ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)އާ ދެކޮޅަށް މުޅި ދުނިޔެ ހަނގުރާމަ ކުރަމުންދާ މިދަނޑިވަޅުގައި، ކުރިއަށް އޮތް ބަރަކާތްތެރި ރަމަޟާން މަހުވެސް މާތްވެގެންވާ ޢުމްރާގެ އަޅުކަން އަދާކުރުމަށް ހުއްދަ ނުދިނުމަށް ސައުދީ އަރަބިއްޔާއިން ނިންމާފައި ވާކަމަށް ޚަބަރު ލިބިއްޖެއެވެ.
މާތްވެގެންވާ މައްކާއާއި މަދީނާގެ ޚަބަރުތައް ގެނެސްދޭ ހަރަމައިނި ޝަރީފައިން ޓްވީޓާ ހެންޑްލްއިން ކޮށްފައިވާ ޓްވީޓްއެއް ބުނާ ގޮތުގައި، ރަމަޟާން މަހުވެސް ޢުމްރާގެ އަޅުކަން މަޑުޖައްސާލުމަށް ސައުދީއިން ނިންމާފައިވާކަން ހާމަކޮށްފައިވަނީ، ސައުދީގެ ޙައްޖު އެންޑް ޢުމްރާ ވުޒާރާގެ މަސްދަރަކާ ހަވާލާ ދީއެވެ.
މިއަހަރުގެ ފެބުރުވަރީ މަހުން ފެށިގެން ސައުދީއިން ވަނީ ޢުމްރާގެ އަޅުކަމަށް ހުއްދަ ދޫކުރުން މަޑުޖައްސާލާފައެވެ.
ކޮވިޑް-19 ކޮންޓްރޯލް ކުރުމަށް ސައުދީއިން ހަރުކަށި ފިޔަވަޅުތަކެއް އަޅަމުންދާއިރު މައްކާއާއި މަދީނާގެ ބޯޑަރު ވަނީ ބަންދުކޮށްފައެވެ. އަދި މި ސަރަހައްދުތަކުގައި ކާފިއުވެސް ވަނީ އިއުލާންކޮށްފައެވެ.
މިއަހަރުގެ ޙައްޖުގެ އަޅުކަމަށް ވާނެ ގޮތެއް އަދި ސާފު ނުވާއިރު، ސައުދީގެ ޙައްޖު މިނިސްޓަރު ޑރ މުޙައްމަދު ސޯލިހު ބިންތީން ވަނީ، ކޮވިޑް-19ގެ ކަންކަން ވަކި ގޮތަކަށް ހަމަޖެހެންދެން ޙައްޖު ޕްލޭންތައް މަޑުޖައްސާލުމަށް އިސްލާމީ އުއްމަތަށް ގޮވާލާފައެވެ.
ރަމަޟާން މަހުގެ ޢުމްރާގެ އަޅުކަން ސަސްޕެންޑް ކުރިކަން ސައުދީ އަރަބިއްޔާގެ ޙައްޖު އެންޑް ޢުމްރާ މިނިސްޓްރީއިން ރަސްމީކޮށް ހާމަކުރިކަން އަދި ކަށަވަރެއް ނުވެއެވެ. އަދި މިކަމާ ބެހޭ ގޮތުން ރާއްޖޭގެ ޙައްޖު މިޝަން އިން އަދި ވަކި އެއްޗެއް ހާމަކޮށްފައެއް ނުވެއެވެ.
