ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ދެވަނަ ރާޅަކާ ކުރިމަތިވެއްޖެ ހިނދެއްގައި އެ ކަން ކޮންޓްރޯލް ކުރުމަށް ގައުމު ހުއްޓުމަކަށް ގެނައުމަށް ސައެންސްވެރިން ލަފާ އަރުވައިފި ހިނދެއްގައި، އޭނާގެ ވެރިކަމުގައި އެމެރިކާ "ބަންދުކުރުމަށް" ތައްޔާރަށް ހުންނެވި ކަމަށް، ކުރިއަށް އޮތް އެމެރިކާގެ ރިޔާސީ އިންތިހާބުގައި އިދިކޮޅު ޑިމޮކްރަޓުންގެ ފަރާތުން ނިކުންނަވާ ކުރީގެ ނައިބު ރައީސް ޖޯ ބައިޑަން ވިދާޅުވެއްޖެއެވެ.
އޭބީސީ ނިއުސްއިން ދެންނެވި ސުވާލަކަށް ޖަވާބު ދެއްވަމުން ބައިޑަން ވިދާޅުވީ ގައުމު ހުއްޓުމަކަށް ގެންނަން ޖެހިއްޖެ ހިނދެއްގައި އެކަން ކުރައްވާނެކަމަށާ، އޭނާއަކީ ސައެންސްވެރިންގެ ވާހަކަތައް އަޑު އައްސަވާނެ ބޭފުޅެއް ކަމަށެވެ. މީހުންގެ ފުރާނަ ސަލާމަތް ކުރުމަށް ކުރައްވަންޖެހިވަޑައިގެންނެވި ކޮންމެ ކަމެއްވެސް ކުރައްވާނެ ކަމަށާ، ވައިރަސް ކޮންޓްރޯލް ނުކުރެވެނީސް، ގައުމު އަދު ހިނގަމުންދާ ގޮތަށް ހަރަކާތްތެރިކޮށްފައި ނުބޭއްވޭނެ ކަމަށްވެސް ބައިޑަން ވަނީ ވިދާޅުވެފައެވެ.
މިމޭރުމުން ވާހަކަދައްކަވަމުން ބައިޑަން ވަނީ އެމެރިކާގެ އަދުގެ ރައީސް ޑޮނާލްޑް ޓްރަމްޕްގެ ސަރުކާރުން މި ބަލި މަޑުކަން މެނޭޖު ކުރުމުގައި އަސާސީ މައްސަލަތަކެއް ހުރި ކަމަށް ވިދާޅުވެފައެވެ. އާންމު އުސޫލުން ގައުމު ހިންގާ، އިގުތިސޯދު ކުރިއަރުވާ، ވަޒީފާތަކުގައި މީހުން ބައިތިއްބަން ބޭނުން ނަމަ، ވައިރަސް ކޮންޓްރޯލް ކުރަންޖެހޭ ކަމަށް ބައިޑަން ވިދާޅުވިއެވެ.
ދުނިޔޭގެ ނިސްބަތުން ބަލާއިރު އަދިވެސް އެންމެ ގިނަ އަދަދަކަށް ކޮވިޑް-19ގެ ޕޮޒިޓިވް ކޭސްތަކާ، އެ ބަލީގައި މަރުވި މީހުންގެ ރެކޯޑްތައް ލިބިފައިވަނީ އެމެރިކާއިންނެވެ.
