ފާއިތުވީ 4 ދުވަހުގެ ތެރޭގައި އެ ގައުމުން 100000 އަށް ވުރެ ގިނަ މީހުން ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެފައިވާކަމަށް އިންޑިއާގެ ސިއްހަތާ ބެހޭ ވުޒާރާއިން ހާމަކޮށްފިއެވެ.
ފާއިތުވީ 24 ގަޑިއިރުގެ ތެރޭގައިވެސް 29498 ޕޮޒިޓިވް ކޭހާ، 553 މަރުގެ ކޭސް، ކޮވިޑް-19 އާ ގުޅިގެން ރިޕޯޓް ކޮށްފައި ވާ ކަމަށް އިންޑިއާގެ ސިއްހަތާ ބެހޭ ވުޒާރާއިން ޚަބަރު ދެއެވެ. މިއާއެކު އިންޑިއާއިން ކޮވިޑް-19އަށް ޕޮޒިޓިވްވި މީހުންގެ ރަސްމީ އަދަދު މިވަނީ 906752 އަށް އަރާފައެވެ. އަދި މަރުވި މީހުންގެ އަދަދު މި ވަނީ 23727 އަށް އަރާފައެވެ.
މި ހުރިހާ ކޭހަކީ އެކްޓިވް ކޭސްތަކެއް ނޫނެވެ. ބަލިޖެހުނު މީހުންގެ ތެރެއިން 571000 މީހަކަށް ޝިފާ ލިބި ބަލިން ރަނގަޅުވެފައިވާއިރު، މިވަގުތު އެކްޓިވް ކޭހުގެ ގޮތުގައި ރެކޯޑް ކޮށްފައިވަނީ 311565 ކޭހެކެވެ.
އިންޑިއާގެ ކައުންސިލް އޮފް މެޑިކަލް ރިސާޗުން ޚަބަރު ދޭ ގޮތުގައި އެ ގައުމުގައި މިހާތަނަށް 12 މިލިއަން ސާމްޕަލެއް ކޮވިޑް-19އަށް ވަނީ ޓެސްޓު ކޮށްފައެވެ. ނަމަވެސް މިއީ 1.3 ބިލިއަން މީހުންގެ އާބާދީއަކާ އަޅާ ބަލާއިރު މަދު މިންވަރެއް ކަމުން، ކޮވިޑް-19ގެ ޝިކާރައަކަށްވި މީހުންގެ ހަގީގީ އަދަދުތައް އިންތިހާއަށް ބިރުވެރިވާނެ ކަމަށް ބުނެވެއެވެ.
