އިންޑިއާގެ ކެރަލާ ސްޓޭޓްގައި ހިންގާ ތިރިވަނަންތަޕޫރަމް ސެންޓްރަލް އާއި ކޯލަމް ޑިސްޓްރިކްޓްގެ ޖަލުތަކުން 266 ގައިދީއެއް، ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެއްޖެއެވެ.
މިއާއެކު ކޮވިޑް-19 ޖެހިފައިވާ ގައިދީން އައިސޮލޭޓް ކުރުމަށް ޖަލުތަކުގައި ވަކި ވޯޑުތަކެއް ހެދުމަށް، ޖަލު ބަލަހައްޓާ ފަރާތްތަކަށް މަޖުބޫރުވެފައި ވާ ކަމަށް އިންޑިއާ މީޑިއާއިން ވަނީ ރިޕޯޓް ކޮށްފައެވެ.
ޕޫޖަޕޫރާ ސެންޓްރަލް ޖެއިލްއިން 50 ގައިދީއަކު ހޮނިހިރު ދުވަހު ކޮވިޑް-19އަށް ޕޮޒިޓިވްވިއިރު، އެ ޖަލުން ކޮވިޑް-19އަށް ޕޮޒިޓިވްވި ގައިދީންގެ ޖުމުލަ އަދަދު 200 އަށް އަރާފައިވާކަމަށް ޑެޕިއުޓީ އިންސްޕެކްޓާ ޖެނެރަލް އޮފް ޕްރިޒަންސް، ސަންތޯޝް އެސް އެވަނީ ވިދާޅުވެފައެވެ.
ސަންތޯޝް ވިދާޅުވީ 3 އޮފިޝަލެއްގެ ނަތީޖާވެސް ކޮވިޑް-19އަށް ޕޮޒިޓިވްވެފައި ވާ ކަމަށެވެ.
ސަންތޯޝް ވިދާޅުވީ ކޮވިޑް-19އަށް ޕޮޒިޓިވްވެފައިވާ ޕޭޝަންޓުންގެ ހަށިގަނޑުން ބަލީގެ އަލާމާތްތައް ފެންނަމުން ނުދާ ކަމަށާ، ބަލީގެ އަލާމާތްތައް ފެންނަން ފަށާ ހިސާބުން އިތުރު ފަރުވާއަށް ހޮސްޕިޓަލަށް ބަދަލު ކުރެވޭނެ ކަމަށެވެ.
އިންޑިއާގެ އަދުގެ ހާލަތަށް ބަލާއިރު، އެގައުމުން މިހާތަނަށް 2.58 މިލިއަން މީހުންނަށް ކޮވިޑް-19 ޖެހިގެން ވަނީ ރިޕޯޓްކޮށްފައެވެ. މި ބަލީގައި މަރުވި މީހުންގެ އަދަދު ބައި ލައްކައަށްވުރެ މައްޗަށް އަރާފައިވާކަމަށް ރެކޯޑްތަކުން ދައްކައެވެ.
