ކޮވިޑް19 ގެ ސަބަބުން އަވަށްޓެރި ސްރީލަންކާގައި ކަރަންޓީނުވެ ފަހުން ރާއްޖެ އާދެވޭ ގޮތް ނުވެފައި ތިބި ޓީސީގެ ކުޅުންތެރިންނާއި އޮފިޝަލުން ރާއްޖެ ގެނެސްފިއެވެ.
އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ކަފްގެ ގްރޫޕް ސްޓޭޖުގައި ބަންގްލަދޭޝްގެ ބޮށުންދަރާ ކިންގްސްއާ އެކުގައި ކުޅުނު މެޗަށްފަހު ޓީސީއަށް ރާއްޖެ އެނބުރި އާދެވޭ ގޮތެއް ނުވިއެވެ. އަދި އެ ޓީމުގެ ކުޅުންތެރިން ލަންކާގައި ތާށިވީ ކޮވިޑް19 ގެ ސަބަބުން އެގައުމު ވެސް ބަންދު ކުރުމާއި ވައިގެ ދަތުރުފަތުރު ވެސް ހުއްޓާލުމާއި ގުޅިގެންނެވެ.
ޓީސީގެ ކުޅުންތެރިންނާއި އޮފިޝަލުން ރާއްޖެ އައިސްފައި ވަނީ މިރޭ ލަންކާއިން ރާއްޖެ އައި މޯލްޑިވިއަންގެ ފްލައިޓްގައެވެ. ލަންކާގައި މިހާ ދުވަހު ތާށިވި ޓީސީ ކުޅުންތެރިންގެ ކެއުން ބުއިމާއި ހޮޓަލުގެ ހަރަދު ޔޫތު މިނިސްޓްރީން ހަމަޖައްސައި ދީފައިވާއިރު މިރޭ މޯލްޑިވިއަންގެ ފްލައިޓުން އެ ޓީމުގެ ކުޅުންތެރިން ރާއްޖެ އައިސްފައި މިވަނީ އެޓީމުގެ ކުޅުންތެރިން ރާއްޖެ ގެނައުމަށް ޔޫތު މިނިސްޓްރީން މަސައްކަތް ކުރަމުންދާ ކަމުގެ ވާހަކަތައް ދެކެވެމުން އަންނަނިކޮށެވެ. ނަމަވެސް ވަކި ފްލައިޓެއްގައި ޓީސީގެ ކުޅުންތެރިން ގެންނަން އުޅޭ ވާހަކަތައް ޔޫތު މިނިސްޓަރު އަހުމަދު މަހްލޫފު ވަނީ ދޮގު ކުރައްވާފައެވެ.
ރާއްޖެއަށް ޓީސީގެ ކުޅުންތެރިން މޯލްޑިވިއަންގެ ބޯޓަކުން އައިސްފައިވާއިރު އެ އެއާލައިންގެ ފަރާތުން ލަންކާގައި ތިބި ދިވެހިންގެ ތެރެއިން ރާއްޖެ އައުމަށް ބޭނުންވާ ދިވެހިން ބަލާ ދެ ފްލައިޓެއް ވަނީ ގޮސްފައެވެ.
