އިސްރާއީލު ފުލުހުންގެ ބަޑީގެ ހަމަލާގެ ޝިކާރައަކަށްވެ މިދިޔަ ހޮނިހިދު ދުވަހު މި ދުނިޔެއަށް ފަހު ނޭވާ ދޫކޮށްލި ފަލަސްތީނުގެ އިޔާދު ހައްލާގުގެ ޖަނާޒާގައި އެތައް ސަތޭކަ މީހުންނެއް ބައިވެރިވިއެވެ.
އުމުރުދުން 32 އަހަރުގެ ހައްލާގުގެ ގަޔަށް އިސްރާއީލުގެ ފުލުހުން، އިރުމަތީގައި ގުދުސްގައި ބަޑިޖެހޭ އެތަނެއްގައި އޭނާ ގިނަ ވަގުތުތަކެއް ހޭދަކުރާ ހާއްސާ އެހީއަށް ބޭނުންވާ މީހުންގެ ސްކޫލަށް ދިޔަ މަގުމަތީގައެވެ. އިސްރާއީލު ފުލުހުން ބުނާ ގޮތުގައި ހައްލާގުގެ ގަޔަށް ބަޑިޖެހީ އަމުރަށް ނުކިޔަމަން ތެރިވުމުންނެވެ. އޭނާ އަތުގައި ހަތިޔާރެއް އޮތްކަމަށްވެސް އެ ފުލުހުން ތުހުމަތުކުރިއެވެ. ރަނގަޅަށް ހަގީގަތް ބެލިއިރު ހައްލާގު އަތުގައި އޮތީ ހަތިޔާރެއް ނުންކަމަށް ޚުދު އިސްރާއީލުގެ ފުލުހުންވެސް އިއުތިރާފުވެއެވެ.
ކަންމިހެން އޮތްއިރު އިސްރާއީލުގެ ދިފާއީ ވަޒީރު ބެނީ ގަންޓްޒް ވަނީ ބަޑީގެ ހަމަލާތަކާ މެދު ހިތާމަކުރާކަމަށް ބުނެފައެވެ. އަދި މައްސަލަ ތަހުގީގު ކުރާނެ ކަމަށްވެސް ގަންޓްޒް ވަނީ ހާމަކޮށްފައެވެ. ނަމަވެސް، ވަގުތު ފާއިތުވެއްޖެއެވެ. ކޮންމެ ކޮޅަކަށް އިންސާފު ބުރަވިއަސް ހައްލާގެއް ދެނެއް އެނބުރި ނާންނާނެއެވެ.
ހައްލާގަކީ ހާއްސަ އެހީއަށް ބޭނުންވާ ޒުވާނެކެވެ. އޯޓިޒަމްގެ ތަކުލީފުތައް އުފުލަމުންދާ ޒުވާނެކެވެ. ހައްލާގާ ދެބެންގެ ދެދަރި، ޑރ ހާތިމް އަވީވީ ކިޔައިދިން ގޮތުގައި ހައްލާގަކީ އޯޓިޒަމްގެ ސިވިއާ ކޭސްއެކެވެ. އެހެން މީހުންނާ މުއާމަލާތު ކުރުމަކީ ހައްލާގަށް އިންތިހާއަށް ދަތި ކަމެކެވެ. ފުލުހުންނަކީ ކޮބައިކަންވެސް ހައްލާގަށް ނޭނގޭނެ ކަމަށާ، އޭނާ ފަހަތުން ގޮތް ނޭނގޭ ބަޔަކު (އިސްރާއީލު ފުލުހުން) އަންނަން ފެށުމުން އޭނާ ސަލާމަތަށް ދުވީ ކަމަށް ޑރ އަވީވީ ކިޔައިދިނެވެ. އިސްރާއީލު ފުލުހުން ބަޑިޖެހީ އެހާ ހިސާބުންނެވެ.
އޮޓޮޕްސީ ރިޕޯޓް ބުނާ ގޮތުން ނަމަ އިސްރާއީލުގެ ފުލުހުންގެ ބަޑީގެ ހަމަލާތައް 2 ފަހަރެއްގެ މަތިން ހައްލާގުގެ ސީދާ މެޔަށް އޮތީ އަމާޒުވެފައެވެ.
ހައްލާގަށް ހަމަލާދިން ފުލުހުން ހިންގާފައިވަނީ ޖިނާއީ ޖަރީމާއެއް ކަމަށާ، މިކަން ތަހުގީގުކޮށް އިންސާފުގެ ކުރިމައްޗަށް އެމީހުން ހާޒިރު ކުރެވެންޖެހޭނެ ކަމަށް ހައްލާގުގެ އާއިލީ ވަކީލު ޖާދް ގަދްމާނީ ވަނީ ވިދާޅުވެފައެވެ.
ހައްލާގުގެ މަރުގެ ހާދިސާ ހިނގާފައި މިވަނީ ފުލުހުންގެ ލާއިންސާނީ އަނިޔާގައި، އެމެރިކާގެ ކަޅު ނަސްލަށް ނިސްބަތްވާ، އުމުރުން 46 އަހަރުގެ ޖޯޖް ފްލޮއިޑްގެ މަރުގެ މައްސާލާގައި މުޅި ދުނިޔެ އަޑުއުފުލަމުންދާ ދަނޑިވަޅެއްގައެވެ. ނަމަވެސް ފްލޮއިޑްގެ މަރަށް ލިބުނު ސަމާލުކަމާ ގާތްކުރާ ވަރަށްވެސް ހައްލާގަށް އިންސާފު ހޯދާ ދިނުމަށް އެދި، ގޮވާލާނެ މީހަކު ނެތެވެ. މިއާއެކު ފަލަސްތީނުގެ ރައްޔިތުން ވަނީ މަގުތަކަށް ނިކުމެފައެވެ. ފަލަސްތީނުގެ ރައްޔިތުންނާއެކު މިފަހަރު އިސްރާއީލުގެ ބައެއް މީހުންވެސް ނިކުތެވެ. އެ މީހުން ގޮވާލަނީ ހައްލާގަށް އިންސާފު ހޯދާ ދިނުމަށެވެ. ދައުވާއަކީ ފަލަސްތީނު މީހުންގެ ފުރާނާގައިވެސް އަގެއް ހުރި ކަމުގެ ދައުވާއެވެ.
ކަންމިހެން އޮތްއިރު، ޕަލަސްޓައިން ލިބަރޭޝަން އޯގަނައިޒޭޝަން (ޕީއެލްއޯ)ގެ ސެކްރެޓަރީ ޖެނެރަލް ސާއިބު އުރައިގާތު ވިދާޅުވަނީ، އިސްރާއީލަކީ ގާނޫނުތަކަށް ވުރެ މަތީގައި އޮތް ބައެއް ކަމަށް މުޅި ދުނިޔެ ގަބޫލުކުރާހާ ހިނދަކި، މިފަދަ ޖަރީމާތަކަށް ދެވޭނެ އެއްވެސް އަދަބެއް ނެތް ކަމަށެވެ.
