ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ޖެހިގެން، އަވަށްޓެރި އިންޑިއާއިން މަރުވި މީހުންގެ އަދަދު ބައި ލައްކައަށްވުރެ މައްޗަށް އަރައިފިއެވެ.
އިންޑިއާގެ ސިއްހަތާ ބެހޭ ވުޒާރާއިންވެސް މިއަދު ވަނީ، އެ ގައުމުން ކޮވިޑް-19ގައި މަރުވި މީހުންގެ އަދަދު 50000 އަށް ވުރެ މައްޗަށް އަރާފައިވާކަން ކަށަވަރު ކޮށްދީފައެވެ.
ވޯލްޑޮމީޓާގެ ރެކޯޑްތަކަށް ބަލާއިރު، ކޮވިޑް-19 ޖެހިގެން އިންޑިއާއިން މަރުވި މީހުންގެ ޖުމުލަ އަދަދު ވަނީ 51045 އަށް އަރާފައެވެ. މިއީ ދުނިޔޭގެ ނިސްބަތުން 4 ވަނައަށް އެންމެ ގިނަ އަދަދެވެ. އިއްޔެ އެކަނިވެސް އިންޑިއާއިން މި ބަލީގައި 961 މީހެއްގެ ފުރާނަ ގެއްލިފައިވާއިރު، މުޅި ދުނިޔޭގެ ނިސްބަތުންވެސް އިއްޔެ އެންމެ ގިނަ އަދަދަކަށް މަރުގެ ރިޕޯޓްތައް ކޮށްފައިވަނީ އިންޑިއާއިންނެވެ.
އުއްތަރަ ޕްރަދޭޝްއިން 2 ވަނަ ވަޒީރަކު އަވަހާރަވުން
އިންޑިއާގެ ބައިނަލްއަގުވާމީ ކުރިކެޓާ އަދި ފަހުން ސިޔާސީ މައިދާނުން ފެނިގެންދިޔަ ޗެތާން ޗޯހާންވެސް ވަނީ ކޮވިޑް-19ގެ ބަލިމަޑުކަމުގައި، އިއްޔެގެ ވަގުތެއްގައި އަވަހާރަވެފައެވެ.
އުއްތަރަ ޕްރަދޭޝްގެ ޔޫތް އެންޑް ސްޕޯޓްސް މިނިސްޓަރުގެ މަގާމު އަދާ ކުރައްވަމުން ގެންދެވި ޗޯހާން ކޮވިޑް-19އަށް ޕޮޒިޓިވްވީ ޖުލައި 12 ވަނަ ދުވަހު، ލަކްނޯގެ ހޮސްޕިޓަލަކުންނެވެ. އޭގެ ފަހުން ސިއްހީ ހާލު ދެރަވެ، ދިއްލީގެ ހޮސްޕިޓަލަކަށްވެސް ބަދަލުކުރެވުނެވެ. ކޮވިޑް-19 ޖެހިގެން އުއްތަރަ ޕްރަދޭޝްގެ ޓެކްނިކަލް އެޑިއުކޭޝަން މިނިސްޓާ ކާމްލާ ރާނީ ވަރުން އަވަހާރަވީ މިމަހުގެ 2 ވަނަ ދުވަހުއެވެ.
އިންޑިއާއިން ކޮވިޑް-19 ޖެހުނު މީހުންގެ ތެރެއިން މިވަގުތު އެކްޓިވް ކޭހުގެ ގޮތުގައި ރެކޯޑް ކޮށްފައިވަނީ 678195 ކޭހެކެވެ. 1.38 ބިލިއަން މީހުންގެ އާބާދީއެއް އޮތް އިންޑިއާގެ ކޮންމެ 522 މީހަކުން 1 އަށް ކޮވިޑް-19 ޖެހިފައިވާކަމަށް ތަފާސް ހިސާބުތަކުން އަންދާޒާކުރެއެވެ.
ކޮވިޑް-19 ޖެހި، ޝިފާ ލިބި، ބަލިން ރަނގަޅުވި މީހުންގެ އަދަދު ގާތްގަނޑަކަށް 1.9 މިލިއަނަށް އަރާފައިވާއިރު، އިންޑިއާއިން ދަނީ ބަލިން ދިފާއުވާނެ ވެކްސިނެއް ހޯދުމަށްވެސް ހަލުވި ދުވެއްޔެއްގައި މަސައްކަތްތަކެއް ކުރަމުންނެވެ.
