ކުޅިވަރު ގާނޫނުގެ ދަށުން ހަދާފައިވާ ގަވާއިދާ ހިލާފަށް ބޭއްވި އެފްއޭއެމްގެ އިންތިހާބުގެ ކަންތަކާއި ގުޅިގެން ޔޫތު މިނިސްޓަރު އަހްމަދު މަހްލޫފު ރައްޔިތުންގެ މަޖިލީހަށް ހާޒިރުކޮށް ސުވާލު ކުރަން އެޖެންޑާ ކޮށްފިއެވެ.
ރައްޔިތުންގެ މަޖިލީހުގެ މާދަމާގެ ޖަލްސާގައި އެކަމާ ގުޅޭގޮތުން މަހުލޫފާ ސުވާލު ކުރުމަށް ހުށަހަޅުއްވާފައިވަނީ ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމްއެވެ.
މެމްބަރު ޝަހީމް ވަނީ ޖުމްލަ ދެ ސުވާލެއް ކުރުމަށް ހުށަހަޅާފައެވެ އެގޮތުން ފުރަތަމަ ސުވާލަކީ ކުޅިވަރު ގާނޫނާއި އަދި ގާނޫނުގެ ދަށުން ހެދިފައިވާ ގަވާއިދުތަކާ ހިލާފަށް އަމަލުކުރަމުންދާ ކުޅިވަރު ގައުމީ ޖަމްޢިއްޔާތަކާ އެއްވެސް ހައިސިއްޔަތަކުން ގުޅުންބަދަހިކޮށް އެހީތެރިކަން ފޯރުކޮށްދެވިފައިވާނެތޯ؟އެވެ. އަދި ގާނޫނާ ހިލާފަށް އޮޕަރޭޓުކުރާ އެއްވެސް ކުޅިވަރު ގައުމީ ޖަމްއިއްޔާއަކަށް ދައުލަތުގެ ކުޅިވަރު ބިންތަކާއި އަދި އެހެނިހެން ވަސީލަތްތައް ފޯރުކޮށްދީ، ދައުލަތުގެ ބަޖެޓުން އެއްވެސް ހަރަދެއް ކުރެވިފައިވާނެތޯ؟އެވެ.
ދެވަނަ ސުވާލަކީ 2 ޖުލައި 2020 ގައި ތާވަލްކޮށް ކުރިއަށްގެންދިއުމަށް ނިންމާފައިވާ އެފްއޭއެމްގެ އިންތިހާބު ފަސްކުރުމަށް އެފްއޭއެމްއިން އެންގިކަމަށް މިނިސްޓަރު ވަނީ ވިދާޅުވެފައެވެ. އެހެންކަމަށްވާނަމަ އެފްއޭއެމް އިން އެ އިންތިހާބު އެ ބޭއްވީ ވަޒީރުންގެ އެންގުމާ ހިލާފަށްކަމަށް ގަބޫލުކުރަންތޯ؟ އެންގުމާ ހިލާފަށްކަމަށް ނޫންނަމަ އެއީ ކީއްވެތޯ؟ އެންގުމާ ހިލާފަށްނަމަ އެ އިންތިހާބު ގަބޫލުކުރަންތޯ؟އެވެ.
މާދަމާގެ ޖަލްސާގައި ގަލޮޅު ދެކުނު ދާއިރަގެ މެމްބަރު މީކާއިލް އަހްމަދު ނަސީމް، ފިނޭންސް މިނިސްޓަރު އިބްރާޙިމް އަމީރާވެސް ލިޔުން ޖަވާބު ހޯދުމަށް ހުށަހަޅާފައިވާ ސުވާލުތައްވެސް ވަނީ އެޖެންޑާ ކޮށްފައެވެ.
