ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް ފުރަތަމަ ފެންނަން ފެށި ޗައިނާއިން މި ބަލި ފެންނަ މިންވަރު މަދުވެފައި ދުވަސްތަކަކު އޮތުމަށްފަހު، އަނެއްކާވެސް ރެކޯޑް މިންވަރަކަށް ޕޮޒިޓިވް ކޭސްތައް ރިޕޯޓްކުރަން ފަށައިފިއެވެ.
ފާއިތުވީ 24 ގަޑިއެއްހާރިއަށް ބަލާއިރު ޗައިނާއިންވަނީ، މީގެ ކުރީ 6 އެއްކަ ހަފުތާއެއްހާ ދުވަހުގެ ތެރޭގައި ރިޕޯޓް ނުކުރާހާ ގިނަ އަދަދަކަށް ކޮވިޑް-19އަށް ޕޮޒިޓިވްވި ކޭސްތައް ރިޕޯޓްކޮށްފައެވެ.
ކޮވިޑް-19އަށް ޕޮޒިޓިވްވެގެން ޗައިނާއިން އިއްޔެ 99 ކޭސް ރިޕޯޓްކޮށްފައި ވާއިރު، މިއަދުގެ މި ވަގުތާ ހިސާބަށް އެކަނިވެސް 108 ކޭހެއް ވަނީ ރިޕޯޓްކޮށްފައެވެ. މިއާއެކު ޗައިނާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު ވަނީ 82160 އަށް އަރާފައެވެ.
ޗައިނާއިން ބުނާ ގޮތުގައި އެގައުމުން މިހާރު ފެންނަ ކޭސްތަކުގެ ބޮޑު އިންސައްތައެއް ހިއްސާކުރަނީ އިމްޕޯޓަޑް ކޭސްތަކެވެ. ނުވަތަ ބޭރު ގައުމުތަކަށް ދަތުރުކުރުމަށްފަހު ޗައިނާއަށް އަންނަ ހިސާބުން ޕޮޒިޓިވްކަން އެނގޭ ކޭސްތަކެވެ.
ބަލިމަޑުކަން ފެތުރެން ފެށުމާއެކު ފުރިހަމަ ލޮކްޑައުންއަކަށް ގެންދިޔަ ވޫހާން ސިޓީ، ހުސްވި ހަފުތާގައި ހުޅުވާލާފައިވަނިކޮށް ޗައިނާގައި ކޮވިޑް-19ގެ ކޭސްތައް އިތުރުވާން ފެށުމުން، ބަލިމަޑުކަމުގެ ދެވަނަ ރާޅެއް ކުރިމަތިވެދާނެ ކަމުގެ ނުތަވަސްކަމާ ބިރުވެރިކަންވެސް ދަނީ ބޮޑުވަމުންނެވެ.
ވޫހާންއަކީ ކޮވިޑް-19ގެ ކޭސްތައް އެންމެ ފުރަތަމަ ރިޕޯޓްކުރަން ފެށި ސަރަހައްދެވެ. ކޮވިޑް-19ގެ ކޭސްތައް އެންމެ ފުރަތަމަ ފެންނަން ފެށީ، ވޫހާންގައި ގަވައިދާ ޚިލާފަށް ވަލުޖަނަވާރުގެ ވިޔަފާރި ކުރަމުންދިޔަ ސީފުޑް މާކެޓެއް ހިމެނޭ ސަރަހައްދަކުންނެވެ. ކަންމިހެން އޮތްއިރު، ކޮވިޑް-19ގެ ފެށުން އައީ ކިހިނެއްކަމެއް އަދިވެސް ސާބިތު ކުރެވިފައެއް ނުވެއެވެ. ސައިންވެރިންނާ ކަމާބެހޭ އެހެނިހެން ފަރާތްތަކުން އަދިވެސް ދަނީ މިކަމާ ގުޅޭ އިތުރު ދިރާސާތައް ކުރަމުންނެވެ.
ޗައިނާގެ އަދުގެ ހާލަތަށް ބަލާއިރު އެކްޓިވް ކޭސްތަކުގެ ގޮތުގައި ރެކޯޑްކޮށްފައިވަނީ 1156 ކޭހެކެވެ. މީގެ ތެރެއިން 121 މީހެއްގެ ހާލު ސީރިއަސް/ކުރިޓިކަލް ކަމަށް ޚަބަރު ލިބެއެވެ.
