ދުނިޔޭގައި 2 ވަނައަށް އެންމެ އާބާދީ ބޮޑު ގައުމުގެ ގޮތުގައި އޮތް އަވަށްޓެރި އިންޑިއާއިން ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވި މީހުންގެ އަދަދު 1 މިލިއަނަށްވުރެ މައްޗަށް އަރާފައިވާކަމަށް، އެގައުމުގެ ސިއްހަތާ ބެހޭ ވުޒާރާގެ ރެކޯޑްތަކުން ދައްކައިފިއެވެ.
ކޮވިޑް-19އަށް ޕޮޒިޓިވްވެފައިވާ މީހުންގެ ހަގީގީ ތަފާސް ހިސާބުތައް އެކުލަވާލުމަށް ބޮޑެތި ގޮންޖެހުންތަކެއް ހުރަސްކޮށް، ތަކުލީފުތަކެއް އިންޑިއާއިންގެ ކަމާބެހޭ ފަރާތްތަކުން އުފުލަމުންދާ މި ދަނޑިވަޅުގައި އިންޑިއާގެ ސިއްހަތާ ބެހޭ ވުޒާރާގެ ރެކޯޑްތައް ދައްކާ ގޮތުގައި އެ ގައުމުން ބަލި ޖެހުނު މީހުންގެ އަދަދު ވަނީ 1003382 އަށް އަރާފައެވެ. މިއީ ގާތްގަނޑަކަށް 35000 ކޭހުގެ އިތުރުވުމެވެ. މި ބަލީގައި އިތުރު 687 މީހަކު މަރުވެފައިވާކަމަށް ރެކޯޑްތަކުން ދައްކާއިރު، މި ދެ އަދަދަކީވެސް އިންޑިއާއިން މިހާތަނަށް މައުލޫމާތު އާންމުކޮށްފައިވާ ގޮތަށް ބަލާއިރު ރެކޯޑް އަދަދުތަކެކެވެ.
އިންޑިއާއިން ކޮވިޑް-19އަށް ޕޮޒިޓިވްވި މީހުންގެ އަދަދު 1 މިލިއަންގެ ފާހަގަ ހުރަސް ކޮށްފައި މިވަނީ، 9 ލައްކަ މީހުންގެ ފާހަގަ ހުރަސް ކުރިތާ އެންމެ 3 ދުވަސް ފަހުންނެވެ.
ދުނިޔޭގެ އެންމެ ބައިބޯ ސިޓީތަކުން ތޮއްޖެހިފައިވާ އިންޑިއާ އަކީ ކޮވިޑް-19ގެ ކޭސްތަކުގެ އަދަދު 1 މިލިއަންނަށްވުރެ މައްޗަށް އެރި 3 ވަނަ ގައުމެވެ. ކޭސް ނަމްބަރުގެ އަދަދަށް ބަލާއިރު 2 މިލިއަން ކޭހާއެކު ލިސްޓުގެ 2 ވަނާގައި އޮތީ ބްރެޒިލްއެވެ. އަދިވެސް އެންމެ ގިނަ އަދަދަކަށް ކޭސް ރިޕޯޓް ކުރަމުން ދަނީ އެމެރިކާއިންނެވެ. އެމެރިކާއިން ބަލި ޖެހުނު މީހުންގެ އަދަދު ވަނީ 3 މިލިއަނަށްވުރެ މައްޗަށް އަރާފައެވެ.
ފާއިތުވީ ހަފުތާތަކުގައި އިންޑިއާގައި ހަލުވިކަމާއެކި ބަލިމަޑުކަން ފެތުރެމުން ދިއުމުގެ ސަބަބުން، ބައެއް ސަރަހައްދުތަކުން ވަނީ ލޮކްޑައުންއަށް ދިން ލުއިތައް ނަގާ، ހަރުކަށި ފިޔަވަޅުތަކެއް ތަންފީޒު ކުރަން ފަށާފައެވެ.
