ކޮވިޑް-19އާ ގުޅިގެން ދަރުބާރުގޭގައި ގާއިމް ކޮށްފައިވާ ނެޝަނަލް އެމަޖެންސީ އޮޕަރޭޝަން ސެންޓަރަށް ވަދެގެން ދިޔައިރު މިއަދު އެހެން ދުވަސްތަކާ ހިލާފު ކަމެއް ފާހަގަކުރެވުނެވެ. ވަންނަ ދޮރު ކައިރީގައި ހުންނަ ސިޑި ކައިރީގައި ތަތްކޮށްފައި ހުރި ކާޑުތަކެކެވެ. އެއްލި ކަޅިއަކުން މި ކާޑުތައް ލޮލުގައި އަޅައިގަތްއިރު، އޭގެ ކާޑެއްގައި ބޮޑުއަކުރުން "ތެންކިއު" ޖަހާފައި އޮތްތަން ވެސް ފެނުނެވެ.
މިއީ ކޮންކަމެއްތޯ ބަލާލުމުގެ ޝައުގުވެރި ކަމާއެކު، ދޮރު ކައިރީގައި ހުރި ކުއްޖާ ކުރެން އެއީ ކޮން އެއްޗެއްތޯ އަހާލީމެވެ. ޖަވާބުގައި އޭނާ ބުނީ، މިއަދު ހެނދުނު އެންއީއޯސީއަށް އައި އިރު އެތަނުގައި ތަތްކޮށްފައި ހުރި ކާޑުތަކެއް ކަމަށެވެ. އިތުރަށް ސާފު ކުރުމުގެ ގޮތުން ކައިރިއަށް ގޮސް ބަލާލުމުން އެނގުނީ، އެއީ ކޮވިޑް-19 ޓާސްކްފޯހަށް ޝުކުރު އަދާ ކުރުމުގެ ގޮތުން އަރަބިއްޔާ ސްކޫލުގެ ސްކައުޓް ގްރޫޕުގެ ދަރިވަރުން ތައްޔާރު ކޮށްފައިވާ ކާޑުތަކެއް ކަމެވެ.
މިކަމާ ބެހޭގޮތުން އިތުރު މައުލޫމާތު 'ދަ ޕްރެސް' އާ ހިއްސާ ކުރައްވަމުން އަރަބިއްޔާ ސްކޫލުގެ ޕްރިންސިޕަލް ވިދާޅުވީ، ސްކައުޓް ދަރިވަރުންނަކީ އަބަދުވެސް، މިފަދަ ދަނޑިވަޅުތަކުގައި އެހީތެރިކަން ފޯރުކޮށްދޭ ބައެއް ކަމަށެވެ. ނަމަވެސް، ކޮވިޑް-19އާ ގުޅިގެން އެ ކުދިންނަށް އެހީތެރިވުމުގެ ގޮތުން މާ ބޮޑުކަމެއް ކުރެވެން ނެތުމާއެކު، މިއީ އެ ސްކޫލުގެ ސްކައުޓް ލީޑަރުންގެ އިސްނެގުމުގެ މަތިން ކޮށްފައިވާ ކަމެއް ކަމަށެވެ.
ޕްރިންސިޕަލް ވިދާޅުވީ، ސްކައުޓް ދަރިވަރުން މި ކާޑުތައް ތައްޔާރުކޮށްފައި ވަނީ، ސެމިސްޓާ ބްރޭކް ތެރޭގައި ކަމަށެވެ. އެގޮތުން ގޭގައި ތިބެ މި ކާޑުތައް ތައްޔާރު ކުރުމަށް ފަހު، އެ ސްކޫލުގެ ބޭރުގައި ހުންނަ ސެކިއުރިޓީ ޕޯސްޓުގައިވާ ބޮކްސްއަށް ކާޑުތައް ލީ ކަމަށެވެ. އޭނާ ވިދާޅުވީ، މި ކާޑުތައް ތައްޔާރުކޮށްފައި ވަނީ ގައުމީ ހިދުމަތުގައި ޑޮކްޓަރުންނާއި ނަރުހުން އަދި ޓާސްކްފޯހުގައި ހިމެނޭ ހުރިހާ ފަރާތްތައް ކުރަމުންދާ ބުރަ މަސައްކަތުގެ އަގުވަޒަން ކުރުމުގެ ގޮތުން ކަމަށެވެ.
މީގެ އިތުރުން މި ދަރިވަރުން ވަނީ ކޮވިޑް-19 ޓާސްކްފޯހަށް، ހާއްސަކޮށް ޑޮކްޓަރުންނަށް ރައްކާތެރިކަމަށް އެދި ދުއާ ކޮށްފައެވެ.
މި ކާޑުތަކާ ބެހޭގޮތުން ކޮވިޑް-19ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، އެންއީއޯސީއަށް ވަދެގެން ދާއިރު، މި ކާޑުތައް ފެނުމުން އިތުރު ހިތްވަރު ލިބޭ ކަމަށެވެ. ކޮވިޑް-19އާ ދެކޮޅަށް މިކުރާ މަސައްކަތަކީ އެންމެން އެކުގައި ކުރަ ކަމެއް ކަން އިހުސާސްވެ، އުއްމީދު އާވާ ކަމަށެވެ. މީގެ އިތުރުން މަބްރޫކް ވަނީ، މިކަމަށް އެ ދަރިވަރުންނަށް ޝުކުރު އަދާކޮށްފައެވެ.
ސްކައުޓް ދަރިވަރުން ތައްޔާރު ކޮށްފައިވާ މި ކާޑުތަކަކީ އެންއީއޯސީގައި މަސައްކަތް ކުރާ ގިނަ ބަޔަކަށް ހިތްހަމަޖެހުން ގެނުވައިދިން އެއްޗެކެވެ. ހުރިހާ ފަރާތްތަކުން ވެސް އަރަބިއްޔާ ސްކޫލުގެ ސްކައުޓް ދަރިވަރުން ކޮށްފައިވާ މި މަސައްކަތް ސިފަ ކުރަނީ، "ކިއުޓް" ކަމެއްގެ ގޮތުގައެވެ.
މުޅި ދިވެހިރާއްޖެއަށް ވެސް “އަރިބިއްޔާ” ސްކައުޓުންނަކީ ނަމޫނާ ދައްކަމުންދާ ދަރިވަރުން އުޅޭ ސްކޫލެއް. ސާބަސް! އަރަބިއްޔާ ސްކައުޓުން ނަށް!