ކޮވިޑް19 އާ ގުޅިގެން ސުޕްރީމް ކޯޓުން ނެރުުނު ސާކިއުލާގެ ސަބަބުން ޝަރުއީ ދާއިރާގެ މުސްތަގިއްލު ކަމަށް އެއްވެސް އަސަރެއް ފޯރާފައިވާ ކަމަށް ނުފެންނަ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފިއެވެ.
ޖޭއެސްސީއިން ނެރުނު ބަޔާނުގައި ބުނެފައިވަނީ، ކޮވިޑް19ގެ ރޯގާ ރާއްޖޭގައި ފެތުރިގެން ހިނގައްޖެނަމަ ހެލްތް ޕްރޮޓެކްޝަން އެޖެންސީއިން ނެރޭ އެލާޓް ލެވެލްތަކާ ގުޅިގެން ކޯޓުތަކުން އަމަލުކުރާނެ ގޮތެއްގެ އިރުޝާދު ދީ ސުޕްރީމް ކޯޓުން ނެރެފައިވާ ސާކިއުލާއާ ގުޅިގެން ބައެއް ފަރާތްތަކުގެ ކަންބޮޑުވުން ތަކެއް ހުރިކަން އެ ކޮމިޝަނަށް ފާހަގަކުރެވޮފައިވާތީ އެކަމާމެދު މަޝްވަރާ ކުރެވުނު ކަމަށެވެ.
އެގޮތުން ދިވެހިރާއްޖޭގެ ސުޕްރީމް ކޯޓުން، ކޯޓުތަކުން އަމަލުކުރުމަށް ދެއްވާފައިވާ އިރުޝާދު ތަކަކީ، ވަގުތާ ހާލަތަށް ރިއާޔަތް ކޮށްދެއްވާފައިވާ އިރުޝާދުތަކެއް ކަމަށާއި އަދި މި އިރުޝާދު ދިނުމުގެ ސަބަބުން އެއްވެސް ފަނޑިޔާރެއްގެ އަދި ޝަރުއީ ދާއިރާގެ މުސްތަގިއްލު ކަމަށް އަސަރެއް ފޯރާނެ ކަމަށް ނުފެންނަކަމަށް ކޮމިޝަނުގެ ބައްދަލުވުމުގައި ބައިވެރިވި މެންބަރުން ފާހަގަކުރެއްވި ކަމަށެވެ.
ސުޕްރީމް ކޯޓުން އެ ސާކިއުލާ ނެރެފައި ވަނީ މިދިޔަ މަހުގެ 17ވަނަ ދުވަހުއެވެ. އެ ސާކިއުލާގައި ބުނެފައިވަނީ އެއްވެސް މައްސަލައަކާއި ގުޅިގެން ކޯޓަށް ޙާޒިރުވާންޖެހޭ ފަރާތަކީ އުމުރުން 55 އަހަރުވެފައިވާ ނުވަތަ ރިސްކް ކެޓަގަރީއެއްގައި ހިމެނޭ ފަރާތަކަށްވެފައި، އެފަރާތަކުން ކޯޓަށް ޙާޒިރުވުމަށް އިޢުތިރާޒުކުރާނަމަ، އެފަރާތަކީ އެފަދަ ގިންތިއެއްގައި ހިމެނޭ ފަރާތެއްކަން އެނގޭނެ ލިޔުމަކާއެކު ހުށަހެޅުމުން، އެއީ އެ ހާލަތުގައި، ކޯޓަަށް ޙާޒިރުނުވުމަށް މަގުބޫލު އުޒުރެއް ކަމުގައި ބަލަންވާނެ ކަމަށެވެ.
މީގެއިތުރުން ރާއްޖޭގެ ހުރިހާ ކޯޓުތަކުން މީސް މީހުންނަށް އަންގާ އެންގުންތައް އިލެކްޓްރޯނިކް ވަސީލަތްތައް މެދުވެރިކޮށް އެންގުމުގެ އިންތިޒާމުތައް ހަމަޖައްސައި، އެގޮތުގެމަތިން ވީ އެންމެ އަވަސް ފުރުސަތެއްގައި މަސައްކަތްތައް ތަރުތީބުު ކުރުމަށް ސުޕްރީމް ކޯޓުގެ ސާކިއުލާގައި ވަނީ އަންގާފައެވެ.
މީގެ އިތުުރުން ޖޭއެސްސީއިން މިއަދު ނިންމި ނިންމުމުގެ ތެރޭގައި، އުމުރުން 55 އަހަރު ވުމުން އަމިއްލައަށް އެދިގެން ވަކިވާ ފަނޑިޔާރުންނަށާއި، 55 އަހަރު ނުވި ނަމަވެސް އަމިއްލައަށް އެދިގެން ސިއްހީ ސަބަބު ތަކަށްޓަކައި މަގާމުން މުސްކުޅި ކުރާ ފަނޑިޔާރުންނަށް އިނާޔަތް ދިނުމުގައި އަމަލުކުރާނެ ގޮތުގެ ގަވާއިދުގެ ދަށުން ވ. ކެޔޮދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޒު އަބްދުލް ގަފޫރު މުހައްމަދު މަގާމުން މުސްކުޅި ކޮށްދެއްވުމަށް އެދިވަޑައިގެންފައި ވާތީ، އެގޮތުގެމަތިން ވަޒީފާއިން މުސްކުޅި ކޮށްދެއްވުމަށް އެ ކޮމިޝަނުން ވަނީ ނިންމާފައެވެ.
