އޭނާގެ ނަމަކަށް ކޮރޯނާ ކިއާތީ ގިނަ ބައެއްގެ ފުރައްސާރަކުރުންތަކާ ކުރިމަތިލާންޖެހިފައިވާކަމަށް ބުނި، އުމުރުން އެންމެ 8 އަހަރުގެ ކުއްޖަކަށް، އެމެރިކާގެ މަޝްހުރު އެކްޓަރު ޓޮމް ހޭންކްސް ހާއްސަ ހަދިޔާއެއް ދީފިއެވެ.
ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ސަބަބުން ފުރައްސާރައާއި ކުރިމަތިލާންޖެހިފައިވާކަމުގެ ޝަކުވާ، ޓޮމް ހޭންކްސްއަށް ހުށަހަޅާފައިވަނީ އުމުރުން އެންމެ 8 އަހަރުގެ ކުއްޖާގެ ނަމަކީ ކޮރޯނާ ޑި ވްރީސްއެވެ.
ޓޮމް ހޭންކްސްއަށް އޭނާ އެންމެ ފުރަތަމަ ސިޓީއެއް ފޮނުވީ، އޮސްޓްރޭލިއާއަށް ކުރި ދަތުރެއްގައި ޓޮމް ހޭންކްސްއާއި އޭނާގެ އަންހެނުން ރީޓާ ވިލްސަން ކޮވިޑް-19އަށް ޕޮޒިޓިވްވި ޚަބަރު އާންމުވުމާއެކުގައެވެ.
ކޮރޯނާ ޑި ވްރީސް ޓޮމް ހޭންކްސްއަށް ލިޔުނު ސިޓީގައި އޭނާގެ ނަންދެކެ ލޯބިވާ ކަމަށާ، ނަމަވެސް "ކޮރޯނާވައިރަސް" އޭ ކިޔައިގެން ސްކޫލްގައި ދިމާކޮށް ހަދާތީ އެކަމަށް ވަރަށް ދެރަވެ އަދި ރުޅި އަންނަ ކަމަށް އެކުއްޖާ ވަނީ ބުނެފައެވެ.
މި ސިޓީގެ ޖަވާބުގައި ޓޮމް ހޭންކްސްވަނީ ކޮރޯނާ ޑި ވްރީސް އަކީ އޭނާގެ ރަހުމަތްތެރިއެއް ކަމަށް ބުނެ، ކޮރޯނާ ބްރޭންޑްގެ ޓައިޕްރައިޓަރެއް އެކުއްޖާއާށް ހަދިޔާކޮށްފައެވެ. އަދި ކޮރޯނާ ޑި ވްރީސްއަކީ 'ކޮރޯނާ'ގެ ނަމުން އޭނާ ދަންނަ ހަމައެކަނި މީހާ ކަންވެސް ޓޮމް ހޭންކްސްގެ ސިޓީގައި ވަނީ ފާހަގަކޮށްފައެވެ.
ކޮރޯނާ ޑި ވްރީސްގެ އާއިލާއިން ބުނީ ކޮރޯނާއަށް އެމެރިކާއިން ލިބުނު އާ ރަހުމަތްތެރިޔާއާއެކު އޭނާ މިހާރު ހުރީ ވަރަށް އުފަލުން ކަމަށެވެ.
