ކުރީގެ ރައީސް އަބްދުﷲ ޔާމީން މައްޗަށް ހުކުމް އިއްވުމުގެ ކުރިން އެމްއެމްޕީއާރްސީއާ ގުޅޭ 30 މައްސަލައެއް ކޯޓުތަކަށް ހުށަހެޅުނު ކަމަށް ކްރިމިނަލް ކޯޓުގެ ކުރީގެ އިސްގާޒީ އަހުމަދު ހައިލަމް ވިދާޅުވެއްޖެއެވެ.

ހައިލަމް ކުރައްވާފައިވާ ޓްވީޓެއްގައި ވިދާޅުވީ ރައީސް ޔާމީންގެ މައްޗަށް ދައުވާ ކުރުމުގެ ކުރިން އެމްއެމްޕީއާރުސީ ހިޔާނާތުގެ 30 މައްސަލައެއް ކޯޓުތަކަށް ހުށަހެޅިފައިވާ ކަމަށެވެ. އަދި އެ މައްސަލަތަކުން ދައުލަތަށް 600 މިލިއަން ލިބެންޖެހޭ ކަމަށްވެސް އޭނާ ވިދާޅުވިއެވެ.

"މިމައްސަލަތަށް ލަސްވާ ސަބަބު ބެއްލެވުމަކީ ރަީސް ނަޝީދު އިންނަވާ ޖޭއެސްސީގެ މަސްއޫލިއްޔަތެއް ނޫންތޯ،" ހައިލަމް ވަނީ ސުވާލު އުފައްދާފައެވެ.

ހައިލަމް މިފަދައިން ވިދާޅުވެފައި މިވަނީ އެމްޑީޕީ ވަޓްސްއަޕް ގުރޫޕަކަށް ރައީސް ނަޝީދު ލިޔުއްވާފައި ވާކަމަށް ބުނާ ލިޔުމެއް ހިއްސާ ކުރެއްވި މެސެޖެއްގައި އެމްއެމްޕީއާރްސީގެ ހިޔާނާތާ ގުޅިގެން ރައީސް ޔާމީން ޖަލުގައި ބެހެއްޓުމަކީ އިންސާފުވެރިކަމެއް ނޫން ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެފައި ވަނިކޮށެވެ.

އެ މެސެޖުގައި ރައީސް ނަޝީދު ވިދާޅުވީ ރައީސް ޔާމީންގެ އަމަލުފުޅުތަކަށާއި ހިޔާލުފުޅުތަކަށް އެއްވެސް އިރެއްގައި އެމަނިކުފާނު ތާއީދު ނުކުރައްވާ ކަމަށެވެ. އެހެންނަމަވެސް އެމްއެމްޕީއާރްސީގެ ހިޔާނާތުގެ މައްސަލާގައި ހަމައެކަނި ރައީސް ޔާމީން ޖަލުގައި ބެހެއްޓުމަކީ އެމްއެމްޕީއާރްސީގެ މައްސަލާގައި ލިބިގެންދިޔަ މާބޮޑު އިންސާފެއް ކަމަށް ދެކިވަޑައިނުގަންނަވާ ކަމަށެވެ.

އަބްދުﷲ ޔާމީން އެމްއެމްޕީއާރުސީގެ ކޮރަޕްޝަން މުހައްމަދު ނަޝީދު ގާޒީ ހައިލަމް ސިޔާސީ