ކ. ހިންމަފުށިން 2 މީހަކާއި ސ. ހިތަދޫ އަދި ލ. ގަމުން މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) ބުނީ ހިންމަފުށިން ޕޮޒިޓިވް ވެފައި ވަނީ 32 އަހަރާއި އަދި 33 އަހަރުގެ ދިވެހި ފިރިހެނެއް ކަމަށެވެ. އަދި ހިތަދޫ އިން ޕޮޒިޓިވް ވެފައިވަނީ 24 އަހަރުގެ ދިވެހި ފިރިހެނެއް ކަމަށާއި ގަމުން ޕޮޒިޓިވް ވެފައިވަނީ 8 އަހަރުގެ ކުޑަ ފިރިހެން ކުއްޖެއް ކަމަށް އެޗްއީއީސީން ވަނީ ބުނެފައެވެ.
ހިންމަފުށިން އާއި ހިތަދޫ އަދި ގަމުން ވެސް މީގެ ކުރިން ވެސް ވަނީ ޕޮޒިޓިވް ކޭސްތައް ފެނިފައެވެ.
މިހާރު މި ބައްޔަށް ފަރުވާ ކުރަމުންދާ ނުވަތަ އެކްޓިވް ކޭސްތައް އުޅެނީ މާލެ ސަރަހައްދުގެ އިތުރުން، ރާއްޖޭގެ 24 ރަށެއްގައެވެ. އެއީ ހދ. ނާވައިދޫ، ހދ.ކުރިނބި، ނ. މިލަދޫ، ރ. ހުޅުދުއްފާރު، ރ. އިނގުރައިދޫ، ރ. ދުވާފަރު، ރ. ކިނޮޅަސް، ބ. ކަމަދޫ، ޅ. ހިންނަވަރު، ޅ. ނައިފަރު، ކ. ތުލުސްދޫ، ކ. ހިންމަފުށި، ކ. ގުޅި، ލ.ގަން، އދ. މާމިގިލި، އދ. އޮމަދޫ، ފ. ނިލަންދޫ، ވ. ކެޔޮދޫ، ވ. ތިނަދޫ، ތ. މަޑިފުށި، ތ. ވިލުފުށި، ތ. ތިމަރަފުށި، އަދި އައްޑޫ ސިޓީގެ ހިތަދޫއާއި ފޭދޫއެވެ.
އިއްޔެ ކޮވިޑަށް ޕޮޒިޓިވްވީ 119 މީހެކެވެ. އޭ ތެރޭގައި ހިމެނެނީ، 100 ދިވެހިންނާއި، ބަންގްލަދޭޝަށް ނިސްބަތްވާ 11 މީހަކާއި އިންޑިއާގެ 3 މީހަކާއި ފިލިޕީންސްގެ 3 މީހުންނާއި އެމިރޭޓްސްގެ ދެ މީހުން އަދިސްރީލަންކާގެ އެކަކެވެ. މިއަދު ޕޮޒިޓިވްވި މީހުންގެ ތެރެއިން 110 މީހަކު މާލެ ސަރަހައްދުން ޕޮޒިޓިވް ވެފައިވާއިރު، 9 މީހަކު ޕޮޒިޓިވްވީ އަތޮޅުތެރެއިންނެވެ.
