ހިއްސާގެ ބާޒާރުގެ ވިޔަފާރީގައި 2 ޓްރިލިއަން ޑޮލަރަށް އަގު އުފުލުނު އެމެރިކާގެ ފުރަތަމަ ކުންފުނީގެ ރެކޯޑް، ޓެކްނޮލޮޖީގެ ދުނިޔޭގައި ގިނަ ބައެއްގެ އިތުބާރު ހޯދާފައިވާ އެޕަލް ކުންފުނިން ކަށަވަރު ކޮށްފިއެވެ.
އެޕަލް ކުންފުނިން މި ރެކޮޑް ކަށަވަރު ކޮށްފައި މިވަނީ، މުޅި ދުނިޔެއިންވެސް 1 ޓްރިލިއަން ޑޮލަރުގެ އަގުހުރި ކުންފުނީގެ ރެކޯޑް ހޯދިތާ އެންމެ 2 އަހަރު ދުވަސް ފަހުންނެވެ.
2 ޓްރިލިއަން ޑޮލަރުގެ ފާހަގަ ހުރަސް ކޮށްފައިވަނީ ދެން އެންމެ ކުންފުންޏަކުންނެވެ. އެއީ ފުރަތަމަ ފަހަރަށް މި ރެކޯޑް ހޯދި، ސައުދީ އަރާމްކޯއެވެ. ސައުދީ އަރާމްކޯއިން 2 ޓްރިލިއަން ޑޮލަރުގެ ފާހަގަ ހުރަސްކުރީ، މިދިޔަ އަހަރުގެ ޑިސެމްބަރު މަހުގެ ތެރޭގައި، ހިއްސާގެ ބާޒާރުގެ ވިޔަފާރީގައި ލިސްޓު ކުރުމާއެކުގައެވެ. ނަމަވެސް، ތެލުގެ މުއްސަނދިކަން ލިބިފައިވާ ސައުދީ އަރާމްކޯގެ އަގު މިހާރު ވަނީ 1.8 ޓްރިލިއަން ޑޮލަރަށް ދަށަށް ގޮސްފައެވެ. އެހެންކަމުން މިވަގުތު 2 ޓްރިލިއަން ޑޮލަރުގެ އަގުހުރި ހަމައެކަނި ކުންފުންޏަކީ އެޕަލް ކަމުގައި ބުނެވިދާނެއެވެ.
މި ހިނގާ 2020 ވަނަ އަހަރަކީ ޓެކްނޮލޮޖީ ކުންފުނިތަކަށް ކާމިޔާބު އަހަރެކެވެ. ކޮރޯނާވައިރަސް ޑިޒީޒް (ކޮވިޑް-19)ގެ ލޮކްޑައުންނާއެކު ދުނިޔޭގެ އެކި ކަންކޮޅުތަކުން އެތައް ބިލިއަން ބަޔަކު ގޭބަންދުގައި ތިބެންޖެހި، އާންމު ދިރިއުޅުމާ މަސައްކަތު މާހައުލުގެ ހުރިހާ ކަމެއްހެން އޮންލައިން ޕްލެޓްފޯމުތަކަށް ބަދަލު ވެފައިވާއިރު، ޓެކްނޮލޮޖީ ކުންފުނިތަކުގެ އާމްދަނީއަށް އެކަމުގެ ހެޔޮ އަސަރު ވަނީ ފޯރާފައެވެ.
އެޕަލް ކުންފުންޏަށް ބަލާއިރު މިއަހަރު އެކަނިވެސް އެކުންފުނީގެ ހިއްސާގެ އަގުތައް ވަނީ 50 ޕަސެންޓް އުފުލިފައެވެ. ޖުލައި މަހު ނިންމާލި މިއަހަރުގެ 3 ވަނަ 3 މަސް ދުވަހުގެ ތަފާސް ހިސާބުތަކަށް ބަލާއިރު، މި މިއްދަތުގައި އެޕަލް ކުންފުންޏަށް ލިބުނު އާމްދަނީ ވަނީ 59.7 ބިލިއަން ޑޮލަރަށް އަރާފައެވެ.
އެޕަލް ކުންފުނީގެ ފަހަތުން، އެމެރިކާގައި ދެން އޮތް އެންމެ އަގުބޮޑު ކުންފުންޏަކީ އެމެޒޯންއެވެ. އެމެޒޯން ކުންފުނީގެ އަގު އުޅެނީ 1.7 ޓްރިލިއަން ޑޮލަރުގައެވެ. ގޫގްލްގެ ބެލެނިވެރި އެލްފަބެޓް ކުންފުނީގެ އަގުވެސް މިހާރު ވަނީ 1 ޓްރިލިއަން ޑޮލަރުގެ ފާހަގަ ހުރަސް ކޮށްފައެވެ.
