކްޝަން އުފެދުނީ އޭގެ ފަހުން ކަމަށް ޚަބަރު ލިބެއެވެ.
އިންޑިއާގެ 13 ވަނަ ރައީސްގެ ގޮތުގައި ޕްރަނާބު މުކަރުޖީ އެ ގައުމަށް ހިދުމަތް ކުރެއްވީ 2012 އިން 2017 ވަނަ އަހަރުގެ ނިޔަލަށް ހަމަވި ދައުރުގައެވެ.
