ޖަނަވަރީ މަހުގެ 8 ވަނަ ދުވަހު، އީރާންގެ ވެރިރަށް ތެހްރާންގެ ވައިގެ ސަރަހައްދުން ވައްޓާލި ޔޫކްރައިން އިންޓަނޭޝަނަލް އެއާލައިންސްގެ ފްލައިޓް ޕީއެސް 752 ގެ ކަޅުފޮށީގައިވާ މައުލުމާތު އެއް ކުރުމުގެ އަމަލީ މަސައްކަތްތައް ހޯމަ ދުވަހު ފަށަން ހަމަޖެހިފައިވާކަމަށް އީރާނުން ހާމަކޮށްފިއެވެ.
މަތިންދާ ބޯޓުގެ ކަޅުފޮއްޓަކީ ބޯޓުގެ ދަތުރުތަކާ ބެހޭ މުހިންމު މައުލޫމާތުތަކެއް ފޯރުކޮށްދޭ މައި މަސްދަރަށް ވާއިރު، ހާދިސާތަކުގައި އިންތިހާއަށް ހަލާކުވާ ކަޅުފޮށިތަކުން މައުލޫމާތު އެއްކުރުމުގެ ގާބިލުކަން ލިބިފައިވަނީ ނިސްބަތުން މަދު ގައުމުތަކަކަށެވެ. ވެއްޓުނީ ބޮއިންގް މަރުކާގެ މަތިންދާ ބޯޓަކަށް ވީ ނަމަވެސް، އީރާނުންވަނީ ޕީއެސް 752 ގެ ކަޅު ފޮށި، އެމެރިކާއާއި ހަވާލު ކުރުމަށް އިންކާރު ކޮށްފައެވެ.
އީރާންގެ ޑެޕިއުޓީ ފޮރިން މިނިސްޓަރު މުހްސިން ބަހަރުވާންދް ވިދާޅުވީ، ހުކުރު ދުވަހުގެ ވަގުތެއްގައި ފަރަންސޭސިވިލާތަށް ކަޅުފޮށި ގެންގޮސްފައިވާކަމަށެވެ.
ކަޅުފޮށީގައިވާ މައުލުމާތު ދިރާސާކުރާނީ ފަރަންސޭސިވިލާތުގެ ތަޖުރިބާކާރުންނެވެ. ނަމަވެސް، ފްލައިޓުން އެންމެ ގިނަ އަދަދަކަށް ފަސެންޖަރުން ދަތުރުކުރި ކެނެޑާއާއި، ފްލައިޓް ނިސްބަތްވާ ޔޫކްރައިންވެސް މިވަނީ މި ތަހުގީގަށް އެ ގައުމުތަކުގެ ޓީމުތައް ފޮނުވާނެކަން ހާމަކޮށްފައެވެ.
ވެރިރަށް ތެހްރާންގެ ވައިގެ ބަނދަރުން ފްލައިޓް އުދުއްސާލިތާ ކުޑަ ވަގުތު ކޮޅެއްގެ ތެރޭގައި، 2 މިސައިލް ހަމަލާއެއް އަމާޒުވެ، ޔޫކްރައިންގެ ކޮމާޝަލް ފްލައިޓް ވެއްޓުނު ހާދިސާގައި، އެ ވަގުތު ބޯޓުން ދަތުރުކުރި 176 މީހުންގެ ފުރާނަ ވަނީ ގެއްލިފައެވެ. ވައިގެ އުދުހުނަތްކާ ބެހޭ އީރާނުގެ އިދާރާއިން އާންމު ކުރި ރިޕޯޓް ބުނާ ގޮތުގައި، ހާދިސާ ހިނގާފައިވަނީ، އަސްކަރީ ފެންވަރުގައި މުއާމަލާތު ކުރުމުގެ ފެންވަރު ދަށްވުމާ، 'ހިއުމަން އެރާ' ގެ ސަބަބުންނެވެ. އަދި މިއީ "މައާފު ނުދެވޭ ވަރުގެ ބޮޑު ކުށެއް" ކަމަށް އީރާނުގެ ރައީސް ހަސަން ރޫހާނީވެސް މީގެ ކުރިން ވިދާޅުވެފައެވެ.
އީރާނުގެ ވައިގެ ސަރަހައްދުން، ޔޫކްރައިން އިންޓަނޭޝަނަލް އެއާލައިންސްގެ ފްލައިޓް ވައްޓާލި ވަގުތަކީ، އެމެރިކާއާއި އީރާނާ ދެމެދު އަސްކަރީ ފެންވަރުގައި ނުތަނަވަސް ކަން އުފެދިފައި އޮތް ވަގުތެކެވެ. އިރާގުގައި ހުރި އީރާނު އަސްކަރިއްޔާގެ އެންމެ ނުފޫޒުގަދަ ޖެނެރަލް ގާސިމް ސުލައިމާނީ އަށް އެމެރިކާއިން ޑްރޯން ހަމަލާދީ، އޭނާ މަރާލި ހާދިސާއާ ގުޅިގެން އީރާނުން އޭރު އޮތީ އިރާގުގައި ހުންނަ އެމެރިކާގެ އަސްކަރީ ބޭހަށް ބެލިސްޓިކް މިސައިލް ހަމަލާތަކެއް ދީފައެވެ.
