ސިފައިންގޭގައި ކުރިން މަސައްކަތް ކުރެއްވި ލެފްޓިނެންޓް ކާނަލް (ރިޓަޔާޑް) އަބްދުލްޣަނީ ކޮވިޑް ޖެހިގެން އަވާހަރަ ވެއްޖެއެވެ.
އަބްދުލްޣަނީގެ އާއިލާގެ ފަރާތުން ދަރިކަނބަލަކު މައުލޫމާތު ދެއްވަމުން ވިދާޅުވީ، އަބްދުލްޣަނީ އަވަހާރަވީ ހުޅުމާލެ ފެސިލިޓީގައި ފަރުވާ ދެމުން ދަނިކޮށް ކަމަށެވެ. އަދި މިހާރު ހިނަވާ ފަސްދާނުލުމުގެ ކަންކަން ކުރިއަށް ދާ ކަމަށެވެ.
ލެފްޓިނެންޓް ކާނަލް (ރިޓަޔާޑް) އަބްދުލްޣަނީީ (ސިފައިންގެ ސާވިސް ނަންބަރު:105) އަކީ އޯގަސްޓްް 27، 1960 އިން ފެށިގެން, މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) ގައި ތެދުވެރިކަމާއި އިހުލާސްތެރިކަމާއެކު ހިދުމަތް ކުރައްވާފައިވާ ބޭފުޅެއް ކަމަށް އެމްއެންޑީއެފުން ބުނެއެވެ.
ލެފްޓިނަންޓް ކާނަލް (ރިޓަޔާޑް) އަބްދުލްޣަނީ ވަނީ 48 އަހަރާ 11 މަހާ 4 ދުވަހުގެ ދިގު މުއްދަތުގައި ދިވެހި އަސްކަރިއްޔާގައި ހިދުމަތް ކުރައްވައިފައެވެ.
އެ ދިގު މުއްދަތުގައި ގިނަ ދުވަހު ހިދުމަތް ކުރެއްވީ އެމްއެންޑީއެފް ކޯސްޓްގާޑްގައި ކަނޑުމަތީގެ ހިދުމަތްތަކުގައެވެ.
ލެފްޓިނެންޓް ކާނަލް ޢަބްދުލްޣަނީީ ސިފައިންގޭގައި އިހުލާސްތެރިކަމާއި ވަފާތެރިކަމާއެކު އަދާކުރެއްވި ހިދުމަތްތަކުގެ ސަބަބުން ޝަރަފުގެ ނިޝާނުގެ ގޮތުގައި 9 ކުލައާ 7 މެޑަލް ލިބިވަޑައިގެންފައި ވެއެވެ. އޭނާ އަވަހާރަވި އިރު އުމުރުފުޅަކީ 82 އަހަރެވެ.
އިއްޔެ ރާއްޖޭގައި 145 މީހަކު ކޮވިޑަށް ވަނީ ޕޮޒިޓިވް ވެފައެވެ. ޕޮޒިޓިވްވި މީހުންގެ ތެރޭގައި ހިމެނެނީ، 123 ދިވެހިންނާއި، ބަންގްލަދޭޝަށް ނިސްބަތްވާ 11 މީހަކާއި އިންޑިއާގެ 3 މީހަކާއި ސްރީލަންކާގެ 5 މީހުންގެ އިތުރުން ނޭޕާލްގެ އެކަކާއި ޖާޕާންގެ އެކަކާއި ޖޯޑޭނިއާގެ މީހެކެވެ.
މިހާރު ރާއްޖެއިން ޕޮޒިޓިވް ވި މީހުންގެ ޖުމްލަ އަދަދު މިވަނީ 6370 އަށް އަރާފައެވެ. ރަނގަޅުވި މީހުންގެ ޖުމްލަ އަދަދަކީ 3915 އެވެ.
މިހާރު މިބަލި ޖެހިފައިވާ 2431 މީހުން ތިބި އިރު، އެމީހުންގެ ތެރެއިން 161 މީހަކަށް ފަރުވާ ދެމުން ދަނީ ހޮސްޕިޓަލުގައެވެ. އަދި 1355 މީހަކު އައިސޮލޭޝަން ފެސިލިޓީތަކުގައި އެބަތިއްބެވެ. އަދި އެއްވެސް ފެސިލިޓީއަކަށް ނުގެންދެވި އެކިއެކި ގޭގޭގައި އެތައް ސަތޭކަ މީހަކު އެބަ ތިއްބެއެވެ.
މިހާތަނަށް އައި އިރު ރާއްޖެއިން މި ބަލި ޖެހިގެން 25 މީހަކު ވަނީ މަރުވެފައެވެ. އޭގެ ތެރޭގައި ހިމެނެނީ 20 ދިވެހިންނާއި 5 ބިދޭސީންނެވެ.
މި ބައްޔަށް ފަރުވަ ކުރަމުންދާ ނުވަތަ އެކްޓިވް ކޭސްތައް ފެނިފައިވަނީ މާލެ ސަރަހައްދުގެ އިތުރުން، ރާއްޖޭގެ 21 ރަށަކުންނެވެ. އަދި 10 ރިސޯޓެއްގައި ވެސް އެކްޓިވް ކޭސްތައް އުޅޭ އިރު، 2 ފަތުރުވެރިންނާއި 13 ރިސޯޓަކުން ބައެއް މުވައްޒަފުން ވަނީ ޕޮޒިޓިވް ވެފައެވެ.
އެކްޓިވް ކޭސްތައް އުޅޭ ރަށްތަކުގެ ލިސްޓުގައި ހިމެނެނީ، ހއ. އިހަވަންދޫ، ހދ. ނާވައިދޫ، ހދ.ކުރިނބި، ނ. މިލަދޫ، ރ. ހުޅުދުއްފާރު، ބ. ކުޑަރިކިލު، ބ. ކަމަދޫ، ޅ. ނައިފަރު، ކ. ތުލުސްދޫ، ކ. ހިންމަފުށި، އދ. މާމިގިލި، ފ. ނިލަންދޫ، ވ. ކެޔޮދޫ، ވ. ތިނަދޫ، ތ. މަޑިފުށި، ތ. ވިލުފުށި، ތ. ތިމަރަފުށި، ފުވައްމުލައް ސިޓީ އަދި އައްޑޫ ސިޓީގެ ހިތަދޫ އާއި ފޭދޫއެވެ.
