ސައުދީއަށް މިސައިލް ހަމަލާތަކެއް ދީފިއެވެ.
ސައުދީގެ މިސައިލް ދިފާއީ ނިޒާމުން 2 ހަމަލާއެއް ބްލޮކް ކޮށްލާފައިވާކަމަށް ޔަމަނުގައި ސައުދީ އިސްވެ އޮވެ ހަނގުރާމަ ކުރަމުންދާ އަސްކަރީ ކޯލިޝަންގެ ތަރުޖަމާނު ތުރުކީ އަލް-މާލިކީ ހާމަކުރައްވައިފިއެވެ.
އަލް-މާލިކީ ވިދާޅުވީ ހަމަލާތައް އަމާޒުވީ ވެރިރަށް ރިޔާދުގެ އިތުރުން ދެކުނުގެ ސިޓީއެއް ކަމަށްވާ ޖިޒާންއަށް ކަމަށެވެ.
އަލް-މާލިކީ ވިދާޅުވީ މި ހަމަލާތައް ހުއްޓުވާލެވިފައިވަނީ ޖީއެމްޓީ ގަޑިން ރޭ 20:23 ހާއިރު ކަމަށެވެ.
ސައުދީގެ ރަސްމީ ޕްރެސް އިދާރާ (އެސްޕީއޭ)އާ ހަވާލާދީ ބައިނަލްއަގުވާމީ ޚަބަރުތައް ބުނާ ގޮތުގައި، މި ހަމަލާގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް އަދިކޮށްފައެއް ނުވެއެވެ. އަދި މި ހަމަލާތަކަކީ ޔަމަނުގައި ހަނގުރާމަ ކުރަމުންދާ ހޫތީންގެ ފަރާތުން އަމާޒުވި ހަމަލާއެއް ކަމަށް ސައުދީއިން ތުހުމަތުކުރާ ކަމަށްވެސް މައުލޫމާތު ލިބެއެވެ.
ނަމަވެސް، މި ހަމަލާތަކުގެ ޒިންމާ، 'ރަސްމީ' ސިފައެއްގައި އަދި އެއްވެސް ފަރާތަކުން އުފުލާފައެއް ނުވެއެވެ.
އަލް-މާލިކީ ވިދާޅުވީ، މިސައިލްތައް ހުއްޓުވާލުމަށް ހިންގި އޮޕަރޭޝަންގައި މިސައިލްތައް ފުނޑުފުނޑުވެގެން ފޭބި ކުނޑިތައް ފައިބާފައިވަނީ އާންމުން ދިރިއުޅެމުންދިޔަ ސަރަހައްދުތަކަކަށް ކަމަށެވެ. އެސަރަހައްދުތަކުގެ އާންމުންވެސް ވަނީ ބާރުއަޑުފައްގަނޑުތަކެއް 3 ފަހަރެއްގެ މަތިން އިވުނު ކަމަށް ރިޕޯޓްކޮށްފައެވެ.
ޔަމަނުގައި ހަނގުރާމަ ކުރަމުންދާ ހޫތީންގެ ސިލްސިލާ ހަމަލާތައް ދޭތެރެ ދޭތެރެއިން ސައުދީއަށް އަމާޒުވެއެވެ.
އެންމެ ފަހުގެ ހަމަލާތައް އަމާޒުވެފައިވާ މި ދަނޑިވަޅަކީ ދުނިޔޭގެ އެކި ހިސާބުތަކުގައި ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒްއާއި ގުޅިގެން ހުރިހާ ހަނގުރާމަވެރިން ހަތިޔާރުތައް ދޫކޮށްލުމަށް އދއިން ގޮވާލާފައިވާ ގޮވާލުމަށް އެއްބާރުލުން ދޭނެ ކަމަށް ޔަމަނުގައި ހަނގުރާމަ ކުރަމުންދާ ހުރިހާ ފަރާތަކުން އެއްބަސްވުމަކަށް އައިސްފައިވާ ދަނޑިވަޅެއްގައެވެ. ހަމަ މިއާއެކު، މިދަނޑިވަޅަކީ، ސައުދީގެ އަސްކަރީ ކޯލިޝަނުން ޔަމަނުގެ ދާހިލީ ހަނގުރާމައިގެ ތެރެއަށް ވަދެ، ވަރުގަދަ ހަނގުރާމައަކަށް މަސްރަހު ބަދަލުކޮށްލި ކޮށްލުމަށް 5 އަހަރު ފުރޭ ދަނޑިވަޅުވެސްމެއެވެ.
ކޮވިޑް-19ގެ ހާލަތަށް ބަލާއިރު ސުންނާފަތިވެފައިވާ ސިއްހީ ނިޒާމެއް އޮތް ޔަމަނުން އަދި މިބަލީގައި އެއްވެސް މީހަކު އުޅޭ ކަމުގެ ރިޕޯޓެއް ކޮށްފައެއް ނުވެއެވެ. ނަމަވެސް ޔަމަނުން މި ވައިރަސް ފެނިއްޖެނަމަ، ބޮޑު ކާރިސާއަކަށް އެކަން ވެގެން ހިނގައިދާނެ ކަމުގެ އިންޒާރު، އެހީދޭ ޖަމާއަތްތަކުން ވަނީ ދީފައެވެ.
ސައުދީ އަރަބިއްޔާއަށް ބަލާއިރު އެގައުމުން ކޮވިޑް-19އަށް ޕޮޒިޓިވްވި މީހުންގެ އަދަދު 1203 އަށް އަރާފައިވާކަމަށް ސައުދީގެ ސިއްހަތާ ބެހޭ ވުޒާރާއިންވަނީ ހާމަކޮށްފައެވެ. އަދި މި ބަލީގައި އެގައުމުން 4 މީހެއްގެ ފުރާނަ ގެއްލިފައިވާކަމަށް ރެކޯޑްތަކުން ދައްކައެވެ.
ކޮވިޑް-19 ފެތުރުން ކޮންޓްރޯލް ކުރުމަށް ސައުދީއިން ދަނީ ހަރުދަނާ ފިޔަވަޅުތަކެއް އަޅަމުންނެވެ. އެގޮތުން، މުއްދަތެއް ނެތް ގޮތަށް ބައިނަލްއަގުވާމީ ވައިގެ އުދުހުންތައް މެދުކަނޑާލާފައިވާއިރު، ޕަބްލިކް އަދި ޕްރައިވެޓް ސެކްޓަރުގައި މަސައްކަތްކުރާ މުވައްޒަފުންވެސް ވަޒީފާއަށް ނިކުންނަން ނުޖެހޭ ގޮތަށް ހަމަޖައްސާފައިވާކަން، ސައުދީއިން މިއަދު ވަނީ ހާމަކޮށްފައެވެ.
