އެމެރިކާގެ ވިސްކޮންސިންގައި ދިރިއުޅެމުންދިޔަ ކަޅު ނަސްލުގެ ޖޭކަބް ބްލޭކް ޖޫނިއާއަށް ފުރަގަހުން ބަޑީގެ ހަމަލާތަކެއް ދީ، ސީރިއަސް ހާލަތަށް އޭނާ ވައްޓާލި ފުލުސް އޮފިސަރުގެ ވަނަވަރު ހާމަކޮށްފިއެވެ.
ވިސްކޮންސިންގެ އެޓާނީ ޖެނެރަލް ޖޯޝް ކޯލް ވިދާޅުވީ، ބްލޭކް ޖޫނިއާއަށް ހަމަލާ ދިން ރަސްޓަން ޝެސްކީ، 7 ފަހަރެއްގެ މަތިން ބަޑި ޖެހި ކަމަށާ، އޭނާ އެކަން ކުރީ، ޖޭކަބް ޖޫނިއާ ކާރަށް އަޅަން އުޅުނު ވަގުތު، ފުރަގަހުން ކަމަށެވެ.
ދާހިލީ ހަމަނުޖެހުމެއްގެ ރިޕޯޓް ލިބިގެން ސީންއަށް ދިޔަ ފުލުހުން ބްލޭކް ޖޫނިއާ ހައްޔަރު ކުރުމަށް ފުރަތަމަ މަސައްކަތް ކުރީ ޓޭޒާ ބޭނުން ކޮށްގެން ކަމަށާ، ނަމަވެސް ބްލޭކް ޖޫނިއާ ކާރުގެ ދޮރު ހުޅުވުމުން، އޭނާއަށް ބަޑީގެ ހަމަލާތައް ދިނީ ކަމަށްވެއެވެ. އެޓާނީ ޖެނެރަލް ވިދާޅުވި ގޮތުގައި، ޝެސްކީ ފިޔަވާ އިތުރު އޮފިސަރަކު ބަޑީގެ ހަމަލާ ދީފައެއް ނުވެއެވެ.
ފުލުހުން ހިންގި ތަހުގީގުން ބްލޭކް ޖޫނިއާގެ ކާރުން ވަޅިއެއް ފިޔަވާ އިތުރު އެއްވެސް ހަތިޔާރެއް ފެނިފައި ނުވާކަމަށް މައުލޫމާތު ލިބެއެވެ. ފުލުހުންގެ ލާއިންސާނީ އަނިޔާތައް ބްލޭކް ޖޫނިއާއަށް އަމާޒުވަމުންދިޔައިރު، އޭނާގެ ދަރިންވެސް ކާރު ތެރޭގައި ތިބި ކަމަށް މައުލޫމާތު ލިބެއެވެ.
ބްލޭކް ޖޫނިއާއަށް ދިން އަނިޔާތަކާ ގުޅިގެން ވިސްކޮންސިންގައި ވަރުގަދަ މުޒާހަރާތަކެއް ފަށާފައިވާއިރު، މުޒާހަރާތައް ހޫނުވެ، 2 މީހެއްގެ ފުރާނަ ގެއްލި، އިތުރު ބަޔަކު ޒަހަމްވެފައިވާކަމަށް ޚަބަރު ލިބެއެވެ. މި ހާދިސާއާ ގުޅިގެން 17 އަހަރުގެ ކުއްޖެއް ހައްޔަރު ކޮށްފައިވާކަމަށް މައުލޫމާތު ލިބެއެވެ.
ބްލޭކް ޖޫނިއާއަށް އަދިވެސް ދަނީ ހޮސްޕިޓަލުގައި ފަރުވާ ދެމުންނެވެ. އޭނާގެ ހޭ ހުރި ނަމަވެސް، އޭނާއަށް ހިނގޭނެ ކަމުގެ އުއްމީދު ވަނީ ގެއްލިފައެވެ.
