ހައްދު ޖެހުން ހުއްޓާލުމަށް ސައުދީ އަރަބިއްޔާގެ ސުޕްރީމް ކޯޓުން ގަރާރެއް އެކުލަވާލާ އެކަން ތަންފީޒު ކުރުމުގެ މަސައްކަތް ކުރަމުން އަންނަ ކަމަށް، ޝަރުއީ ލިޔެކިއުންތަކަކާ ހަވާލާދީ ބައިނަލްއަގުވާމީ މީޑިއާއިން ރިޕޯޓްކޮށްފިއެވެ.

ހައްދު ޖެހުމުގެ ބަދަލުގައި އަދަބެއްގެ ގޮތުގައި ކަނޑައަޅާނީ ޖަލު ހުކުމްތަކާ ޖޫރިމަނާ ފައިސާ ދެއްކުން ކަމަށް ކަނޑައެޅުމަށް ސައުދީގެ ސުޕްރީމް ކޯޓުގެ އިރުޝާދު ބަޔާނެއްގައިވާކަމަށް މީޑިއާ ރިޕޯޓްތައް ބުނެއެވެ.

މި ބަދަލަކީ، ސައުދީއަށް އިންގިލާބީ ބަދަލުތަކެއް ގެނެސްދެއްވުމަށް ވައުދުވެވަޑައިގެންފައިވާ ނުފޫޒުގަދަ ވަލީ އަހުދު މުޙައްމަދު ބިން ސަލްމާންގެ، އިންސާނީ ހައްގުތަކުގެ އިސްލާހީ އެޖެންޑާގެ ދަށުން ގެނެވޭ ބަދަލެއް ކަމަށް ޚަބަރު ލިބެއެވެ.

ސައުދީ އަރަބިއްޔާއަކީ އިންސާނީ ހައްގުތަކަށް އަރައިގަތުމުގެ ބޮޑެތި އިލްޒާމުތަކެއް ބޮލުގައި އަޅަންޖެހިފައިވާ ގައުމެކެވެ. މިފަދަ ކަމެއް އެންމެ ފަހުން ހިނގާފައިވަނީ 2018 ވަނަ އަހަރުގެ ފަހުކޮޅު، ތަޖުރިބާކާރު ސިޔާސީ ނޫސްވެރިޔާ ޖަމާލް ޚަޝޯގީގެ މަރުގެ މައްސަލައާ ގުޅިގެންނެވެ.

ސައުދީއަށް ފާޑުކިޔާ ފަރާތްތަކުން ބުނާ ގޮތުގައި، މުޅި ދުނިޔޭގައިވެސް އިންސާނީ ހައްގުތަކުގެ ރެކޯޑް އެންމެ ނޭދެވޭ ގޮތަކަށް އޮތީ ސައުދީގައެވެ. ވަކިން ހާއްސަކޮށް ހިޔާލުފާޅުކުރުމާ ގުޅުން ހުރި ކަންކަމުގައި މިކަން ބޮޑު ކަމަށް އެފަދަ ފަރާތްތަކުން ބުނެއެވެ.

މި ދަނޑިވަޅަކީ ޖަލުގައި ހުކުމް ތަންފީޒު ކުރަމުންދިޔަ ސައުދީގެ އިންސާނީ ހައްގުތަކަށް ވަކާލާތުކުރި ނުފޫޒުގަދަ އެކްޓިވިސްޓެއް، ސްޓްރޯކެއް ޖެހި މަރުވުމާ ގުޅިގެން އެކަމުގެ އަޑު ގަދަވެފައިވާ ދަނޑިވަޅެއްވެސްމެއެވެ. އެކްޓިވިސްޓުން ބުނާ ގޮތުގައި ނުފޫޒުގަދަ އެކްޓިވިސްޓް ޖަލުގައި މަރުވެފައިވަނީ ކަމާބެހޭ ފަރާތްތަކުން ދޭންޖެހޭ ސިއްހީ ފަރުވާ ދިނުމުގައި އިހުމާލުވެފައިވާތީއެވެ.

ދުނިޔެ ސައުދިއަރަބިއާ